Stórhríð fyrir norðan og austan

Illviðrið með ofanhríð og vindkófi og staðið hefur yfir norðan- og austantil frá því í gærdag er af frekar sjaldséðri gerð norðanveðra.  Fyrir utan það vitanlega hvað ýmsum þykir það vera seint á ferðinni.

Í fyrravetur snjóaði mikið norðanlands 31. mars rétt eins og greint var frá hér.  Þá var um að ræða hægfara lægð fyrir austan land og frá henni komi úrkomuskil að Austanverðu landinu og talsvert snjóaða í NA-átt.  Þessi tegund hríðarveðurs er algeng og fylgir lægðum sem vaxa á leið sinni austur yfir Atlantshafið og sveigja síðan til norðausturs, fyrir austan land, nánast fullmótaðar og eru að lóna hér á milli Íslands og Noregs. Slík veður verða helst skeinuhætt þegar djúp lægðarmiðjan kemst nærri landinu, þá helst við Langanes eða þar um slóðir.

Nú var aðdragandinn hins vegar annar, lægð myndaðist í austan við Grænland, barst síðan til ANA yfir landið og dýpkaði ört.  Strax í kjölfar ferðar sjálfrar lægðarmiðjunnar snerist vindur til N-áttar og sums staðar brast hann á í orðsins fyllstu merkingu rétt eins og vindriti Laxárdalsheiðar sýnir um miðjan dag í gær.  Þegar lægðin tók að dýpka hægði hún jafnframt á ferðinni úti fyrir Melrakkasléttu og hríðin samfara N- og NV-áttinni helst því lengur en annars mætti ætla.  Einnig varð foráttuhvasst, t.d. á fjallvegum fyrir austan, 54 m/s í vindhviðu í Oddskarði laust fyrir hádegi, en síðan þá hefur vindur gengið mikið niður.

Veðurkortið efst er spákort HRAS, gildir kl. 13 í dag 30.mars.  Úrkoma er uppsöfnuð í 1 klst.  Öll gildi yfir 1 mm á klst er talsverð úrkoma í magni talið.

Bresku kortin tvö eru annars vegar frá miðnætti 29.mars og hins vegar sólarhring síðar eða liðna nótt.

ps. ætlaði að taka mér veðurblogghlé fram á vorið, en það er bara erfitt sitja með hendur í skauti þegar veðrið er með þessum ósköpum og ófærð sennilega meiri en dæmi eru um í vetur !!

Athugasemdir

[Páll A. Þorgeirsson (IP-tala skráð) 30.3.2009 kl. 16:03]

Það hefur ekki mikið farið fyrir veðrinu hér á Akureyri.  Smá snjóél við og við, á milli glittir í sólina af og til.  Varla nema smágjóla.  Snjóbráð á malbiki.  "Þungur" en þunnur éljabakki liggur hér yfir en hann hefur lítið náð að hrista úr sér.  Mér er sagt að norðar í firðinum sé veður mun verra.  Það er nú svo sem ekkert nýtt á þessum tíma, það er stundum eins og bein lína yfir fjörðinn við Moldhauga svo ég tali nú ekki um Víkurskarðið þar sem oft er eins og annar heimur.

Farðu nú að senda vorið norður

[Þorkell Guðbrands (IP-tala skráð) 30.3.2009 kl. 20:45]

Það jaðrar við að maður þakki fyrir hríðarjagandann ef honum fylgir að þú haldir áfram að blogga um veðrið, Einar!
En hér í Skagafirði, var þokkalegasta veður í gærmorgun, líklega meðan lægðarmiðjan þokaði sér yfir okkur, en um hádegisbil fór að blása af norðri og snjóa og það stendur enn. Giska á 12 m/s hér í Króknum núna. Þetta hefur ekki verið mikið veður, snjókoman svona í meðallagi, en snjórinn, sem féll í logni á laugardagseftirmiðdaginn, hefur verið að berjast saman í skafla undan norðanáttinni. Ekkert til að kvarta yfir svo sem, miðað við páskahretið 1963 er þetta bara smá gegnumtrekkur.