Lítill grænn blettur verður að rigningarspá !!

Í dag mánudag tók ég eftir því að í þeirri einföldu spá sem birtist á forsíðu Veðurstofunnar var gert ráð fyrir rigningu nærri hádegi í Reykjavík, Hæli í Hreppum og á Stórhöfða eins og sést á meðfylgjandi spákorti.  Líti maður snöggt á kortið og leitar engra annarra upplýsinga má segja sem svo að samkvæmt því muni rigna um suðvestanvert landið, en þurrt verði annars staðar.

Að sumarlagi eru þessar einföldu spár spár VÍ oft of "blautar" og hef ég áður bent á þá meinbugi.  Enda kom það á daginn að á Hæli hefur verið þurrt í allan dag, sama á Stórhöfða, en í morgun nokkru fyrir hádegi varð vart nokkurra dropa í Reykjavík.  Annars hefur hann hangið þurr og glitt í sólina stund og stund. Athuganakort fyrir sama tíma, þ.e. kl.12 fylgir hér með til hægri.

 

Úrkomuspákort frá HIRLAM frá því í morgun, sýnir lítinn grænan blett, þ.e. úrkomu yfir sunnanverðu landinu, en raunverulega samfelld rigning er langt suðvestur í hafi. Nú eru ekki bein tengsl  á milli forsíðuspár  VÍ og úrkomukortsins, en ég veit til þess að þessar sjálfvirku spár Veðurstofunnar eru allt að því ofurnæmar á vott af úrkomu.  Ofan á það bætist síðan að skil og úrkomubakkar sem koma fram á spákortum eiga það frekar til að þorna og verða minni en efni standa til yfir sumarið og þar virðist sem áhrif sólarinnar á landi séu vanmetin í útreikningum hér á okkar eyju úti í Atlantshafi.  Sérstaklega virðist þessi þáttur koma fram þegar loftið er ekki óstöðugt, þ.e. ekki sérlega hætt við síðdegisskúrum. 

Það á að vera auðvelt að laga forsíðuspár Veðurstofunnar, en þá þarf veðurfræðingurinn á vakt að komast með puttana sjálfvirkt reiknað  skýja- og veðurtáknið áður en spáin er birt.  Hita- og vindaspáin er oftast af talsvert meiri gæðum, enda vinnur þar Kalmansía að leiðréttingu fyrir viðkomaandi stöð.  

 

Athugasemdir

[Pálmi Freyr Óskarsson, 6.7.2009 kl. 18:21]

Samkvæmt mínum veðurkokkabókum þýðir ský, sólarglitta og regndropar skúr enn ekki rigning http://www.vedur.is/vedur/frodleikur/greinar/nr/748. Enn í gamla daga var það þríhyrningur (á "hvolfi").

[Þorkell Guðbrands (IP-tala skráð) 7.7.2009 kl. 04:39]

Það er afskaplega mikil tregða í veðurfari yfir sumarið. Núna lagðist veðráttan í N-lægar og sérstaklega NA-lægar áttir um sólstöður og þá eru líkur á að það haldist út júlí a.m.k., enda benda langtímaspár til þess. Þetta hlýja tímabil, sem staðið hefur nú um hríð, virðist eiga að fjara út núna um næstu helgi og fara að verða votara og svalara um norðan- og norðaustanvert landið. Þá ætti hinsvegar að verða bjartara um sunnan og suðvestanvert landið, og það er jú þar sem stærstur hluti þjóðarinnar býr og það skiptir því mestu máli.