Kuldalegt Íslandskort

Heldur var hann svalur á landinu kl. 09 í morgun, en á hádegi hafði hitinn samt potast lítið eitt upp víðast hvar. Fregnir hafa borist af snjókomu í byggð sums staðar á Vestfjörðum, Ströndum og Norðurlandi.

Ég sagði í viðtali við fréttastofu RÚV nú í hádeginu að dagurinn í dag væri með þeim kaldari sem komið hefðu í september hin síðari ár.  Benti á 25. september 2005 og þ. 26. árið 1974 í því sambandi.  Þá kom kalt loft yfir landið samfara N-átt.  Nú gerist það hins vegar með V- og SV-átt, sem er óvenjulegra svo snemma.  Sjálfur man ég ekki eftir útsynningi með éljagangi þetta snemma haustsins, en vel má vera að með nákvæmri leit megi finni eitthvað sambærilegt.  Í það minnsta er ég nokkuð viss að það hafi ekki gerst hins síðari ár.

Samanburður sem þessi er þó ætíð huglægur, oft hefur þannig mælst meira frost á láglendi en nú í september, þá á stökum stöðum aðallega vegna útgeislunarkulda yfir nótt (oft í kjölfar N-skots).  Nú erum við hins vegar að tala um aðstreymi af köldum loftmassa sem hefur áhrif um landið allt, enni síst þó suðaustanlands. 

Athugasemdir

[Emil Hannes Valgeirsson, 27.9.2009 kl. 13:42]

Sæll. Ég var aðeins að fletta upp síðari árum í mínum bókum. Fann t.d. mikið norðanskot þann 18. september með um 3ja stiga hita í Reykjavík. Alveg í lok þess mánaðar eða síðdegis þann 30. fann ég útsynnings-slydduél með 5 stiga hita og einnig þann 23. september 1994. Þetta er nú bara samkvæmt mínum skráningum en útsynningurinn núna um helgina er þó miklu öflugri og langvarandi en þessir fyrri.

[Sigurður Þór Guðjónsson, 27.9.2009 kl. 13:56]

Ekki man ég í fljótu bragði við svona hreinu vestankasti jafn eindregnu og köldu á þessum árstíma. En kaldasti tíminn frá 25. til mánaðarloka sem komið hefur er 1954 en þá var norðanátt. Og 29. árið 1969 snjóaði mikið í Reykjavík og víðar á suður-og vesturlandi, samfelld snjókoma í nokkra klukkutíma en ekki él í austanátt. Slíkt veðurlag er enn þá meira fráhrindandi en nokkru sinni útsýnningur þegar ekki er komið oktíober.  Hér má líta á veðurdagatalið fyrir Reykjavík og hámarksog lághmarkshita fyrir landið. Bráðum endurnýja ég dagatalið fyrir Reykajvík og tek inn árin 1924-1935 sem hefur vantað.