Er veður alltaf gott á Fiskidaginn mikla ?

Í dag var víða 17 til 20 stiga hiti norðaustan- og austanlands og hlýjast í Ásbyrgi 21,3°C.  Hitinn hefði potast enn hærra upp hefði verið jafn sólríkt og spáð var, en víða var nokkuð um ský á himni á þessum slóðum.

Veðrið var vitanlega gott á Dalvík, þegar bæjarbúar halda sína bæjarhátíð.  Ég hef tekið eftir því undanfarin ár að sama hvað á gengur með N-áttir og fýlu að þá virðist veður ævinlega skána a.m.k. um tíma þegar Fiskidagurinn mikli gengur í garð.  Ég hef svo sem ekki gert neina djúpa athugun á þessu en nokkuð viss að síðustu sex til sjö árin hafi veður verið þurrt og milt við Eyjafjörð einmitt þennan dag.

Ef einhverjir Dalvíkingar muna eftir NA-átt með þoku eða rigningarsudda þennan laugardag eftir verslunarmannahelgina eftir að hátíðarhöldum þeirra var komið á, mega þeir gjarnan rifja það upp hér í athugasemd.  

Mynd: Jón Ingi Einarsson af vef Fiskidagsins.

Athugasemdir

[Kristján Sigurðsson (IP-tala skráð) 9.8.2009 kl. 03:04]

Þetta er rétt hjá þér Einar. Ef það eru til einhverjir veðurguðir þá virðast þeir halda sérstakri verndarhendi yfir Fiskideginum. Það hellirigndi bæði á Sauðárkróki og Húsavík í dag. Reyndar í Svarfaðardal einnig ...en ekki á Dalvík. Þó nokkrir dropar næðu þangað.

[Jóhann (IP-tala skráð) 9.8.2009 kl. 19:51]

Ég var á fiskideginum 2005, í 23 C° hita og léttskýjuðu veðri, þannig að ég get ekki kvartað!

[Skafti Brynjólfsson (IP-tala skráð) 9.8.2009 kl. 21:53]

Sæll Einar, ég ásamt fleirum höfum gert flugeldasýningu Fiskidagsins núna í níu ár og alltaf fengið fínasta skotveður. Spurning hvað það verður mörg ár í röð til viðbótar.

[Jóhann Jónsson (IP-tala skráð) 10.8.2009 kl. 15:24]

Ég skrapp í golf inn í Svarfaðardal á laugardeginum og lenti í þvílíkri dembu en það féll ekki dropi á Dalvík.

[Bjarnveig Ingvadóttir (IP-tala skráð) 10.8.2009 kl. 16:54]

Þetta með veðrið og fiskidaginn er alveg ótrúlegt. Sama þó það hafi verið norðanskítur í marga daga þá verður alltaf gott veður á fiskidaginn og reyndar líka súpukvöldinu síðan það byrjar. Eitt skifti man ég eftir tæpu veðri, það var skýjað og alltaf eins og það væri alveg að koma rigning en hékk þurr þar til dagskráin var afkynnt og þá skall á úrhelli.