Féllu kartöflugrös í Þykkvabænum í nótt ?

Yfirlit næturinnar leiðir í ljós að frost hafi orðið 1,1 stig í Þykkvabæ í nótt.  Álitamál hvernig kartöflugrös hafi orðið úti í þessari gróskumiklu kartöflusveit við svo óvænt miðsumarfrost.  Uppi á Rangárvölum varð frostið heldur meira eða 1,6 stig á Hellu.  Þar var mælt í hitamælaskýli frá 1958-2004 og síðar með sjálfvirkum mæli.  Aldrei hefur fryst þar áður í júlí, lægstur hafði hitinn áður farið niður í +0,2°C, 16. júlí skítasumarið 1983. Þó mælingaaðferðirnar séu ekki alveg fyllilega sambærilegar þegar kemur að lágmarks- og hámarksmælingum má engu að síður að fullyrða á kvikasilfursmælir á sama stað hefði í nótt líka sýnt frost.

Ekki hef ég enn fregnað af snjókomu í nótt. Á Hveravöllum var hitinn um eða undir frostmarki í alla nótt og úrkomumagn 2-3 mm.  Á vefmyndvél á þaki gamla athugunarhússins mátti hins vegar ekki greina neina snjóföl kl. 09.  Vera má að snjór hafi bráðnað í sól fyrr í morgun.  Hins vegar var greinileg föl á Holtavörðuheiði á sama tíma í vefmyndavél Vegagerðarinnar þar.

Athugasemdir

[Skúli Skúlason (IP-tala skráð) 24.7.2009 kl. 12:15]

Ég veit að það skemmdust blöð á kartöflugrösum í garði rétt við Áshildarmýri neðst á skeiðum.

Kveðja Skúli Skúla

[Sindri Karl Sigurðsson, 25.7.2009 kl. 21:48]

Og á Skammbeinsstöðum í Holtum, lítillega þó enda garðurinn uppi á hól til að aftra frostskemmdum.