Veðurspár frá Finnlandi

Finnska veðurfyrirtækið Foreca í Helsinki er með ágætar spár á vef sínum fyrir allmarga staði hér á landi.  Hægt er að slá inn nöfn flestra þéttbýlisstaða og fá spár. Þessar spár Foreca hafa útlitið fram yfir yr.no að mínu mati. Myndmálið er sérlega skýrt og spárnar auðveldar í notkun. Gallarnir eru þó nokkrir m.a. sá að veðurathugun er sótt til næstu stöðvar af þeim sem sendar eru út á  alþjóðanetið.  Í sýnishorninu hér frá Breiðdalsvík er miðað við Egilsstaði sem eru nú ekki Breiðdalsvík 

 

Þegar farið er inn á vefsvæðið er ágætt að byrja á því að stilla, t.d. á íslensku, en þýðingin er ekki alveg lýtalaus.  Eins er sjálfgefinn vindhraði í km/klst, en honum er auðvelt að breyta. 10 daga táknmyndaspáin sýnir hámarks og lágmarkshita en með því að smella á ítarlegt koma fram ýmis spágildi á  3ja klst. fresti. Einhverra hluta vegna virðist orðið þoka vera nánast sjálfgefið í næturspám sé á annað borð skýjað.  Þetta telst til galla, en hins vegar er þarna áhugaverð nýjung þar sem gefnar eu upp úrkomulíkur.

 

 

 

 

 

 

 

 

 

 

 

 

 

 

 

 

 

 

 

Þó ekki sé hægt að finna um það upplýsingar á heimasíðu Foreca hvernig spárnar séu unnar má fullvíst telja að spágildin séu sótt í næsta reiknipunkt í hnattrænu líkani t.d. ECMWF eða GFS.  Þannig eru spár hjá yr.no gerðar fyrir svæði utan Skandinavíu.  Það er engin Kalmansíun eða aðrar aðgerðir sem miða að staðbundinni aðlögun.  Staðaspár Veðurstofunnar eru hins vegar flestar með þeim eiginleikum og gefa gæðum hvað varðar hita og vind a.m.k ákveðna forgjöf.  Annars hefur enginn markviss samanburður verið gerður á þessum spám og því lítið vitað um það hverjar komast næst raunveruleikanum.

Athugasemdir

[Páll (IP-tala skráð) 26.7.2009 kl. 18:51]

Þurfti að reiða mig töluvert á spár yr.no í norður - Noregi núna í júní. Ekki var áreiðanleikanum fyrir að fara, langtímaspárnar stóðust aldrei, og hending ef veðurspáin fyrir næsta dag stóðst, yfirleitt var búið að breyta spánni snemma morguns frá kvöldinu áður.

[Þorkell Guðbrands (IP-tala skráð) 26.7.2009 kl. 20:24]

Satt best að segja finnst mér að tölvuspálíkön fólksins sem stendur að belgingur.is séu bara býsna góðar fyrir okkur hér á landi. Mér skilst að þau vinni líka tölvuspákortin fyrir Veðurstofuna, en auðvitað eru textaspárn vedur.is bestar, en þær ná raunar ekki eins langt fram í tímann.

[Jóhann Grétar Kröyer (IP-tala skráð) 26.7.2009 kl. 20:34]

Spárnar frá yr.no eru hreint hörmulegar, stenst ekki nokkurn hlutur alla veganna m.t.t. Íslands.

[Ágúst H Bjarnason, 26.7.2009 kl. 23:35]

Ef ég fletti upp á Reykholti (líklega þéttbýliskjarninn í Biskupstungum, stundum nefnt Aratunga) þá kemur í ljós að athugunarstaðurinn er Reykjavík, sem er allt annað veðursvæði. Nær hefði verið að miða við Hjarðarland.