Af fannfergi

Sjálfvirki mælirinn á flugvellinum á Ólafsfirði gefur til kynna að þar hafi úrkomumagnið numið um og yfir 50 mm frá því um miðjan dag í gær þegar ofanhríðin hófst.  Snjókoman hefur fallið lengst af nærri 5 m/s og ætti því að mælast sæmilega.

Þetta þykir mér mikið úrkomumagn ef tillit er tekið til þess að lengst af hefur frostið verið 4 til 5 stig í Ólafsfirði á meðan hríðinni hefur staðið.  Eins og kunnugt er inniheldur loft æ minni raka eftir því sem það er kaldara.  Þetta mikil úrkoma samfara N-átt í um +8°C síðla sumars sætir hins vegar vart tíðindum við utanverðan Tröllaskagann.

Nú skömmu fyrir miðnætti hefur hins vegar rofað heldur til fyrir norðan amk í bili. 

 

Athugasemdir

[Brattur, 31.3.2009 kl. 19:52]

Þetta er farið að minna á gamla daga þegar ég var að alast upp á Ólafsfirði. Maður gekk einum metra ofar jörðu á snjó allan veturinn, stökk ofan af húsþökum ofan í snjóinn og sökk upp að höku... samt var ég aldrei mikið fyrir snjó!

[Skúli Traustason (IP-tala skráð) 31.3.2009 kl. 21:09]

Já, þetta minnir óneitanlega á gamla daga, og til að krydda þetta er nú komin vinstristjórn eins og í gamla daga, en þá var veðrið alltaf vont eins og vinstri-stjórnarfarið sem þá var við völd.

Var einhver að tala um "Global Warming"? 

Það lýtur bara út fyrir að vetrartíðin muni halda áfram langt fram í apríl.  Endalausar norðaustanáttir og leiðinda fýla.

Þetta langvarandi kuldahret er sönnun þess að það er ekkert að hlýna á Jörðunni þrátt fyrir að ýmsar "lærðar" greinir sýni fram á það.

[Þorkell Guðbrands (IP-tala skráð) 1.4.2009 kl. 07:56]

Skírdagur fellur á 9. apríl í ár. Þá eru liðin 46 ár frá páskahretinu mikla 1963, sem hefur áður orðið að umræðuefni hér á bloggsíðu Einars veðurfræðings. svo er að sjá á þessari síðu http://www.wetterzentrale.de/pics/avnpanel1.html        að það verði mjög eindregin norðanátt hér á landi bænadagana. Ég verð nú að segja eins og er, að mér líst ekkert illa á að vindáttin liggi í NA lægum áttum á þessum árstíma. Þegar SV-lægar áttir eru ríkjandi á útmánuðum, eigum við frekar von á svölu vori hér á vestanverðu Norðurlandi. Þá hrekst hafísinn við Grænland nær landinu og er svo að bráðna fram eftir öllu vori hér úti fyrir Húnaflóanum. Það þýðir að kaldur, seltulítill sjór flýtur ofan á hlýrri og saltari sjó hér milli Horns og Sigluness með tilheyrandi þoku og svalri hafgolu.