Mikil veðurhæð syðst á landinu

Þegar þetta er ritað rétt um miðnætti hafði fyrr í kvöld mælst vindhviða við Hvamm undir Eyjafjöllum upp á 56 m/s*.  Meðalvindhraði eða veðurhæðin hefur verið mikil og vaxandi í kvöld syðst á landinu.  Á Vatnsskarðshólum í Dyrhólahverfi voru þannig 29 m/s (39 m/s í hviðu),  á Steinum undir Austur-Eyjafjöllum 24 m/s (41 í hviðu) og á Stórhöfða 41 m/s. Slíkur vindur er vitanlega óskaplegur, en um 32 m/s þarf til að teljast fárviðri eða 12 vindstig.  Fréttir hafa einmitt verið sagðar af slæmu veðri í Vestmannaeyjum í kvöld. 

Ég hef ekki við höndina samanburð við önnur óveður fyrr í vetur, en ég held að ekki hafi náð að verða áður þetta svakalega hvasst á Stórhöfða, en meiri vindur í fyrravetur (ef mig misminnir ekki), allavega 30.des 2007.  Pálmi Freyr veðurathugunarmaður á Stórhöfða á þessar tölu ef til vill skráðar hjá sér og síðan er lítið mál að fletta þessu upp í gagnagrunni Veðurstofunnar. 

Svo er nóttin vitanlega ekki enn úti...

* þess skal geta að vindhviður á vegagerðarstöðvum eins og Hvammi eru ekki skilgreindar  á sama hátt og hviðan á mælum Veðurstofunnar.  Fyrir vikið verður Vegagerðarhviðan oft heldur meiri.

Athugasemdir

[Pálmi Freyr Óskarsson, 14.3.2009 kl. 03:07]

Sæll Einar

Upplýsingar um vindhraða síðustu áratuga er mjög torvelt að finna á heimasíðu Veðurstofurnar, eða þá í Veðráttunni. Þannig að ég verð að skoða í "veðurdagbækur" föður minns til að koma með einhvern metlista yfir vindhraða á Stórhöfða. Og þar sem vindhraði er mestmegnis í mælieiningu sem kallast hnútar, þá er þetta seinlegt og ónákvæmt verk að þurfa að breyta því í m/s. Og auk þess er mikið er af miklum vind fyrir árið 1991 á Stórhöfða, sem gerir þetta afar mikla vinnu að búa til nákvæman metlista um vindhraða á Stórhöfða.

Enn þar sem ég er ekki búinn að fullklára metlista yfir vindhraða (vonandi geri ég það einhvertímann fyrst Veðurstofan sér ekki ástæðu til þess að gera svoleiðis.) þá miða við ég metárið 1991 í vindhraða. Enn eftir það ár hefur vindhraði á Stórhöfða ekki náð oft yfir 35 m/s. í 10 mín meðalvind, eða yfir 45 m/s. vindhviðu.

Mesta vindhviða á Stórhöfða frá 1991-2009 (stafrænn mælir frá 2004):

17. mar. 2005: 51,2

14. mar. 2009 og 21. jan. 2008:  51,1 m/s.

3. jan. 2005: 50,4 m/s.

??. feb.  2008:  50,? m/s.

[Björn (IP-tala skráð) 14.3.2009 kl. 03:20]

http://vedur.is/vedur/athuganir/kort/faxafloi/#group=38&station=1578

[Pálmi Freyr Óskarsson, 14.3.2009 kl. 03:47]

Leiðrétting:

Sæll Einar

Upplýsingar um vindhraða síðustu áratuga er mjög torvelt að finna á heimasíðu Veðurstofurnar, eða þá í Veðráttunni. Þannig að ég verð að skoða í "veðurdagbækur" föður minns til að koma með einhvern metlista yfir vindhraða á Stórhöfða. Og þar sem vindhraði er mestmegnis í mælieiningu sem kallast hnútar, þá er þetta seinlegt og ónákvæmt verk að þurfa að breyta því í m/s. Og auk þess er mikið af miklum vind fyrir árið 1991 á Stórhöfða, sem gerir þetta mikla vinnu að búa til nákvæman metlista um vindhraða á Stórhöfða.

Enn þar sem ég er ekki búinn að fullklára metlista yfir vindhraða (vonandi geri ég það einhvertímann fyrst Veðurstofan sér ekki ástæðu til þess að gera svoleiðis.) þá miða ég við metárið 1991 í vindhraða. Enn eftir það ár hefur vindhraði á Stórhöfða ekki náð oft yfir 35 m/s. í 10 mín meðalvind, eða yfir 45 m/s. vindhviðu.

