Uppdráttarsýki úrkomunnar

Í gær fimmtudag voru eindregin teikn á lofti þess efnis að úrkomuskil færu yfir landið frá vestri til austurs seint á laugardag og aðfararnótt sunnudags.  Enn virðist það standa að skilin fari yfir á umræddu tímabili, en svo er að sjá sem uppdráttarsýki sé hlaupin í sjálfa úrkomuna sem þeim fylgir.

Stundum sér maður að sumrinu að þegar grunnar lægðir eru hér við land eftir að þurrt hefur verið um skeið er eins og úrkoman þorni einhvern vegin upp og heldur lítið verði úr hlutunum.  Svo er að sjá sem  eitthvað slíkt sé í gangi.  Það er eins og skilin slitni í sundur, úrkoma fellur frá þeim norðarlega á Grænlandssundi  (við Grænland) og síðan langt fyrir sunnan landið eins og meðfylgjandi spákort af Brunni VÍ sýnir (HIRLAM 20. jún kl. 15 t+33 ).

Því eru talsverð líkindi á því að rigningarspáin frá því í gær sé á leið í vaskinn og er það vel ef svo færi. Auðvitað bleytir eitthvað, en það verður þá minnháttar miðað við forsendur gærdagsins. 

Athugasemdir

[Rafn Haraldur Sigurðsson (IP-tala skráð) 20.6.2009 kl. 14:25]

Fínt mál, hún má þorna upp mín vegna eða slitna í sundur. Það er náttúrulega ágætt ef hann rignir á nóttunni. Gott fyrir gróðurinn og maðkatínslumennina, en svo á bara að þorna upp yfir daginn. 

Flottar spár hjá þér.

kveðja Rafn.

[Guðjón (IP-tala skráð) 20.6.2009 kl. 19:02]

Nauðsynlegt að það rigni hressilega sem fyrst.  Það er orðið allt of þurrt og gróður sums staðar að skemmast á Suðurlandi.

[Þorkell Guðbrands (IP-tala skráð) 22.6.2009 kl. 07:53]

Svolítil úrkoma var hér úr kaldri norðanáttinni fyrir helgi, en þegar hún gekk niður, þá kom reikningurinn í formi frosts. Þótt lítið væri, þá nægði það til þess að stórsá á kartöflugrösum í garðinum okkar. Oggulitlar skúrir gerði svo aðfararnótt sunnudagsins og þær bættu talsvert úr rakaskortinum, sem var orðinn til mikils skaða fyrir allan gróður. Ansi margir bændur byrjuðu að slá í gær og reyndar einhverjir á laugardaginn, þrátt fyrir spá um rigningu. Síður á ég von á að nokkur byrji slátt í dag, satt best að segja þekki ég ekki nokkurn bónda sem myndi byrja slátt á mánudegi!