Norðaustanröst Vestfjarðamiða

Á þessu spákorti Reiknistofu í Veðurfræði af Belgingsvefnum sést afskaflega vel hvað norðaustanvindröstin getur verið skörp úti fyrir Vestfjörðum.  Gildistími kortsins er kl. 06 í fyrramálið (3. mars).  Röstin er reyndar spáð inn á land í fyrramálið.

Þegar maður sér vindakort eins og þetta skilur maður vel hvað átt er við þegar sagt er að "veðrið hafi brostið á  eins og hendi væri veifað".  Enda er að sjá sem veðurhæð verði 3 m/s utantil í Djúpinu á meðan yfir 25 m/s eru einhverjum 10 mílum utar eða tæplega það.

Spáin er grundvölluð á GFS og upplausnin 9km. 

Athugasemdir

[Þorkell Guðbrands (IP-tala skráð) 3.3.2009 kl. 06:52]

Sæll Einar. Er einhversstaðar til úttekt á páskaveðrinu árið 1963? Minnir að það hafi skollið á þ. 9. apríl, er þó ekki alveg nógu viss um dagsetninguna. Ég bjó á Hólmavík þegar þetta var og er eins og öðrum, sem upplifðum þau veðrabrigði, mjög minnisstætt hvað þau voru skörp og snögg. Veðrið skall á þarna á Hólmavík í hádeginu. Ég fór úr vinnu tiltölulega léttklæddur, því fyrirfarandi hafði verið langvinnur góðviðriskafli og þegar ég fór út var S-SV gola og +7°C hiti. Veðrið skall hinsvegar á eins og hendi væri veifað og rétt fyrir kl. 13:00 var frostið orðið -11°C eftir því sem einn samstarfsmaður minn sagði frá. Ekki skal ég fullyrða um hversu nákvæmur sá mælir hefur verið. Í þessu veðri urðu mannskaðar á sjó, eins og lesa má um í gögnum frá þessum tíma. Ýmsir komust í hann krappann, þótt þeir slyppu með líf og limi heila. Ofarlega er mér í minni hvernig bræðurnir frá Kleifum í Steingrímsfirði komust til lands og voru sveitungar þeirra sammála um að þar hefði fyrst og fremst verið fyrir afburða sjómennsku þeirra og samheldni. Talað var um, að svo snögg veðrabrigði hefðu ekki orðið síðan 1935 að mig minnir.

[Einar Sveinbjörnsson, 3.3.2009 kl. 08:32]

Sæll Þorkell !

Páskaveðrið 1963, oft kallað Hákonarhretið hefur oft verið getið.  Um það var skrifað í tímaritið Veðrið á sínum tíma og eins í ársrit Skógræktarfélagsins held ég 1964. Í páskablaði Morgunblaðsins 1997 var líka forvitnileg upprifjun.  Finn ekki í fljótu bragði þá samantekt í greinasafni Mogga, en hún liggur þarna úti. 

ESv 

[Þorkell Guðbrands (IP-tala skráð) 3.3.2009 kl. 11:32]

Þakka þér fyrir þessar upplýsingar, þá getur maður farið að leita. Merkilegt annars að hretið skuli vera kennt við Hákon skógræktarstjóra, en ekki við t.d. skipin og bátana, sem fórust með manni og mús í þessu veðri. Það stafar líklega af því að þetta vor féllu allar aspir á Suðurlandi, enda var búin að vera einmuna tíð á landinu frá því í febrúar að mig minnir og Alaskaaspirnar farnar að þroska brum og jafnvel byrjaðar að opna þau.

[Þorkell Guðbrands (IP-tala skráð) 3.3.2009 kl. 12:48]

Núna um kl. 12:44 hafa hvössustu hviður á mæli Vegagerðarinnar á Þverfjalli mælst 66 m/s. Það er orðið ansi mikill vindur. Að vísu eru fáir þar á ferli væntanlega!