Kröpp lægð skýst hingað norður eftir

Nú er ekki annað að sjá en að tiltölulega sakleysisleg lægð  suðsuðvestur í hafi (sjá kort frá kl. 06 í morgun) muni hreyfast hratt til norðurs í áttina til landsins um leið og hún dýpkar talsvert.  Hagfelld skilyrði eru  þessa dagana til örrar dýpkunar lægða á Atlantshafinu og eins er til staðar sterk vindröst í háloftunum sem ber lægðina hratt yfir.

Því er allt útlit fyrir að lægðarmiðjan verði skammt úti af Reykjanesi um kl. 18 og við utanvert Snæfellsnes kl. 21, sbr. spákort HIRLAM sem fengið er af Brunni Veðurstofu Íslands.  Gera verður ráð fyrir SA-stormi um allt landið vestanvert á meðan lægðin fer hjá.  Vindhviðuástand (35-40 m/s) undir Hafnarfjalli og á utanverðu Kjalarnesi svona frá því um kl. 17 til kl. 23 að telja. Að sama skapi á norðanverðu Snæfellsnesi en örlítið síðar í tíma. Lægðin færir okkur líka mikið úrhelli suðvestan- og vestanlands ofan á þá rigningu sem verið hefur á þessum slóðum frá því í gærkvöldi. Norðanlands og austan mun blása nokkuð hressilega sums staðar seint í kvöld, úrkoma mun minni, en áfram þíða.   

 

 

Í nótt gerir síðan snarpa V-átt og kólnar, él eða snjókoma á morgun áður en næsta lægð gerir vart við sig, en hún er allrar athygli verð svo ekki sé meira sagt í bili a.m.k.