Mestu vindhviður á Stórhöfða frá 1991-2009 (stafrænn mælir frá 2004):

51,2 m/s. - 17. mar. 2005

51,1 m/s. - 21. jan. 2008

50,4 m/s. - 3. jan 2005

50,3 m/s. - 8. feb. 2008

50,1 m/s. - 14. mar. 2009

49,1 m/s. - 13. des. 2007

[Pálmi Freyr Óskarsson, 14.3.2009 kl. 08:56]

 Ég fann loksins blaðið með upplýsingum um mestu vindhviðunum sem hafa komið á Stórhöfða 1968-2009:

Mestu vindhviður á Stórhöfða frá 1999-2009 (stafrænn mælir frá 2004):

51,2 m/s. - 17. mar. 2005

51,1 m/s. - 21. jan. 2008

50,4 m/s. - 3. jan 2005

50,3 m/s. - 8. feb. 2008

50,1 m/s. - 14. mar. 2009

49,1 m/s. - 13. des. 2007

Það fóru engar vindhviður yfir 50 m/s á Stórhöfða 1999-2004.

Mestu vindhviður á Stórhöfða 1991-1998:

130 hnútar = 67 m/s.         - 3. feb. 1991

116 hnútar =                   - 24. feb. 1992

115 hnútar =                   - 12. feb. 1992

114 hnútar =                  - 14. nóv. 1998

112 hnútar =                  -  27. nóv. 1997

110 hnútar =                   - 22. nóv. 1992

108 hnútar = 55,5 m/s.   -  23. nóv. 1992

107                                   - 7. nóv. 1998

105                                  - 29. jan.  1994

104                                   - 8. apr. 1993

103                                 - 10. feb. 1997

101                                  - 7. sept. 1992

100                                  - 24. apr. 1992

100                                  - 30. sept. 1995

 99                                  - 9. feb 1997

 98 hnútar = 50,4 m/s   - 10. mar. 1997

Vindhviður fóru 65?? sinnum? yfir 50 m/s á Stórhöfða 1968 -1990.

Er með allar vindhviður sem hafa farið yfir 50 m/s. (97 hnúta) á Stórhöfða á blað. Enn er eftir að breyta hnútum í m/s. Svo er eftir að gera það sama með 10 mínúta meðalvindhraðann.

[Einar Sveinbjörnsson, 14.3.2009 kl. 09:55]

Þú er alldeilis snöggur til Pálmi !

Það er tiltölulega einfalt fyrir þá sem kunna til verka að kalla eftir lista um mesta mælda vind á Stórhöfða í gagnagrunni Veðurstofunnar.  Allar veðurathuganir í sem skráðar hafa verið í athugunarbækurnar eru tiltækar í grunninum frá árinu 1949. Þar á meðal fx-dálkurinn eða mesti 10 mínútna vindhraði á milli athugana og hann hefur verið umreiknaður yfir í m/s sem. Sama á við um fg eða vindhviðuna.

En hvað segja minnisbækur ykkar feðga um 41 m/s í 10 mín vind í nótt.  Er ekki nokkuð um liðið síðan svo mikla veðurhæð gerði á Höfðanum ?

Bestu kveðjur 

Einar Sv

[Hörður Þórðarson, 14.3.2009 kl. 20:19]

"Á Vatnsskarðshólum í Dyrhólahverfi voru þannig 29 m/s (39 m/s í hviðu),  á Steinum undir Austur-Eyjafjöllum 24 m/s (41 í hviðu) og á Stórhöfða 41 m/s. Slíkur vindur er vitanlega óskaplegur, en um 32 m/s þarf til að teljast fárviðri eða 12 vindstig."

Við skulum ekki gleyma að því að í fárviðri, 12 vindstigum, er meðalvindhraði meiri en 32 m/s og einstakar hviður oft miklu meiri. Meðalvindhraðinn á grafinu sem Einar birti er um 18 m/s sem eru aðeins 8 vindstig. 

Það er rétt að benda á að Beauforts kvarðinn (vindstig) er góður úti á sjó en er ekki jafn gagnlegur á landi. Á landi er hviður oft miklu hærri en meðalvindhraðinn en á sjó er munurinn ekki jafn mikill. Það eru jú hviðurnar sem valda tjóni.

http://en.wikipedia.org/wiki/Beaufort_scale

Takk Einar fyrir þetta áhugaverða blogg.