Mikið úrhelli á Seyðisfirði á skömmum tíma

Stundum hef ég gert að umtalsefni úrkomumælingar og mikla úrkomuákefð  sem sjálfvirku  mælarnir  skrá  nokkuð nákvæmlega.  Stundum hef ég sagt að mikil úrkoma sé þegar ákefðin samsvari 5 mm/klst.  Það kemur fyrir að maður rekist á tölur sem eru hærri eða yfir 10 mm/klst í skúradembum eða samfara skilum þegar mikið rignir staðbundið vegna uppstreymis lofts yfir fjöll.

Í fyrrinótt urðum við einmitt vitni að ákafri úrkomu þegar skil gengu nokkuð hratt til norðvesturs yfir landið.  Þessu fylgdi austanátt um austanvert landið og ekki þarf að koma á óvart að einmitt þar var úrkoman mest.

Sólarhringsúrkoman frá kl. 09 til 09 að morgni reyndist vera 120 mm á Hánefsstöðum á Seyðisfirði.  Þar eru úrkomumælingar og mælir tæmdur í mæliglas að morgni.  100 mm komu í  sjálfvirka mælinn í kaupstaðnum. Þetta eru þannig lagað séð ekki sérlega háar tölur í austfirsku samhengi, ekki fyrr en litið er til þeirrar staðreyndar að úrkoman féll öll um nóttina frá því skömmu fyrir miðnætti til um kl. 07.  Á Seyðisfirði mátti sjá að úrkomuákefðin þegar mest var nam tæpum 20 mm/klst.  Sem betur fer og áður en hlíðarnar fóru af stað, gengu skilin hratt yfir að þessu sinni.   

Fínriðin veðurlíkön ná ansi oft staðbundinni mögnun við fjöll og fjalllendi.  Í því samhengi er fróðlegt að skoða HRAS spá sem reiknuð er í 9 km neti.  Reiknuð spá kl. 18 kvöldið áður náði mögnuninni fyrir austan ansi vel eins og sjá má á meðfylgjandi korti sem gildir kl. 06. Ljósu blettirnir austanlands gefa til kynna úrkomuákefð yfir 20 mm á þremur klst.  Þegar úrkomusamantekt landsins alls er skoðuð sést að úrkoma mælist í meira mæli í inni á fjörðum  eystra heldur en á annesjum.  Mun minna rigndi í Neskaupsstað og á Dalatanga, heldur en inni á Seyðisfirði eða á Fáskrúðsfirði svo dæmi séu tekin. 

Kemur þetta heim og saman við  reynsluna frá V-Noregi þar sem áhrif þvingaðs uppstreymis vegna fjalla eru mest aðeins inni á landinu og síður við minni fjarðanna.

En auðvitað er þetta breytilegt hér, stundum rignir meira í Neskaupsstað en á Seyðisfirði, en þá við aðeins aðrar aðstæður en þegar vindur er á háaustan.  

Athugasemdir

[Gunnar Th. Gunnarsson, 26.8.2009 kl. 09:45]

Mér fannst ekkert rigna neitt ógurlega hér á Reyðarfirði... kannski af því ég var sofandi

Er ekki lengur mæld úrkoma á Kollaleiru?

[Einar Sveinbjörnsson, 26.8.2009 kl. 13:08]

Ég fæ ekki betur séð Gunnar en að úrkomuathuganir hafi lagst af þegar mannaða stöðin var lögð niður.  Svo er að sjá sem að úrkomumælir sé ekki hluti búnaðar á Kollaleiru fyrir botni Reyðarfjarðar.  Mér þykir þetta nú svolítið einkennilegt, því þarna voru stundaðar úrkomumælingar í áraraðir.  Ef Veðurstofan veit betur mætti láta hér vita, en ég finn ekkert vef VÍ sem bendir til úrkomuathugana.  Hins vegar er mælt bæði á Eskifirði og í Neskaupsstað.

ESv 

[Gunnar Th. Gunnarsson, 26.8.2009 kl. 14:05]

Það getur reyndar verið lygilegur munur á veðri hér á milli fjarða, þó loftlínan sé ekki löng, bæði hvað varðar hitstig, sólfar, vinda og úrkomu.