Sluppum vel, en ekki Írar og Skotar

Djúpa lægð helgarinnar sem hér hefur gengið undir heitinu "sunnudagslægðin" olli engu óveðri hér á landi þó svo að miðja hennar hafi farið yfir landið norðaustanvert seint í gærkvöldi. Bæði var það að mestur vindur var úr henni en eins það að ferill hennar var nokkuð óvenjulegur, í stórum fleygboga austur yfir Atlantshafið í átt til Bretlandseyja og síðan til norðvesturs yfir norðaustanvert Ísland.

Á laugardag varð hins vegar  afar slæmt SV-óveður þegar lægðarmiðjan fór hjá N-Írlandi og Skotlandi.  Sérstaklega varð veðurhæð mikil á norðantil á Írlandi þar sem mestu hviður fóru í 45-50 m/s.  Athugið að aðstæður  á Írlandi eru allt aðrar en víðast hér, engin fjöll til að magna upp vindhviður, enda náði meðalveðurhæðin af fárviðrisstyrk (32 m/s).

Kona lést á N-Írlandi þegar bíll henn sem hún ók varð fyrir fallandi tré sem rifnaði upp með rótum.  Þá fór rafmagn fór af um 100.000 heimilum vítt og breitt um Írland.  Ýmis vandræðagangur hlaust einnig af veðrinu víðar á Bretlandseyjum þó hvergi hafi það verið verra en norðantil á Írlandi og á hinum skosku Hebrides-eyjum. 

Tunglmyndin er frá Dundee, laugardagur 17. jan kl. 20:40.  Sveipurinn umhverfis lægðarmiðjunna er mjög dæmigerður.  

 

Athugasemdir

[LS (IP-tala skráð) 19.1.2009 kl. 10:10]

Hvar er rokið sem á að vera hér í janúar?

Er orðinn leiður á þessu logni alla helvítis daga. Hvað veldur?

LS.

[Guðríður Hrefna Haraldsdóttir, 19.1.2009 kl. 10:17]

Allt of sjaldan brim við Langasandinn þessa dagana. Eða jú, sjórinn var reyndar mjög flottur við Akranes á laugardaginn, æðislegar öldur, sérstaklega við gamla vitann. Sjá t.d. mynd á www.motta.blog.is.

[Þorkell Guðbrandsson (IP-tala skráð) 19.1.2009 kl. 11:20]

Æi, gott fólk, ekki fara að biðja um óveður. Það er svo sem allt í lagi fyrir þá sem þurfa ekki að fara út úr húsum sínum, en hugsið t.d. um fiskimennina, sem eru að afla gjaldeyris svo við lifum af í landinu. Hafið hefur tekið alltof stóran toll í gegn um aldirnar og oft og iðulega erum við að missa okkar öflugasta fólk í slíkum slysum. Það var vissulega fagnaðarefni að við misstum engan í sjóslysi á síðasta ári. Slíkt hefur líklega sjaldan ef nokkurn tíma gerst áður. Maður bara vonar að sama lán verði yfir sjómönnum okkar á nýbyrjuðu ári og 2008

[Guðríður Hrefna Haraldsdóttir, 19.1.2009 kl. 12:04]

Rétt, Þorkell. Óskum bara eftir brimi í kringum sjómannadaginn, þegar allir eru í landi.

[LS (IP-tala skráð) 19.1.2009 kl. 12:21]

Jú Þorkell, mikið rétt.

LS.

LS.

[Ari (IP-tala skráð) 19.1.2009 kl. 13:40]

Já ég er mjög ánægður að hafa ekki fengið viðlíka manndrápslægðir hingað eins og í fyrra. :D

[Sigurður Þór Guðjónsson, 19.1.2009 kl. 17:08]

Þetta eru nú bara lognin á undan stormunum!

[Emil Hannes Valgeirsson, 19.1.2009 kl. 22:04]

Íslandslægðin stendur undir nafni þessa dagana. Loftvogin hefur verið í 955-970 haP samfellt í nokkra daga sem mér finnst að hljóti að vera dálítið sérstakt.

Svo ég spái líka, þá verður almennilegur stormur hér ekki fyrr en um miðjan febrúar.