2008: Hnattrænn hiti sá lægsti frá því 2000

Árið 2008 þótti á jörðinni fremur kalt miðað við næstu árin þar á undan og þarf að fara allt aftur til ársins 2000 til að finna kaldara ár.   Engu að síður er síðasta ár það 10. Hlýjasta frá 1880 en frá þeim tíma er slíkur samanburður talinn raunhæfur.

Það eru þeir James E. Hansen og félagar við GISS stofnunina í Bandaríkjunum (Goddard Institute for Space Studies) sem halda  utan um þessa tölfræði.  Hansen þessi er ekki að koma fyrst fram nú í loftlagsmálunum.  Störf hans og rannsóknir á þessu sviði hafa veri æði fyrirferðarmiklar síðustu þrjá áratugi eða svo.

Af 10 hlýjustu af öllum árunum frá upphafi þessarar raðar eru frá 12 síðustu árum þ.e. 1997-2008.  Sjá má þegar síðasta ár er skoðað miðað við 30 ára meðaltal 1950-1980 að það eru svæði á Kyrrahafinu og mjög sunnarlega á Atlantshafi við Suðurskautslandið sem voru köld, en hlýnunin hélt áfram í Evrópu og einkum Asíu.  Sjá má að allt umhverfi Íslands á N-Atlantshafinu var í hlýrri kantinum miðað við árin 1950-1980, sem vissulega voru köld eins og sjá má á línuritinu til vinstri.   Það sýnir okkur líka greinilega hve hnattræn hlýnun hefur ágerst hratt frá því um 1980. Myndin úr úr greinargerð GISS.

Suðurhafssveiflan á stóran þátt í því hvað árið var “kalt” að mati þeirra hjá GISS.  La-Nina straumurinn var í hámæli framan af árinu, en hann veldur einmitt kólnun á víðáttumiklum svæðum Kyrrahafsins, öfugt við El-Nino, en síðasta stóra sveiflan í þá áttina átti ríkan þátt í því að gera árið 1998 hlýrra en það hefði annars orðið.

Sumir rengja þessa aðferðarfræði við gerð þessarar hitaraðar, en nú orðið þykir hún nokkuð skotheld, þó svo að óvissan hafi vissulega verið meiri framan af hvað varðar gildi hvers árs. En það skiptir hins vegar ekki öllu þar sem nokkuð góð vitneskja er að þá og a.m.k fram undir síðari heimstyrjöld var markvert kaldara en síðar varð.  Aðrir halda fram að kólnun á milli ára sé til marks um það að hlýnun af völdum aukinna gróðurhúsaáhrifa sé eitthvert ekkisens bull sem ekki þurfi að hafa sérstakar áhyggjur af.

Tengil á greinargerð GISS má m.a. finna neðst á þessari síðu. 

Athugasemdir

[Loftslag.is, 15.5.2009 kl. 09:21]

Sé innsláttarvillu "öfugt við La-Nina" á væntanlega að vera "öfugt við El Nino".

Sumir spekúlantar segja að nú sé hnattræn kólnun - er það ekki rétt mat vísindamanna að tala enn um hnattræna hlýnun, miðað við þá staðreynd að 10 hlýjustu árin séu á síðustu 12 árum - þrátt fyrir að síðasta ár hafi verið í kaldara lagi miðað við þessi fáu ár á undan?

[Sveinn Atli Gunnarsson, 15.5.2009 kl. 10:43]

Ertu með einhver gögn varðandi styrkleika El Nino í gegnum tíðina? T.d. samanburður á El Nino 1998 og önnur ár. Ég hef lesið einhversstaðar að hann hafi verið töluvert sterkari 1998 en venjulega (hafi valdið svæðisbundinni/tímabundinni hitahækkun um 1,5 gráður, þegar venjan er 0,25 gráður). El Nino virðist hafa verið einn af stóru áhrifavöldunum á hversu heitt var 1998, þ.a.l. gæti verið fróðlegt að fá samanburð á fyrirbærinu.

[Halldór Björnsson (IP-tala skráð) 15.5.2009 kl. 14:43]

Svali, 

Tímaröð sem sýnir styrk El Nino frá miðri síðustu öld má finna á

http://www.cdc.noaa.gov/enso/enso.current.html#indices

Árið 1998 var óvenjustór El Nino.

Raðir sem ná enn lengra aftur ("forn El Nino") eru til (sjá t.d.

http://www.ncdc.noaa.gov/paleo/pubs/tudhope2001/tudhope.html)

 en  þær raðir eru ekki alveg sambærilegar við mæligögn frá síðustu öld.

Halldór

[Einar Sveinbjörnsson, 16.5.2009 kl. 16:11]

Þakka réttmæta ábendingu Höskuldur (Sápuboxið).  Textinn nú leiðréttur.