Veðrabrigði til hins betra

Þar kom að því að norðannæðingurinn léti undan og það hlýnaði í lofti.  Það mátti sjá strax í gærmorgun (fimmtudag) breiðu af fíngerðum hnoðrum hátt á lofti, en slík ský, ýmist netjuský eða maríutása, eru gjarnan fylgifiskur hlýinda.  Enda fór það svo að síðdegis var hitinn á landinu víða um og yfir 10°C.  Hæstur fór hann í 13,8°C í Skaftafelli að þessu sinni. Breytingin til batnaðar var sums staðar mikil á skömmum tíma, en línuritið sem fylgir hér með sýnir hvernig hitinn steig frá rúmu frostmarki á Reykjum í Hrútafirði um morguninn upp í rúmar 10°C um miðjan daginn samfara sunnanáttinni þar.  Hlýindin á landinu voru ágætlega fyrirséð strax um síðustu helgi, en þau voru þó heldur fyrr á ferðinni en í fyrstu var spáð. 

Sjálfur fylltist ég eins og margir landsmenn mikilli vorkæti og í tilefni dagsins dreif ég mig út í garð með vel spíraðar rauðar matarkartöflur úr búrskápnum og setti eins og 10 slíkar niður í mold í litlu garðshorni.  Held að ég hafi aldrei fyrr sett niður kartöflur þetta snemma eða 27. apríl.  Enda fyrst og fremst til fróðleiks gert.  Innst inni veit ég að það á eftir kólna verulega frá því sem það var í dag og jafnvel frysta, en engu að síður verður áhugavert að sjá hvernig tiltekst.

Í dag föstudag er útlit fyrir svipuð  í dag á landinu, en hitastigið fer lækkandi á laugardag og það lítur síðan út fyrir norðanátt af einhverjum toga á sunnudag, síðasta dag aprílmánaðar.  

Heldur virðst hann því ætla að verða skammvinnur þessi fyrsti ymur vorsins.  

Athugasemdir

[Sigurður G. Tómasson, 29.4.2006 kl. 12:22]

Sæll Einar!

Það er kannski ekki við því að búast að við taki samfelld hlýindi í apríl en ósköp hefur hann verið napur og leiðinlegur í þetta sinn. Maður vonar bara að það komi ekkert hart kuldakast núna í maí. Eins og nú horfir er gróður kominn afar stutt á veg, amk. þessi íslenski. En þrátt fyrir allt hefur þetta ekki verið harður vetur. T.a.am. er ekki mikið frost í jörð, þar sem ég hef skoðað. Að vísu heldur meira en sum árin frá árinu 2000. Nú í vetur var þriðji veturinn í röð sem ís festir ekki á Þingvallavatni. Það var afar fátítt alla síðustu öld. Þá er mér líka minnisstætt, að sumarið 2000 fékk ég son minn til þess að mynda allan fjallahringinn í sveitinni, því þá blasti við mér sjón sem ég hafði aldrei séð fyrstu 50 ár ævi minnar: Hvergi sá í skafl. Að vísu var enn snjór norðvestan í Skriðu en það sést ekki neðan úr sveit. En svo komu mörg svona ár í röð. En hvernig var síðasta ár í samanburðinum?

[Einar Sveinbjörnsson, 30.4.2006 kl. 13:17]

Sæll Sigurður !

Það er rétt að síðsutu ár og einkum 2003 og 2004 voru hlý. Þau einkenndust sérstaklega af því að sumurin voru löng og það haustaði seint. Síðasta ár sló þó nokkuð á mestu frávikin. Þá var maí kaldari en í meðalári og það voraði því seint. Sumarið þótti stutt, þó vænt hafi verið um tíma, en því lauk um og upp úr 20. ágúst. Það er fjórum til fimm vikum fyrr t.a.m. 2003. Þessir þættir allir ásamt snjófirningum frá vetrinum hafa áhrif á það hvað skaflar haldast lengi í giljum og skálum til fjalla. Síðasti vetur, þ.e. 2004-2005 var hins vegar afar snjóléttur og hafði mest áhrif á firningar til fjalla um sumarið.

ESv