Ógurleg veðurblíða SV-lands

Þegar þetta er ritað um miðjan dag er veðurblíðan mest suðvestanlands.  Í lofti er dálítil NA-átt og gola bæði í Borgarfirði og á Suðurlandi.  Á höfuðborgarsvæðinu er hins vegar sæmilegt og staðbundið skjól í þessari vindátt, en þó nægjanlegur vindur til þess að halda aftur af hafgolu að ráði.

21°C var kl. þrjú á Reykjavíkurflugvelli og hæstur hefur hitinn orðið 23°C uppi á Hólmsheiði, þar sem kannski stendur  til að byggja fangelsi !

Sakna enn mælinga frá Þingvöllum.  Þaðan er ekkert af hafa eftir að símstöðin gamla í Valhöll brann.  Engin gögn eiga hins vegar að tapast á meðan er verið að koma á símasambandi við veðurathugunarstöðina. Tölur þaðan koma bara síðar.  En þetta er einmitt svona dagur sem gefur molluhita á Þingvöllum. 

Athugasemdir

[Gunnar Magnús Þorkelsson (IP-tala skráð) 20.7.2009 kl. 16:11]

Sá í spákortum að þetta sé að breytast frá og með næstu helgi er við tekur regntíð.  Akkúrat helgina sem ég er að fara í 3ja vikna frí.  Þar að auki er mín reynsla að ágúst er jafnan vætusamur og er um leið í raun orðin fyrsti haustmánuðurinn, þó svo að eins og einn og einn sólardagur láti á sér kræla  Hefði brugðið mér til útlanda hefði hel.... gengið ekki verið svona lélegt.  Vonandi verður þá eitthvað gott í sjónvarpinu á meðan ég er í fríinu þessa væntanlega ágústregndaga.

[Sigurbjörn Sveinsson, 20.7.2009 kl. 16:48]

Ágúst getur verið prýðilegur sérlega fyrripart. Það jafnast fátt á við hlýindin 2004 og svo var ágúst 1960 nánast allur sannkallaður sumarmánuður.

[Sigurður Þór Guðjónsson, 20.7.2009 kl. 17:09]

Ef ágúst er í raun fyrsti haustmánuðurinn væri fróðlegt að vita hver er fyrsti sumarmánuðurinn. Sannleikurinn er sá að fyrri hluti ágústmánaðar er til jafnaðar hlýrri en fyrri hluti julímánaðar og allur júní. Ágúst er sumarmánuðurinn og ekkert annað en auðvitað kólnar að jafnaði allan mánuðinn. Kuldaköst geta svo komið í öllum mánuðum.

[Sigurður Þór Guðjónsson, 20.7.2009 kl. 17:14]

Sumarmánuður á þarna að standa án greinis.