Miðsumarhret í vændum ?

Er búinn að vera að blaða í gegnum tölvukeyrslur og alveg sama hvar borið er niður, svæsinn háloftakuldapollur virðist samkvæmt spám ætla að stefna beint yfir okkur úr NNA seint á fimmtudag. Kortið sýnir staðsetningu hans skv. spá GFS kl 06 að morgni fimmtudags.

Þessari heimsókn  fylgir einhverslags N-átt með úrkomu og svo köldu lofti að það er varla að maður leggi enn trúnað á spárnar, sérstaklega í ljósi þess hvað almennt séð hlýindi hafa verið viðloðandi á landinu frá því seint í júní.

Ef spáin gengur eftir eins og hún er nú reiknuð gefur hún nokkrum af sögulegustu miðsumarhretum síðustu áratuga ekkert eftir !  Það þýðir m.a. snjókomu á norðurhálendinu og niður undir byggð víða Norðanlands.

Sem dæmi um túlkun á stöðunni birti ég hér spákort hita úr  72 klst. keyrslu HRAS frá því í nótt og gildir kl. 00 á föstudag.  Blái frostliturinn er nokkuð víðáttumikill yfir miðju landinu og rauði flekkurinn djúpt suður af landinu er +10°C svæðið ! 

En maður á svo sem eftir að sjá þetta gerast !! 

Athugasemdir

[Brynja Magnúsdóttir (IP-tala skráð) 21.7.2009 kl. 10:24]

Ef svona mikill hitamunur er geta þá ekki fylgt þessu þrumur og eldingar?

[Ásta B (IP-tala skráð) 21.7.2009 kl. 11:18]

Sæll og blessaður Einar

Ekki hljómar þetta neitt sérstaklega vel svona um hásumar, þessi kuldi. En ég skal alveg viðurkenna að ég gæti alveg þolað (og það mjög vel) nokkra góða rigningardaga

Bestu kveðjur

[Sigurður Þór Guðjónsson, 21.7.2009 kl. 12:07]

Það er algjör horror að fá þetta ofan í hlýindi hér syðra sem ríkt hafa. Og oft nær sumarið sér aldrei á strik eftir að svona kuldakast hefur komið. Hvað rigningu áhrærir má á milli muna hvort kemur rigning með sæmilega hlýrri sunannátt eða með kuldakasti af verstu sort.

[Arnar Guðmundsson, 21.7.2009 kl. 12:29]

ST´ORMERKILEGT

[Guðrún G. Fáskrúðsfirði (IP-tala skráð) 21.7.2009 kl. 12:54]

Sæll Einar 

Franskir dagar hjá okkur um helgina. Vonandi nær kuldinn ekki til okkar!

Við höfum oftast verið heppin með veður þessa helgi, þ.e. síðustu helgina í júlí, vonandi er þetta bara bilun í græjunum ;)

Kveðja að Austan. Guðrún G.

[Jóhann Grétar Kröyer Gizurarson (IP-tala skráð) 21.7.2009 kl. 15:02]

Ég ætla að leyfa mér að vera ekki eins svartsýnn og Sigurður Þór, en skv. gögnum frá wetterzentrale.de verður þetta frekar stutt hret (ef hret má kalla, veðurstofan spáir +5 til +12 C° hita kaldast norðast en hlýjast syðra, en þetta á við um kaldasta dag hretsins). Það hlýnar nú fljótt aftur og miðja næstu viku verður komin þessi blíða aftur. Ég stend við það, sjá meira hitaspánna: 

http://www.wetterzentrale.de/pics/avnpanel1.html