Dægursveifla

Síðustu dagar hafa verið upplagðir til nánari skoðunar á dægursveiflum í veðrinu.  Hér er horft nánar á veðurstöðina Torfur í Eyjafjarðarsveit, en Torfur eru með fremstu bæjum í Eyjafirði og er "inn til landsins" eins og kallað er.  Næturfrost á vorin og haustin eru þarna tíð og að sama skapi getur orðir vel hlýtt á góðum sumardögum.  Vindar eru oftast hæglátir og vindátt ýmist inn (norðan) eða út (sunnan) fjörðinn.

Síðustu daga hefur dægursveifla hitans verið þónokkur.  Hitinn farið í um 15°C yfir hádaginn, þrátt fyrir hafgoluna og í heiðríkjunni kólna niður undir eða niður fyrir frostmark. Dægursveiflan í rakastigi kemur einnig vel fram, en í öfugu hlutfalli við hitann. Rakastigið er hátt á nóttinni, en lágt á daginn.  Daggarmarkið (bláa línan á efra ritinu) er hins vegar varðveitt stærð og sveiflast ekki með hitastiginu líkt og rakaprósentan.   Daggarmarkið segir því meiri sögu um raunverulegt rakainnihald loftsins.

Hér er vindáttin ekki sýnd.  Lengst af síðustu daga hefur verið N-átt, allt að 8 m/s í hafgolunni miðdegis, en um og innan við 2 m/s um lágnættið. 

Athugasemdir

[Emil Hannes Valgeirsson, 21.5.2009 kl. 12:14]

Þær eru oft athyglisverðar þessar myndir sem hægt er að sjá á veðurstofuvefnum. Þarna má t.d. sjá að aðfaranótt 21. hefur væntanlega verið þoka á tímabili þegar rauða og bláa línan ná saman á efri myndinni, enda fer rakastigið á sama tíma upp í 100 á neðri myndinni. Rakastigið fer að sjálfsögðu aldrei yfir hundrað enda getur blái ferillinn á efri myndinni aldrei farið upp fyrir þann rauða.

[Sigurður Þór Guðjónsson, 21.5.2009 kl. 13:59]

Á Þingvöllum hefur dægursveiflan síðustu daga verið enn þá stórkostlegri en á Torfum.

[Valdimar Gunnarsson (IP-tala skráð) 21.5.2009 kl. 16:26]

Þótt það komi veðrinu ekki beinlínis við eru Torfur svo sem miðja vegu milli fjarðarbotns (Akureyri) og fremsta (innsta) bæjar, Hólsgerðis.

En Torfur eru á marflötum dalbotninum og varla nema í 20-25 metra hæð yfir sjávarmáli.

[Páll A. Þorgeirsson (IP-tala skráð) 21.5.2009 kl. 16:49]

Gætir hafgolu eitthvað að ráði við Torfur.  Ég spyr þrátt fyrir að hafa búið á Akureyri í áratugi.  Mér finnst eins og hafgolan detti yfirleitt snarlega niður ef keyrt er fram Eyjafjörðinn.  Jafnvel finn ég töluvert mikinn mun á "bæjarhlutum" á Akureyri þó kannski ótrúlegt sé.  Það er kannski lítið að marka hitamælinguna við lögreglustöðina sem fær hafgoluna beint í fangið enda sennilega einn opnasti staðurinn fyrir hafáttinni á Akureyri.  Ég hef líka verið í ótrúlegum hitapolli þarna fremra.  Á þessari stundu, efst á brekkunni, eru 10,5 gráður í skugga og hafátt, logn og aðeins farið að rofa til.  Það eru aðeins sunnanvindar í hærri skýjabólstrum og greinilega stutt í sólarglennu.  Ósköp þægilegt veður en ekki mjög fagmannleg lýsing hjá mér.   Rétt í þessu renndu sér sólargeislar niður í gegnum nokkur göt.

[Sigurður Grétar Guðmundsson, 21.5.2009 kl. 18:02]

Dr. Fred Goldberg heldur erindi í Háskóla Íslands föstud. 29. maí kl. 11:00 um loftslagsmál. Erindindið nefnir hann "Er það CO2 eða sólin og hafstraumarnir sem stýra loftslaginu?"  (Är det CO2 eller solen og havsströmmarna som styr vor klima?) Vonandi kemur þú og hlustar á þennan sænska vísindamann og jafnvel hnippir í aðra og lætur þá vita af þessum.

[Einar Sveinbjörnsson, 22.5.2009 kl. 08:36]

Það á stóran þátt í tíðum næturfrostum á Torfum, hvað mælirinn er staðsettur á miklu flatlendi, eins og Valdimar bendir réttilega á.  Hafgolu gæri vissulega á Torfum og reyndar á sólríkum og hlýjum dögum fram allan Eyjafjörð.  Þetta sást t.a.m. sl. miðvikudag (20. maí).  Þá voru N 5m/s á Akureyri (sjálfvirka stöðin við Krossanesveg), en NA 8 Torfum.  Engin vindur var í lofti (sjá veðurkort), þ.e. ekki nein sérstök vindátt sem alla jafn ruglar pælingar um styrk og mátt hafgolunnar.  Hitinn var 11 stig á Akureyri kl. 15 en 14 á Torfum.  Svala loftið af hafi hlýnar fljótt á ferðasinni yfir landið.  En hafgola er það engu að síður.

ESv 

[Valdimar Gunnarsson (IP-tala skráð) 22.5.2009 kl. 12:43]

Ég minnist þess að í æsku minni (fyrir h.u.b. 50 árum) varð mjög vart við þegar hafgola kom fram í fjörðinn á góðviðrisdögum, þá kom nefnilega Krossanesfýla, sem svo var kölluð. Þetta gerðist yfirleitt á milli hádegis og síðdegiskaffis, missnemma eftir veðri.

Ég ólst upp litlu norðar en Torfur eru, reyndar hinum megin ár og nokkru hærra.