Hlý sunnanáttin

Lægð sem er í uppsiglingu hér suðvesturundan ber með sér milt og afar suðlægt loft.  Eins og gjarnan við þessi skilyrði liggur hvöss S-vindröst yfir landinu og í raun er hún forsenda þess að bera svo milt loft þetta langt norður eftir.

Hlýjast verður norðan- og norðaustanlans lands rétt áður en kuldaskil far síðan yfir.  Þetta verður líkast til seint í kvöld.  Ekki er ólíklegt að hitinn fari á stöku stað í yfir 10 stig nú á áliðnum Þorra.  Jafnvel upp undir 15 stigin.  Líklegir staðir fyrir hæsta hitann eru Sauðanesviti við Siglufjörð, Akureyrarflugvöllur og Mánárbakki á Tjörnes.  Jafnvel einhverjar stöðvanna austanlands, s.s. Skjaldþingsstaðir í Vopnafirði.

Spákortið sýnir S-vindröstina í 300hPa fletinum í kvöld kl. 21.  Hún er til marks um varmastreymið til norðurs á okkar slóðum.  Kortið er fengið af Brunni VÍ.

Athugasemdir

[Jóhann Grétar Kröyer Gizurarson (IP-tala skráð) 17.2.2009 kl. 11:27]

Fleiri svona lægðir ! :D

[Arnar Páll Birgisson (IP-tala skráð) 17.2.2009 kl. 14:49]

Nú er mikið af fólki á leiðinni í skíðaferð til Akureyrar í næstu viku vegna vetrarleyfis grunnskólanna. Verður eitthvað skíðafæri fyrir norðan?

[Sigurður Þór Guðjónsson, 17.2.2009 kl. 17:46]

Verst að veðurupplýsingar frá Akureyrarflugvelli skuli ekki vera aðgengilegar gegnum vef Veðurstofunnar en hægt er að sjá þær frá NOOA.

[Víðir Gíslason (IP-tala skráð) 17.2.2009 kl. 22:55]

Sigurður,

Það er hægt að sjá veðurupplýsingar frá Akureyrarflugvelli (BIAR) á vef Veðurstofunnar, ásamt frá fleiri flugvöllum. 

http://www.vedur.is/vedur/flugvedur/metar/

Það er oft talsverður munur á veðrinu þar og á sjálfvirkri stöð VÍ. Áberandi eins og í froststillunum eins og voru í síðustu viku. Þá er iðulega 4 til 6 gráðum kaldara á flugvellinum heldur en í bænum.

Það mætti hinsvegar koma upplýsingunum í notendavænna snið. METAR er staðall sem notaður er í flugi.

[Sigurður Þór Guðjónsson, 18.2.2009 kl. 00:04]

Það er nú það sem ég átti við, að upplýsingarnar eru ekki notendavænar.