20,5°C á Hjarðarlandi - kom að því !

Þá gerðist það loks að hámarkshitinn næði 20°C á einhverri stöðinni þetta sumarið og kominn 26. júní. Á Hjarðalandi í Biskupstungum mældust 20,5°C á sjálfvirka hitanemanum.  Þar er einnig kvikasilfursmælir til hámarksmælinga, en mér er ekki kunnugt um hvaða gildi hann náði í dag, föstudag. Sennilega hefur gildi hans verið nokkrum brotagráðum lægra, en sjálfvirku mælarnir eru heldur kvikari og líklegri til að ná augnbliks "hitastrókum".  

Fyrsta dagsetning með þessu markgildi hámarkshita að sumri hefur ekki orðið þetta seint (26. júní) á landinu öllu í um 15 ár.  

Efst á listanum trónir reyndar Bjarnarey, en hún er staðsett við norðanverða Héraðsflóa. Þessi tala er einfaldalega röng einhverra hluta vegna og leikur ekki á því nokkur vafi.

Heldur er loftið enn að hlýna yfir landinu.  Vindur er mjög hægur og því víða hafgola.  Veðurstofan spáir hitanum allt að 20 stigum í innsveitum. Næstu daga munum við vafalítið sjá tölur víðar allt að 20-22°C.

Athugasemdir

[Þór Ludwig Stiefel TORA, 27.6.2009 kl. 00:36]

Ég var greinilega ekki svo fjarri lagi þegar ég veðjaði á Þingvellina :)

[Sigurður Þór Guðjónsson, 27.6.2009 kl. 00:53]

Kvikasilfrið á Hjarðarlandi mældi 19,6. Mér finnst eiginlega ekki hægt að taka mark á 20 stig hita sjálfvirkrar stöðvar þegar  kvikasilfurmælir á sömu stöð mælir ekki 20 stig. Setjum svo að á Teigarhorni mældist 31 stigs hiti á sjálfvirkri stöð en kvikasilfrið mældi 30. Gamla Íslandsmetið þar er 30,5  Ætti þá að segja að nýtt Íslendshitamet hafi verið slegið? Mér finnst hins vegar í lagi að taka mark á sjálfvirkum stöðum þar sem ekkert kvikasilfur er. 

[Einar Sveinbjörnsson, 27.6.2009 kl. 11:06]

Ég verð að vera sammála Sigurði Þór í því sjónarmiði að hér verður að horfa til kvikasilfursmælisins, ekki síst þar sem hann er á sama stað.  Í raun og sanni má því segja ef horft er til samanburðar við fyrri ár að þá hafi hitinn ekki náð 20 stigum í gær.

Hún var þokkaleg fréttin um Bjarnarey hér í morgun.  Villur sem þessar koma upp og rata beint inn á listana. Svipað var á Stórhöfða í vikunni, en þá var sagt að hæsta mæling hefði farið í rúm 19 stig á meðan hitinn var í raun í þetta 10 til 11 stigum eða á réttu róli Stórhöfðans á þessum árstíma. 

Held nú norður á Hornstrandir þar sem ég mun væntanlega kynnast flestum  kenjum og dyntum þokunnar ef spá um hægan A- og NA-vind gengur eftir.  Veðurbloggið verður því í fríi næstu dagana.

ESv

[Pálmi Freyr Óskarsson, 27.6.2009 kl. 16:21]

Hitamælirinn sjálfvirki á Stórhöfða á það til fá hitakast nákvæmlega 19,0°C, og svo fær  hann líka kuldakast, nákvæmlega 1,0°C. Bagalegur galli fyrir auðtrúa almenning, eins og fjölmiðlamanni mbl.is.

Einar! er ekki 19,5°C 20 stiga hiti? Allavega hefur það verið í okkar veður"kokka"bókum frá V.Í.

[Gunnar (IP-tala skráð) 27.6.2009 kl. 23:41]

Það er 9 stiga hiti fyrir norðan. Hvernig getið þið eiginlega verið að spáð hitabylgju í norðanátt og kulda?

