Veðurútlit helgina 3. til 5. júlí

Helgarspá Veðurvaktarinnar

 

Ekki að sjá annað en að áfram verði nokkuð hlýtt á landinu, sérstaklega vestan- og norðantil, en vætusamara en verið hefur í vikunni.

Föstudagur 3. júlí:
Sérlega blítt verður um suðvestanvert landið, sól með köflum og hitinn 16 til 22 stig.  Ekki ólíklega gæti hiti komist í 20°C í Reykjavík þar sem vindáttin er heldur austanstæð. Húsafell, Hjarðarland eða Þingvellir líklegir staður með hámarkshita dagsins  Vindur meira norðaustanstæður á Vestfjörðum og á Norðurlandi.  Þar skýjað og sums staðar súld.  Hiti vart hærri en 10 til 12°C.  Austanlands nálgast hitaskil úr austri og þar dálítil rigning eða súld og þegar líður á daginn. Meinlítið og milt veður suðaustanlands, en væta þar í kvöld og nótt. 

Laugardagur 4. júlí:
Það virðist heldur vera að draga úr úrkomuhorfum fyrir daginn Á Vestfjörðum og við Breiðafjörð verður þó  dálítil rigning í fyrramálið, en norðanlands léttir til með SA-þey. Hitinn þar allt að 18 til 20 stigum. Þokuloft verður við sjávarsíðuna austanlands, en þar úrkomulaust að mestu.  Bjartara og hlýrra strax uppi á Héraði. Um sunnanvert landið að mestu skýjað og hiti 14 til 19 stig.  Sums staðar væta um tíma undir kvöldið.  Austlæg vindátt á landinu, víða um 5 m/s, en 10 við Breiðafjörð og eins allra syðst á landinu.  Nóttin verður mild og ljúf víðast hvar.

Sunnudagur 5. júlí:
Vel hlýtt loft verður yfir landinu þennan dag ef spáin gengur eftir.  Úrkomubakki verður viðloðandi suðurströndina og því dálítil rigning annað veifið sunnan- og suðvestanlands, en annars úrkomulaust að heita má á landinu. Norðan- og norðaustanlands er útlit fyrir að vindur standi af landi (SA) og þar verður bjart að mestu og hlýtt, hiti allt að 20 til 24 stig þar sem best lætur.  Þokuloft þó áfram frá Langanesi að telja suður undir Lón.

Einar Sveinbjörnsson

Athugasemdir

[Haraldur Þ. Guðmundsson (IP-tala skráð) 3.7.2009 kl. 11:35]

Ágæti Einar.

 Það hefur vissulega verið hlýtt og milt í sumar, og veður frekar stillt, en lítil hefur verið sólin. 

Hvað valdur þessari veðráttu og skýjafari?  Er þetta ekki orðið frekar sólarlítið sumar?  Skandinavar og Bretar hafa baðað sig í sólskini undanfarnar vikur.  En hvað með okkur?

[Sigurður Þór Guðjónsson, 3.7.2009 kl. 12:06]

Tek undir þessar vangaveltur Haraldar um sólarleysið. Sólskinsstundir voru að vísu yfir meðallagi yfir allan mánuðinn bæði í Reykjavík og á Akureyri en það er þetta sólarleysið á suðvesturandi og víða um land eftir að hlýindin byrjuðu. Skýjafar hefur sveipað landið meira og minna sést á Modis-myndunum. Í morgun var sól í Reykjavík en nú sýnist mér vera aukast ský þar þó hitinn sé kominn í 17 stig.

[steina (IP-tala skráð) 3.7.2009 kl. 15:27]

Þú ættir nú að vita betur en að blanda saman landshlutum sem eiga ekkert sameiginlegt veðurfar, sunnanverðir Vestfirðir og norðanverðir vestfirðir deila ekki veðri, á sunnanverðum vestfjörðum er logn, sól og hiti.

[Skellur (IP-tala skráð) 3.7.2009 kl. 16:40]

jamm. Það er nú svo. En við norðlendingar þökkum forsjóninni fyrir hið hægláta veður. Smá hafgola af og til, en júní var sérlega góðviðrasamur að mér fannst, þótt hitar væru ekki miklir.