Snjóar aftur á höfuðborgarsvæðinu

Það er svo merkilegt hvað lægðir geta verið svipsterkar við nánari skoðun, þó svo þær séu allar frekar "kindarlegar" svona við fyrstu sýn.  Á meðan sumar bera hingað skarpa vetrarhláku með SA-áttinni eru aðrar þannig að þær eru sprottnar upp úr kaldari efnivið og milt Atlantshafsloftið streymir til austurs fyrir sunnan land. 

Sú sem nú nálgast landið er af síðari gerðinni. Þó svo að blási af SA og far lægðarinnar er ósköp venjulegt, nær ekki að hlýna að neinu ráði.  Þessi munur hefur það í för með sér að úrkoman fellur víðast sem snjókoma.  Þannig verður það í nótt ef að líkum lætur, þó svo að það nái að blota allra syðst og eins á utanverðu Reykjanesi.

Því er spáð að á Höfuðborgarsvæðinu varði aftur kominn snjór í fyrramálið, en varla meira en föl.  Mjög víða mun snjóa á landinu í nótt og framan af morgundeginum og þeir sem leið eiga um þjóðvegina hafi það í huga.  Samfara ofankomu dregur mjög hratt úr skyggni eftir að 7-8 m/s er náð og sé lausamjöll fyrir þarf ekki að spyrja að kófinu þegar vindhraði er kominn í þetta 13-15 m/s.  

Spákortið er tekið af vef Veðurstofunnar og tunglmyndin er frá því skömmu fyrir kl. 15 í dag. 

Athugasemdir

[Guðmundur Th Einarsson (IP-tala skráð) 27.2.2009 kl. 19:21]

Sæll Einar og þakka þér afburðaskemmtilega bloggsíðu þína.Datt í hug að inna þig eftir álitamáli,sem snertir íslensku og veðurfræði,sem raunar hafa átt afburða góða samleið.

Við höfum veitt því athygli að a.m.k. einn veðurfræðingur hjá RUV notar úrkomuskilgreiningarnar "skúr" og "ofankoma" með afgerandi öðruvísi hætti en áður, sbr.dálitlir skúrir, allhvassir skúrir en einnig ofankoma í merkingunni rigning-væta. (Rak raunar augun í sömu notkun á vef veðurstofunnar í textaspá dagsins á orðinu skúr).

Við kennarar erum sumir leiðinlega smámunasamir,en viljum gjarnan hafa það sem sannara reynist.Þess vegna væri okkur akkur í að heyra skoðun þína og fræðslu um ofanritað,ef þú nennir að skoða þetta með okkur.

Með bestu kveðjum.

[Pálmi Freyr Óskarsson, 28.2.2009 kl. 09:23]

Þessi lægð var vel kröftug fyrir okkur Vestmannaeyinga, enn 10 mín. meðalvindhraði fór í 34 m/s og vindhviðu uppí 39,9 m/s hér á Stórhöfða aðfaranótt föstudags.

Sambandið við það sem Guðmundur er að spyrja hér á undan um orðið skúr. Enn ég hef aldrei fundist það rétt að tala skúr á veðurathugunartíma í fleirtölu. 

[ÞorkellGuðbrands (IP-tala skráð) 28.2.2009 kl. 09:42]

Tungumálið breytist stundum hraðar en maður gerir sér grein fyrir. Ég er orðinn nokkuð gamall og tek því kannski fremur eftir þessum breytingum fyrir bragðið. Ein af þessum breytingum kemur skýrt fram í texta kennarans hér að ofan. Það varðar kyn orða og í þessu tilviki orðið skúr. Þegar ég var að byrja mitt lífshlaup var mér kennt að þetta orð væri í kvk. og því var talað um "skúrina" og "skúrirnar". Þetta má víða sjá í prentuðum textum frá því fyrir 1960, að ég hygg. Nú er ég ekki að halda því fram, að annað sé réttara en hitt, en breytingar á tungumálinu koma ekkert síður fram í veðurfarsorðum en öðrum. Þegar ég var ungur táknaði "ofankoma" snjókomu eingöngu. Orðið "úrkoma" gat hinsvegar táknað hvort heldur var snjókomu, rigningu eða slyddu. Nú notar fólk einnig orðatiltækið "að rofa til" um það þegar léttir til, hvernig svo sem veðrið hefur verið á undan. Hér áður fyrr var þetta orðatiltæki einungis notað þegar uppstytta varð í vondu veðri, eða hríðarveður gekk niður. Nú verður þess að geta, að stundum getur þetta stafað af því að orð og orðatiltæki hafi verið notuð með mismunandi hætti milli landshluta. Síðan hafi það gerst, að orðfæri eins landshluta eða héraðs hafi orðið ofan á vegna þess að t.d. útvarpsþulir, veðurfréttafólk eða aðrir, sem mikið er hlýtt á, hafi haft þessi áhrif og skal það ekki vanmetið.

 Bið Einar afsökunar á að misnota bloggsíðuna hans fyrir þessar vangaveltur.