Veðrabrigði eystra

Mikið hefur verið fjallað um óveðrið í gær í fjölmiðlum og víðar.  Afar vel gekk að spá veðrinu og sérstaklega stóðust tímasetningar vel.  Veðurhæð var sambærileg við verstu vetraveðrin vestantil á landinu  í fyrravetur s.s. 10. des., 30. des. og 8. feb.  Aðeins eitt kom mér á óvart og það var hve hvasst varð á Suðurlandsundirlendinu, en t.a.m. fór mældur 10 mínútna vindur í  25 m/s á Hellu.

Ég ætla ekki að bæta frekar við því sem sagt hefur verið, en dagurinn í dag er afar merkilegur eins og Ágúst Bjarnason bendir réttilega á.

Nú um kl. 16 mátti sjá afar skarpt lægðardrag austast á landinu og mikil veðrabrigði á litlu svæði.  Þannig blés af ASA á Vatnsskarði eystra áður en komið er ofan í Borgarfjörð eystri af Héraði. Vindhraði þar 24 m/s og hiti rétt ofan við 0°C.  Á Fjarðarheiði hins vegar þar sem farið er frá Egilsstöðum yfir á Seyðisfjörð var vindáttin VSV 0g 8 m/s.  Frostið var þar 3 stig.  Sjá má á spákorti fengið frá Belgingi hvað skilin er skörp á milli austan- og vestanáttarinnar.  Austan megin er hiti um 4°C við sjávarmál og mikil rigning.  Handan þeirra þar sem V-áttin ríkir er hins vegar vægt frost og mikil snjókoma.

Svo er að reyna að rýna í það á hvaða ferðalagi þetta skarpa drag verður næstu klukkutímanna !!   

Athugasemdir

[Gunnar Th. Gunnarsson, 13.12.2008 kl. 04:34]

Það var líka athyglisvert hvernig mestu vindhviður duttu niður snögglega undir Hafnarfjalli um miðnættið á fimmtud.kvöldið, úr um 60 m/sek og niður fyrir 10 m/sek.

[Þorkell Guðbrandsson (IP-tala skráð) 13.12.2008 kl. 08:54]

Ellegar hvernig meðalvindhraðinn var á Fróðárheiði, þar sem hann var á tímabili yfir 40 m/s og mestu hviður upp í 54 m/s  - Nú fer The Einar Sveinbjörnsson Fan club að leyfa sér að vonast eftir spá um jólaveðrið upp úr helgi