Loftslag.is

Þegar ég sá fyrst ávæning að því fyrir nokkrum dögum að upplýsingasíða um veðurfarsbreytingar væri að fara í loftið, var það fyrsta sem laust niður í huga minn að þarna væri umhverfisráðuneytið að fara af stað með upplýsingaveitu fyrir almenning, nú eða Veðurstofan.  En svo reyndist ekki vera, heldur er síðan loftslag.is alfarið á könnu tveggja einstaklinga sem hafa brennandi áhuga á bakgrunni loftslagsbreytinga.  Þetta eru þeir Höskuldur Búi  og Sveinn Atli, sem báðir hafa tekið virkan þátt undanfarna mánuði í loftslagsumræðunni á netinu.

Síðan er sem sagt komin í loftið og það sem þar er að finna er nú þegar er gert af metnaði og lögð áhersla á staðreyndir frekar en að ritstjórar síðunnar séu að predika sína skoðun.  Á sama hátt hef ég viljað nálgast málaflokkinn hér á veðurbloggi mínu.  Ekki með vísifingurinn á lofti, frekar að reyna að skýra mælingar og athyglisverðar rannsóknir sem eiga erindi við okkur hér úti í miðju Atlantshafi.  

Mæli sérstaklega með tveimur greinum þennan fyrsta dag sem vefurinn er starfræktur:

Annarsvegar um frávik sjávarhita heimshafanna nýliðið sumar.

Hinsvegar um minnkandi virkni sólar og áhrif þess á veðurlag okkar tíma. 

 

Athugasemdir

[Gunnar Helgi Eysteinsson, 19.9.2009 kl. 22:06]

Flott síða...

[Loftslag.is, 20.9.2009 kl. 12:01]

Takk fyrir góð orð og afbragðs kynningu Einar.

[Sigurður Þór Guðjónsson, 21.9.2009 kl. 12:20]

Ekki sé ég annað, þrátt fyrir metnað og áherslu á staðreyndir, en þessi síða og það sem Höskuldur Búi og Sveinn Atli hafa áður skrifað en að þeir séu að prédika sína skoðun með vísifingurinn á lofti og mér finnst það svo sem allt í lagi. En fingurinn er á lofti með augljósri fyrirlitningu á því sem kallað er afneitun og allt það. En  mér finnst þú ekki vera það þegar þú skrifar um veðurfarsbreytingar.