Hlýr apríl og fáar frostnætur

Hún var til fyrirmyndar samantekt Sigtryggs Sigtryggssonar í Morgunblaðinu í gær um tíðarfarið í nýliðnum aprílmánuði.  Meðalhitinn í Reykjavík var 5,0°C sem er 2,1 stigi ofan meðallags.  Frávikið var litlu minna á Akureyri eða +1,7 stig ofan meðallags, en þar reyndist meðalhitinn vera 3,4°C.

Trausti Jónsson segir í fréttinni að í fljótu bragði sýnist apríl hafa verið sá 10. í röð hlýjustu aprílmánaða frá upphafi mælinga í Reykjavík.  Hlýrra var hins vegar 2003, 2004 og 2007.    Hlýjasti apríl í Reykjavík og reyndar á landinu öllu var hins vegar 1974, en þá var meðalhitinn í Rvk 6,3°C.   Vorið 1974 var með þvílíkum fádæmum að tilefni væri til sérstakrar umfjöllunar.  Þá frysti t.a.m. síðast 3. apríl og það vor varð aldrei vart næturfrost í höfuðborginni eftir það.  

Talandi um næturfrost að í nýliðnum apríl frysti aðeins þrisvar, þ.e. lágmarkshitinn reyndist þrjá morgna vera undir frostmarki í Reykjavík, síðast að morgni 25. apríl.  Hin tvö skipti urðu fyrr í mánuðinum í eina kuldakastinu sem gerði ef hægt er að kalla því slíku nafni, en það varð um páskana í hreinviðri sem þá gerði.  Að jafnaði eru frostnætur 12 í Reykjavík í apríl (réttara að segja að lágmarkshitinn fari 12 daga af 30 niður fyrir frostmark).  Frá 1949 hafa þær fæstar orðið ein, þ.e. áðurnefndan apríl 1974 og eins 1955.  Þær voru 2 í apríl 2003. Til að gæta allrar sanngirni að þá frysti þessa tvo daga 2003 1. og 2. apríl (þ. 3. 1974) og út frá þeim mælikvarða var apríl 2003 enn hagfelldari en 1974 !

Flestir frostdagarnir komu hins vegar 1990 þegar þeir reyndust vera 23.

Á Akureyri er meira um vorfrost heldur en í Reykjavík og kemur ekki á óvart. Í ár mældist lágmarkshitinn 9 daga undir frostmarki, aðeins 2003 og 1974 var minna um frost í apríl en nú.   

Athugasemdir

[Þorkell Guðbrands (IP-tala skráð) 2.5.2009 kl. 14:06]

Takk fyrir þetta yfirlit. Nú er maður farinn að velta fyrir sér hvernig maí muni reynast, útsæðiskartöflurnar eru að spíra og bíða niðursetningar. Garðurinn er hinsvegar ennþá undir snjóg og ég veit ekki um hversu mikið frost er í honum! Nóg um þær búksorgir, en einhverntímann upplýstir þú okkur um að þrálátir vorkuldar og kalt þokuloft hér á Húnaflóasvæðinu, þ.e. frá Horni að Siglunesi og þar inn af, mætti að hluta til a.m.k. kenna því að seltulítið bræðsluvatn frá hafísþekjunni, flyti ofan á hlýrri og saltari sjó og "lokaðist inni" ef svo mætti segja á þessu svæði, ef ég hef skilið rétt. Magn þessa kalda yfirborðslags tengdist svo því að SV-lægar áttir hefðu oft verið þrálátar á útmánuðum á Grænlandshafi og átt sinn þátt í að beina því frekar norður fyrir land. Nú finnst mér (veit ekki hvort það er allskostar rétt) að SV-áttirnar hafi ekki verið eins "intensivar" í mars og apríl eins og nokkur, undanfarin ár. Má maður vera svo frekur að biðja þig að velta fyrir þér horfunum fyrir maí mánuð í þessu tilliti?

[Sigurður Þór Guðjónsson, 2.5.2009 kl. 16:53]

Það hefði nú verið enn þá glæsilegra ef apríl 1974 hefði verið alveg frostlaus.