Önnur lægð og kemur illa upp að okkur

Lægðin úti á Atlantshafi sem dýpkar ört i dag og virðist enn skv. tölvureiknuðum spám ætla að berast upp að landinu þannig að miðja hennar fari skammt fyrir vestan Reykjanes og Snæfellsnes.  Ferðin á henni verður mikil og hún enn í vexti þegar hún fer hér hjá.  Vestanlands verður SA-áttin hvað hvössust í kvöld um kl. 21 og Veðurstofan spáir veðurhæðinni allt að 25 m/s. Meðfylgjandi kort sýnir vindaspá Belgings í 3km reiknineti þeirra, gildir kl.21 og byggð á greiningu kl.00.

Aðdragandi þessarar lægðar minnir um margt á aðra svipaða fyrir ári eða 14. des 2007 sem einnig var númer 2 í lægðasyrpu.  Þá kom reyndar sjálf lægðarmiðjan beint á Suðurland og verstur varð veðurhamurinn í S-átt strax í kjölfar skilanna, en ekki á undan skilunum eins og nú verður.

Þetta krappar lægðir sem ekki eru miklar um sig og skjótast til norðurs skammt undan Reykjanesi er ætíð stórvarasamar.  Þeirrar gerðar var einmitt fræg óveðurslægð sem olli svonefndu "Engihjallaveðri" 16. febrúar 1981.

Annars var bagalegt að heyra þul Rásar 1 lesa "gamla" veðurspá í veðurfregnum fyrir kl. 7 í morgun.  Einhver misskilningur átti sér stað, en slíkt á vitanlega ekki að geta komið fyrir, sérstaklega nú þegar veður eru válynd.  

 

 

Athugasemdir

[Unnur (IP-tala skráð) 11.12.2008 kl. 20:18]

Mig langar að spyrja þig sem veðurfræðing og áhugamann um veðurfræði.  Þegar illviðri geysar eins og í kvöld.  Ef ég vil lesa út vindaspá, hvort er réttara vedur.is eða belgingur.is?

Annars vil ég hósa þér fyrir skemmtilega og góða síðu

[Hörður Þórðarson, 13.12.2008 kl. 05:02]

Þetta er góð spurning sem ég hef því miður ekki þekkingu til að geta svarað. Ég hef grun um að svarið sé stundum vedur.is og stundum belgingur.is og að þú þurfir að vera ansi vel að þér til að vita hver er betri hverju sinni. Mikill hluti af starfi mínu felst í að meta niðurstöður mismunandi tölvureiknaðra veðurlíkana. Reynslan er sú að sum líkön standa sig að jafnaði betur en önnur en ekki alltaf.

Að öllum líkindum er betra að styðjast við spár vedur.is því þar er veðurfræðingur á vakt allan sólarhringinn og greinir stöðuna. Stundum eru veðurlíkönin einfaldlega röng og þá þarf mannshöndin að grípa inn.

Ég tel þetta http://www.wrf-model.org/index.php vera það besta sem til er þessa stundina. Ég veit ekki hvað belgingur og vedir.is nota. Kannski vilja einhverjir þaðan koma hingað og ræða það...