Skotvindurinn yfir Íslandi

 

 

Skotvindurinn liggur nú yfir landið, frá suðvestri til norðausturs.  Þetta kort er fengið af Brunni Veðurstofunnar og sýnir í raun ástand mála í háloftunum eða í um 9 km hæð í svokölluðum 300 hPa. fleti kl. 15 í dag.  Skotvindurinn er kjarni vindrastar þarna uppi sem rekja má flesta daga alveg  umhverfis norðurhvel jarðar.

Yfirleitt liggur skotvindurinn (e. Jet stream) þvert yfir Atlantshafið fyrir sunnan Ísland og stundum langt suður í hafi undan Spáni og Portúgal.  En kjarninn er líka óvenjulega sterkur um þessar mundir, um 170 hnútar sem samsvarar um 85 m/s. Sem betur fer nær þessi vindur ekki alla leið niður, en þegar svona er ástatt er gjarnan nokkuð hvasst og stundum mjög hvasst, sérstaklega á fjöllum og eins hlémegin fjalla.

Lægðin sem "fauk" yfir landið í nótt var vitanlega borin af þessari öflugu vindröst, en styrkur hennar verður að segjast vera öflug fyrir árstímann. Maður sér eitthvað þessu líkt frekar að vetrinum. Háloftakuldi á slóðum Grænlands á þar þátt, ásamt sumarhlýindum sem enn eru við lýði suður í Atlantshafi.

En á meðan þessu varir, má gera ráð fyrir sviptingum í veðrinu hér hjá okkur, í það minnsta miklum sveiflum. Sterkur skotvindurinn verður viðloðandi Ísland og kannski frekar rétt sunnan landsins a.m.k. fram á mánudag.