Afar þurrt um vestanvert landið

Nú verður að teljast frekar líklegt að úrkomusumman í júlí nái ekki sínu lægsta gildi í sögu mælinga í Reykjavík.  Í morgun reyndist sólarhringsúrkoma ekki vera nema 0,1 mm, þrátt fyrir vonir margra um meiri bleytu. Samanlögð úrkoma er því orðin 6,8. Minnsta júlíúrkoma til þessa í Rvk. er 13,2 mm, en svo þurrt var 1958. Í eldri mælingum sem gerðar voru um 20 ára skeið undir lok 19. aldar má finna gildi upp á 8,1 mm frá júlí 1888. 

Um vestanvert landið hefur verið sérlega þurrt það sem af er sumri.  Á Brjánslæk á Barðaströnd annast Ragnar Guðmundsson og fjölskylda hans úrkomuathuganir fyrir Veðurstofuna. Í spjalli mínu við hann sagði hann að varla hefði rignt í sinni sveit svo heitið geti síðan dagana 20.-22. júní.  Þá kom megnið af þeim 14,7 mm sem féllu í júní. Það sem af er júlí eru þetta 5,4 mm sem komið hafa á Brjánslæk. Stórsér á gróðri og tún sum orðin heiðgul af þurrki.

Ragnar segir að helst sé rigningar að vænta í sunnan- og suðvestanátt.  Vindur hefur nær ekkert verið úr þeirri áttinni.  Í austan- og norðaustanátt, leggi oft bakkana af Húnaflóanum yfir Gilsfjörð og Reykhólasveit, en þar fyrir vestan sé síðan alveg þurrt.  Í norðanátt er síðan alla jafna úrkomuskuggi á Barðaströndinni. 

Athugasemdir

[Gullvagninn (IP-tala skráð) 28.7.2009 kl. 11:29]

Einhverntíma heyrði maður að fólk skammaði veðurstofuna fyrir slæmt veður.

En nú er það opinbert - fræðslumynd á History Channel lýsir því hvernig stórveldin hafa gert tilraunir með, og geta stjórnað veðrinu með því að úða ögnum í loftið (eða ský) sem þétta raka og mynda regn, eða hita annarskonar úðaðar agnir með HAARP há og lágtíðnistöðvum (sem fyrir tilviljun, við höfum 2 stk. hér á Íslandi!).

Nánar hér:
http://gullvagninn.blog.is/blog/hin_nyja_heimsyn/entry/921120/

þar á meðal linkar á upptöku af þessum þætti.