Samanburður á veðurspám

Fróðlegt er að gera samanburð á þeim veðurspám sem birtar eru fjölmiðlunum. Slíkur samanburður er ekki alltaf auðveldur.  Auðveldast er að bera saman þær spár sem gerðar eru síðdegis og sýndar og kynntar í veðurfregnatímum Sjónvarps og NFS.  Spákort það sem birt er í Morgunblaðinu dag hvern er einnig útbúið síðdegis.

Einfaldast er að bera spár um hita við raunveruleikan, þar á eftir skýjahulu og einna flóknast er að meta spár um úrkomu á veðurkortunum.  Sá samanburður kallar á skilgreinda aferðarfræði, því stundum er t.d. rigningarspá þess eðlis að þó svo að ekki rigni á tilteknum stað getur á sama tíma verið rigning allt í kring.  Og þessu skylt; hvernig á að meta skúraspá o.frv.

Þær spár sem birtar eru daglega eru með hita og veðurmekjum vítt og breitt um landið.  Sú hefð hefur skapast að spá fyrir morgundaginn eigi við ákveðna lykilstaði þar sem eru gerðar veðurathuganir.  Þessir staðir eru: 

Reykjavík, Stykkishólmur, Bolungarvík, Blönduós, Akureyri, Raufarhöfn, Egilsstaðir, Akurnes við Hornafjörð, Kirkjubæjarklaustur, Stórhöfði í Vestmanaeyjum og síðan Hveravellir.

Skiptum nú spám um hitastig  í góðar spár og slæmar spár. Ef veðurspáin segir 8°C að þá leyfist frávik við mælingu upp á 1,5° í báðar áttir.  Dæmi: hiti sem mælist 8,9°C (námundað í 9°C) er innan marka og spáin því góð.  Mælist hitinn hinsvegar 9,5° námundast gildi í 10° og spáin er þar með orðin slæm.

Með þessu móti er hægt að bera saman og flokka eftir gæðum hitapár morgundagsins fyrir 11 staði á Íslandi í Sjónvarpinu, NFS og spá dagsins sem birtist í Morgunblaðinu að morgni.  Veðurspáin í Fréttablaðinu er erfiðari viðfangs hvað sambanburð varðar, þar sem segir að veðurkortið gildi um hádegisbil, en í smáu letri undir segir að hitinn sé hæsta gildi dagsins.

Á veðurblogginu verður á næstunni gerður samanburður á hitaspám þessara þriggja miðla fyrir tiltekna daga sem valdir verða af handahófi og reiknað út skor.  Athyglisvert verður að sjá hvaða fjölmiðill hefur oftast rétt fyrir sér:)