Vorhret

8.5.2009

Sá að í morgun kl. 6 var hiti við frostmark á Akureyri og þar snjóaði talasvert. Svipað var ástatt í N-áttinni víðar fyrir norðan, frekar þó austantil, heldur en í Skagafirði og Húnaþingi. Margt bendir til þess að í dag verði meira og minna ofanhríð eða éljagangur. Loftið er enn að kólna, sem þýðir bara eitt að lægðin fyrir austan land er að draga loftið til suðurs lengst norðan af hjaranum.

Meðfylgjandi veðurkort er spákort HIRLAM af Brunni VÍ og gildir kl. 18 í dag 8. maí. Vindur fer að ganga niður í nótt vestanlands og á morgun laugardag fyrir norðan, loftið verður smámsaman þurrara og dregur úr éljagangi norðaustanlands í nótt.

Þegar gerir hret um og fyrir miðjan maí er manni ósjálfrátt hugsað til sauðfjárbænda, en sauðburður er víðast kominn á fullt. Allt fé þarf að hafa á húsi, þó svo að sums staðar sleppi nú betur til syðra. Víða verða þrengsli í fjárhúsum, en margir bændur búa nú að því að eiga tómar hlöður frá fyrri tíð sem koma nú í góðar þarfir þegar pláss vantar fyrir stíur og aðra hólfaskiptingu fénaðar sem fylgir sauðburðinum. En sú breyting er orðin frá fyrri árum að nú heyrist vart af heyleysi, eins og svo oft var viðkvæðið hér áður þegar norðangarrinn ætlaði aldrei að ganga niður.

Viðbót: Skapti Hallgímsson blaðamaður Moggans senda mér meðfylgjandi mynd frá Akureyri í hríðinni í morgun.

	Fannhvít jörð í Eyjafirði
Ábyrgðarmaður færslu Tilkynna um óviðeigandi tengingu við frétt

Flokkur: Veðuratburðir hér og nú | Breytt 26.8.2009 kl. 13:23 | Facebook

Athugasemdir

Var einhver að tala um "Global Warming"?

Hvar er þetta Global Warming sem er búið að hræða okkur á?

Eru menn ekki vissir um hvort að það sé í raun um að ræða "Global Cooling"?

Alla vegana er Global Warming eitthvað fyrir mér sem er ein mesta lygi sem til er.

Móðursjúkir umhverfisverndarsinnar geta reynt að sannfæra mig um þetta, en þeir munu aldrei hafa erindi sem erfiði. Eftir svona 10 ár mun ég sýna þeim fram á að þeir höfðu rangt fyrir sér.

Sigmundur B. Helgason (IP-tala skráð) 8.5.2009 kl. 08:57

Það er nú ekkert global neitt við kuldaköst í maí. Ég veit ekki betur en það sé nokkurnvegin árviss viðburður.

Gunnar (IP-tala skráð) 8.5.2009 kl. 09:49

Ekki þori ég neitt að fullyrða í sambandi við þessa hlýnun, sem mjög hefur verið í umræðunni. Vara menn hinsvegar við að vera með stóryrði í þessu sambandi, það á engan veginn við að tala um móðursýki og annað í þessu sambandi. Hitt er svo annað mál, að í skýrslum og greinargerðum, sem birtar hafa verið í þessu sambandi, hefur m.a. komið fram, að reiknilíkön hafa bent til þess að staðbundinnar kólnunar gæti gætt á tilteknum svæðum, þar á meðal á og umhverfis Ísland.

Þorkell Guðbrands (IP-tala skráð) 8.5.2009 kl. 12:34

Local eða Global Cooling hefur lítið með þetta veður að gera. Það er auðvitað venjan að það kólnar í norðanátt og svo hlýnar með sunnanáttinni eins og mun einmitt gerast eftir helgi.