[Sigurður Þór Guðjónsson, 28.6.2009 kl. 00:07]

Það var yfir 22 stiga hiti á Hólsfjöllum og við Mývatn sem er fyrir norðan. Norðurland er stórt svæði og svo kólnar á kvöldin. En víða við sjóinn í dag var ekki hlýtt fyrir norðan vegna hafgolu. Svona ástand er algengt. 

[Sigurður Þór Guðjónsson, 28.6.2009 kl. 00:11]

Það var um 22 stiga hiti.

[Þorkell Guðbrands (IP-tala skráð) 28.6.2009 kl. 18:09]

Í huga flestra Íslendinga er "fyrir norðan" fyrst og fremst Akureyri. Snæfellingurinn ég lenti í að búa á svæðinu vestan Tröllaskaga, (sem sumir kalla svo) og á því svæði er loftslag og veðurfar ansi mikið frábrugðið Eyjafirði, innanverðum a.m.k. Landfræðilega telst þetta svæði til Norðurlands, en reynslubanki Veðurstofu hefur leitt í ljós að sá landshluti sem landafræðin kallar Norðurland, er a.m.k. tvö spásvæði. Núna um þessa helgi hefur verið fremur svalt þokuloft á Húnaflóasvæðinu, sem líka mætti kalla þetta landssvæði. Helst hefur það verið í veðursælustu blettum á svæðinu, svo sem Vatnsdalnum og innanverðri Blönduhlíð, sem létt hefur í lofti um miðjan daginn. Mývatnssveit og Hólsfjöll eru svo oft með ansi mikið öðruvísi veður en t.d. er á Húsavík og í Aðaldal, en það stafar trúlega að hluta til a.m.k. af því að þetta svæði liggur nokkuð hátt miðað við önnur byggð ból á landinu. Rakaþétting sú, sem verður yfir sjónum í kyrrviðri eins og núna ríkir, nær því lítt eða ekki þangað. - En hvað um það, við óskum Einari Sveinbjörnssyni góðrar skemmtunar og fróðlegs veðurfars í gönguferð hans um Hornstrandir. Við fastalesendur bloggsíðu hans munum sakna vinar í stað á meðan, en þess glaðari verðum við þegar einar kemur til baka.

[Sigurður Þór Guðjónsson, 28.6.2009 kl. 18:40]

Ég þarf auðvitað ekki að svara fyrir veðurspámenn en í viðkomandi spá var skýrt tekið fram að hafgola myndi leita inn á land. Allir vita hvað þá gerist þó loftið sé hlýtt yfir landinu í eðli sínu. Það var ekkert í viðkomandi spá sem hægt er að segja að hafi brugðist.

[Áskell Örn Kárason (IP-tala skráð) 28.6.2009 kl. 19:27]

Maður sá það eiginlega úr flugvél að spár um ofurhita um miðbik Norðurlands myndu tæplega ganga eftir.  Það er eitthvað í spálíkönunum sem vanmetur áhrif hafgolunnar hér í Eyjafirði og S-Þingeyjarsýslu. Eg flakkaði nokkuð milli Akureyrar og Lauga um helgina og það var segin saga að mælirinn í bílnum sýndi alltaf hlýjast í Fnjóskadalnum. Í dag um 5-leytið sýndi mælirinn 18°C í Fnjóskadal, en 12°C þegar komið var vestur yfir Víkuskarð; við Garðsá.

[Sigurður Þór Guðjónsson, 28.6.2009 kl. 20:46]

Mikið væri gaman að fá veðurstöð á Laugum.

[Jóhann Grétar Kröyer Gizurarson (IP-tala skráð) 28.6.2009 kl. 22:33]

Kominn heim sólbrenndur úr Atlavíkinni (Hallormsstaðaskógi). Mikið svakalega hefur verið gott veður um helgina. Á tímabili lá ég í skugga (enginn hafgola til að kæla)

[Áskell Örn Kárason (IP-tala skráð) 29.6.2009 kl. 09:53]

Tek undir þetta hjá SÞG um veðurstöð á Laugum. Dalbotninn er þar í um 40m hæð yfir sjávarmáli, nokkuð langt frá sjó. Mætti segja mér að Laugar gætu verið með hitavænni stöðum á Norðurlandi, ef mælt væri.