Bylgjuský yfir landinu

Í hvassri og hlýrri S- og SA-áttinni í dag mátti víða á landinu sjá bylgjuský á lofti.  Slíkt er alvanalegt í slíkr veðri.    Á tunglmyndum kemur fram munstur þar sem  oft má greina þau fjöll eða fjallgarða sem bylgjumynduninni valda.  Farþegar í innanlandsflugi í líka hættara við heldur meiri hristingi en vant er, að því gefnu að yfir höfuð sé flogið.

Á meðfylgjandi mynd úr MODIS-tunglinu (kl.13:45) sést að bylgjulengdin á milli skýjanna er ekki alltaf sú sama.  Vindstyrkurinn, stöðugleiki loftsins og hæð fjallanna ráða bylgjulengdinni eftir kúnstarinnar reglum.

Hitinn varð hæstur í dag 17°C á Siglufirði samkvæmt töflu á veðurathugunarsíðu Veðurstofunnar.  Líklega verður heldur hlýrra á morgun, einkum norðanlands og þá helst austantil á Norðurlandi.  Loftmassahitinn verður ívið hærri og vindur þar heldur hægari sem hjálpar upp á sakirnar nú þegar sólin skín glatt.

Lítið lát er hins vegar á vindbelgingnum um landið vestanvert lengst af morgundagsins (miðvikudag). 

 

 

Athugasemdir

[Alma Jenny Guðmundsdóttir, 13.5.2009 kl. 00:14]

Er þetta veðurlag algengt í maí-mánuði?

[Einar Sveinbjörnsson, 13.5.2009 kl. 08:49]

Nei Alma !  Ekki getur það talist algengt en þekkist þó.  Kenniveðurlag maímánaðar í maí-mánuði er svöl og sólrík N-áttin með næturfrostum og með frekar meinlitlum lægðum inn á milli með mildara veðri og vætu.  Maí er að jafnaði þurrasti mánuður ársins og þá er meðaloftþrýstingur hvað hæstur.  Meðalvindur er þó minni víðast hvar yfir hásumarið.

ESv