Veður á Vestfjörðum

Áhugaverð athugasemd um veður á Vestfjörðum kom frá Steinu í gær.  Hún bendir á þann mun sem réttilega getur verið á veðri á sunnanverðum og norðanverðum Vestfjörðum.  Það rættist mjög úr veðrinu  fyrir vestan í gær og spá mín var kannski óþarflega dökk.  Horfði um of til veðursins eins og það var kl. 06 í gærmorgun og spá um skýjahulu. Frá Djúpi og suður um á Barðaströnd var hins vegar hið besta veður þegar kom fram á  daginn, skýjað með köflum og allt að 20 stig inni á fjörðunum.

Skiptingin norðanverðir og sunnanverðir Vestfirðir er hins vegar alls ekki heppileg að sumarlagi.  Hún gengur hins vegar ágætlega upp að vetrarlagi, einkum í hinni ríkjandi norðaustanátt. Þá er skiptingin um Barðann á milli Önundarfjarðar og Dýrafjarðar.  Á sumrin er innlögnin í stóru hlutverki og því svipað veður um alla Vestfirði.  Þá skiptir meiru hvort verið sé við utantil eða inni í fjarðarbotni.

Annars er hugtakið Vestfirðir almennt séð til vandræða, í það minnsta þegar kemur að veðri. Í daglegu tali teljast Patreksfjörður, Tálknafjörður og Arnarfjörður til suðurfjarða.  Spásvæðið Breiðafjörður nær hins vegar til Kópanes við utanverðan Arnarfjörð.  Sjálfur tel ég Barðströndina- Múla- og  Reykhólasveit til Breiðafjarðar en ekki Vestfjarða.  Síðan eru það Strandir.  Þær eru á Vestfjarðakjálkanum.  Á meðan þessi texti er skrifaður er sent út frá Hólmavík á Rás 2 í tilefni hamingjudag þar.  Ferðamálfulltrúi talar stöðugt um "hér á Vestfjörðum" og á við Strandir og væntanlega allan Vestfjarðakjálkann.   

Athugasemdir

[Dagný (IP-tala skráð) 4.7.2009 kl. 10:30]

Innlögnin er ekki alveg eins um alla Vestfirði, hennar gætir oft ekki mikið t.d. í fjörðunum við Ísafjarðardjúp.

[Sigurður Þór Guðjónsson, 4.7.2009 kl. 12:24]

Ég myndi nú segja að líkurnar á hlýjum sumardögum væru meiri á fjörðunum fyrir sunnan Ísafjarðardjúp en í Djúpinu sjalfu, alveg frá Suðureyri til Dýrafjarðar.

[Magnús Bjarnason (IP-tala skráð) 5.7.2009 kl. 00:45]

Já það er mikill munur á veðri á vestfjörðum, í raun nokkur svæði. Strandi að Steingrímsfjarðarheiði, djúpið, suðurfirðir að arnarfirði. suðurfirðir frá arnarfirði og breiðafjörður. En það sem mest í taugarnar er þegar veðurfréttamenn segja "veður verður verst á vestfjörðum", þegar veður er síðan ekki verst á vestfjörðum þá er ekki minnst á það hvar versta veðrið verður.  Þetta á sérstaklega við um vetratíman reyndar og veðurfréttamenn stöðvar 2.