2008 verður 13. árið í röð ofan meðallags

Ef litið er til hitafarsins í Reykjavík nú þegar lítið lifir enn af árinu virðist ekkert geta breytt því að árið verður það 13. í samfelldri röð þeirra ára sem öll hafa verið ofan meðallagsins 1961-1990. 

Hlýrra var í fyrra og eins 2006, en hvað Reykjavík varðar virðist 2008 ætla að verða áþekkt árinu 2005 í hitafari.  Nokkru hlýrra var síðan 2004 og 2002 og mun heitara 2003, en það ár var með þeim tveimur til þremur hlýjustu frá upphafi mælinga um land allt.

2008 er kaflaskiptara hvað hitann áhrærir en flest undangengin ár.  Þannig hafa skipst á mjög hlýir mánuðir eins og t.a.m. maí og júlí og  aðrir kaldari s.s. eins og október sem var áberandi undir meðallagi.  Að sama skapi var veturinn jan-mars heldur kaldari en nokkrir undanfarnir vetur og tíðarfarið kannski nær meðalástandi. 

Einhverjir geta sagt að hér hafi markvert farið kólnandi frá árinu 2003 en það má svo sem til sanns vegar færa vilji menn draga línu frá því ári.  Ég lít hins vegar öðru vísi  á málið og segi hiklaust að meðalhitinn 2008 sýnir glögglega að þetta ár sem bráðlega lýkur, sker sig með engu móti úr í því hlýja tímabili sem hófst hér á landi árið 1996.  Þaðan af síður eru nein merki þess að þessu merkilega skeiði kunni að vera lokið.  Það gerist þó á endanum eins og allar góðar sögur. 

Athugasemdir

[Gisli (IP-tala skráð) 18.12.2008 kl. 08:41]

Fæddur 51 og ólst upp við samfelldar fréttir veðurfræðinga um að nýliðið ár væri mun kaldara en viðmiðunarárin.

Hvernig eru þessi síðustu ár miðað við árin 40 - 60 á liðinn öld

[Ljónsmakkinn (IP-tala skráð) 18.12.2008 kl. 14:33]

Já, væri ekki tilvalið að bera þetta saman við árin 1931 - 1960 því tímabilið 1961 - 1990 voru jú þrír köldustu áratugir síðustu aldar.

[Emil Hannes Valgeirsson, 18.12.2008 kl. 15:55]

Samkvæmt hitafarstölum sem ég frá Veðurstofunni var:

meðalhitinn í Reykjavík árin 1931-1960, 4.9°C.

meðalhiti núverandi viðmiðunartímabils 1961-1990 er 4.3°C.

meðalhiti síðustu 10 ára 1998-2007 er 5,2°C

Öll ár þessarar aldar (frá 2001) hefur meðalhitinn í Reykjavík verið yfir 5 gráðum og stefnir nú í ca. 5,2°C, en komst hæst í 6,1°C árið 2003 sem hlýjasta mælda árið í Reykjavík.

[Einar Sveinbjörnsson, 18.12.2008 kl. 17:00]

Emil er talnaglöggur !  Það er rétt að árið stefnir í 5,2°C gerist ekkert stórt í aðra hvora hitaáttina það sem eftir lifir mánaðar.

ESv 

[Halldór Björnsson (IP-tala skráð) 21.12.2008 kl. 00:45]

Varðandi #1 og #2 þá er áhugavert að bera síðustu ár saman við alla síðustu öld, og að fara jafnvel enn lengra aftur í tímann. Þetta er m.a. gert í skýrslu sem við Einar áttum báðir þátt í að skrifa, sjá mynd 2.6 í  

http://www.umhverfisraduneyti.is/media/PDF_skrar/visindanefndloftslagsbreytingar.pdf

Halldór 

[Ljó[e-mail] (IP-tala skráð) 23.12.2008 kl. 11:15]

Er ekki örugglega hægt að finna 10 ára tímabil frá 1921-1960 sem er með hita u.þ.b. 5,2°C ?