Emil Hannes Valgeirsson, 8.5.2009 kl. 13:28

Oft veður hreinn fíflaskapur og stóryrði uppi í umræðum um loftslagshlýnun á báða bóga. Efsta athugasemdin er gott dæmi um það.

Sigurður Þór Guðjónsson, 8.5.2009 kl. 13:39

Einmitt. Skrýtið þegar menn rjúka upp með gífuryrðum og stórkarlalegum fullyrðingum þó það komi kuldaköst að vori. Það hefur meira að segja oft verið kaldara í mai en núna, og oft seinna í mánuðinum. Ekkert óeðilegt.

Gunnar (IP-tala skráð) 8.5.2009 kl. 17:13

Sjáiði til:

Fyrst var því haldið fram að það myndi alemennt hlýna á Jörðinni, en þegar það gerðist ekki, þ.e. á sumum stöðum hlýnaði ekki, var kenningin leiðrétt og þá hljómi hún á þá vegu, "það myndi hlýna meira sumstaðar, en ekki annars staðar".

Þegar þetta gekk ekki eftir, var kenningin leiðrétt, og þá hljómaði hún; "að það myndi hlýna sumstaðar á Jörðinni, en kólna annars staðar".

Síðan 2003 hefur meðalhiti á Jörðinni farið lækkandi, og enn var kenningin um hlýnun Jarðar "leiðrétt" og sagt að um tímabundið frávik væri að ræða, og að það væri samt að hlýna á Jörðunni.

Staðreyndin er sú, að mælitæki sem eru notuð til loftslagsmælingu eru miklu nákvæmari og betri en þau voru hér áður fyrr, auk þess að mun meira er fylgst með loftlagsmálum núna. Þess vegna greinum við frávik og hitasveiflur meira en hér áður fyrr.

Hlýindi nú í dag eru ekkert meiri en þau voru við landnám fyrir ca. 1100 árum. Þá er jafnvel talið að hafi verið hlýrra á Jörðinni en nú er. Bent hefur verið á það, að jöklar hafi verið hér talsvert minni þá en nú í dag. Til að mynda var Vatnajökull tvískiptur og hét þá Klofajökull og var hann þar að auki töluvert minni en í dag.

Ég tel að við séum á leið inn í kuldatímabil (séum reyndar búin að vera í því í 5 ár) sem muni vara í 20-25 ár. Margir hafa bent á það, að virkni Sólarinnar sé minni nú en verið hefur undanfarin ár, að þetta muni leiða til tímabundinar kólnunar á Jörðinni um nokkra áratugi. Þetta passar vel með það að við séum í komin í kuldaskeið núna.

Við vorum hinsvegar í hlýskeiði sem byrjaði ca. 1985 og endaði eins og fyrr segir ca. 2003. Þar á undan var kuldaskeið sem varði frá 1960-1985, og enn þar á undan var hinsvegar hlýskeið sem varði frá 1920-1960, þó með köldum tímabilum á köflum.

Núverandi kuldasveifluskeið mun því enda ca. á árunum 2025-2030.

Man einhver eftir því þegar sagt var á loftslagsráðstefnu hér áríð 1977 (á þáverandi kuldaskeiði), að kringum árið 2000 yrði orðið svo kalt hér, að Ísland yrði tæpast byggilegt vegna lítillar íslaldar sem þá yrði komin?

Hitt er annars málið, að ég trúi ekki á kenninguna um "alheims hlýnun" og mun aldrei trúa henni. Ég þyrfti nánast að sjá sjálfsprottin pálmatré hér á landi til að trúa þessari kenningu.

En það er alveg greinilegt að þeir sem ekki kokgleypa við "rétttrúnaðinum" um alheims hlýnun, eru stimplaðir sem menn sem rjúki upp með gífuryrði, stórkallalegar fullyrðingar, og séu með stóryrði vegna "smá" kuldakasta.

Sigmundur B. Helgason (IP-tala skráð) 8.5.2009 kl. 21:42