Veðurútlit helgina 10.-12. júlí

Helgarspá Veðurvaktarinnar

 

Útkomulaust að heita má á landinu um helgina og áfram hægviðrasamt. Sums staðar á landinu virðas vera afar góðir sumardagar í vændum.

Föstudagur 10. júlí:
Þokubakkar verða viðloðandi norður- og austurströndina, en annars er ekki annað að sjá en að víðast verði bjartviðri, enda miðju háþrýstisvæðis spáð svo að segja yfir landinu.  Engin sérstök vindátt, en þó örlítið austlægur ef eitthvað er. Víða hafgola og þar sem hún nær sér á strik verður ekkert sérlega hlýtt yfir miðjan daginn, en til landsins má gera ráð fyrir allt að 17-20 stiga hita. Sérstaklega verður víða hlýtt á hálendinu og því talsverð jökulbráð. 

Laugardagur 11. júlí:
Svipað veður áfram en þó lítið eitt ákveðnari austanátt.  allt að því heiðríkja víða um landið og ljúft og blítt sumarveður á landinu.  Svöl þokan seilist þó inn á flóa og víkur norðanlands og austan.  Ekki gott að segja hve langt hún nær til landsins. Hitinn gæti hæglega farið ansi víða  um og yfir 20 stig yfir miðjan daginn á Vesturlandi, Vestfjörðum og eins á Suðurlandi. Suðaustanlands eru meiri líkur á hafgolu og jafnvel heldur skýjaðra veðri, þó er það alls ekkert víst.  Í Höfuðborginni gæti meira að segja A-áttin haldið hafgolunni í skefjum og þar orðið hlýrra en oftast áður það sem af er sumri. 

Sunnudagur 12. júlí:
Miðja hæðarinnar nálgast Grænland og loft verður meira upprunið úr norðri.  Yfir landinu situr þó enn um sinni vel milt loft, einkum sunnan- og vestantil.  Þar áfram sama sumarið, en heldur verður svalara eða 7 til 11 stiga hiti víðast norðanlands og austan.  Eins kólnar nokkuð á norðurhálendinu.  Þrátt fyrir vindáttina er þó enn spáð þurru svona víðast hvar norðan- og norðaustantil.

Einar Sveinbjörnsson

Athugasemdir

[Sigurður Sigurðsson, 9.7.2009 kl. 15:08]

Sæll Einar og takk fyrir góðar greinar um veðrið.

Ég var að velta því fyrir mér hvort þú gætir spáð aðeins lengra fram í tímann - er að fara í bústað í viku þann 17. júlí og er orðinn afar spenntur yfir veðráttunni þá ??

[Pálmi Freyr Óskarsson, 9.7.2009 kl. 16:18]

SISI: Farðu á yr.no (vefur norsku Veðurstofurnar) og skrifaðu staðsetningu bústaðarins inn í leitarkassann "værsök".  Þá geturðu sé veðurspánna svo langt fram í tímann (eða á norsku "langtidsvarsel"). Enn athugaðu að veðurspár eru ekki staðreyndir, heldur aðeins vísbending um veðurfar.

[Sigurður Sigurðsson, 10.7.2009 kl. 11:06]

Þakka þér Pálmi, gott að vita af þessu.  Jú auðvitað eru þetta allt vísbendingar, en þær líta vel út eins og er.