Veðurútlin helgina 17. til 19. júlí

Helgarspá Veðurvaktarinnar

 

 

Svo er að sjá að góðviðri verði á landinu enn eina helgina.  Úrkomulaust á mestu og víða sólskin, helst skýjað austanlands. 

Föstudagur 17. júlí:
Léttskýjað um vestanvert landið, en NA-átt, gola eða 5-7 m/s við Breiðafjörð og eins við Húnaflóa. Hafgola um landið suðvestanvert og líkur á stöku síðdegisskúrum, einkum á Suðurlandi.  Skýjað verður að mestu suðaustanlands, en að öllum líkindum þurrt.  Norðan- og norðaustanlands verður hægur vindur af hafi, bjart til landsins en ekki sérlega hlýtt.  Sums staðar þoka við sjóinn.  Hitinn sunnanlands og vestan allt að 17 til 18 stig yfir daginn.  

Laugardagur 18. júlí:
Miðja hæðar verður fyrir norðan land og hér kular því aðeins af austri.  Vindur þó afar hægur og víða hafgola.  Öll úrkomusvæði sem eitthvað kveður að víðsfjarri og tiltölulega milt í veðri.  Léttskýjað um mest alt land.  Þó meira skýjað með ströndinni suðaustanlands.  Það er þó ekkert víst að svo verði.  Eins er það með þokuna austan- og norðaustanlands.  Ekki er gott að spá því hversu ágeng hún verður.  Hitinn allt að 20 stigum í innsveitum þar sem friður verður fyrir hafgolunni.  Kólnar nokkuð niðri við jörð í næturhúminu þar sem bjart er og stillt. 

Sunnudagur 19. júlí:
Svipað veður og engar markverðar breytingar.  Helst að það verði heldur meira skýjað á landinu, en það léttvæg ský og laus við alla úrkomu. 

Einar Sveinbjörnsson

Athugasemdir

[Sigurður Þór Guðjónsson, 19.7.2009 kl. 15:52]

Ég var að vona að þú gæfir einhverjar skýringar á þrumuveðrinu sem gekk yfir suðurland í gær.