Hundslappadrífa í Höfuðborginni

Hún var þétt og alvöru snjókoman suðvestanlands nú snemma í kvöld.  Veðurstofan hafði gefið í skyn í morgun að ganga myndi á með éljum eða slydduéljum.  En það er svo með fyrsta snjóinn hann kemur oftast nokkuð á óvart.  Snjórinn er snemma á ferðinni þetta haustið og mjög víða á landinu hefur 5. október nú þegar náð  að  snjóa í byggð. 

Þetta var úrkomubakki eða lægðadrag sem nálgaðist rólega úr suðvestri, fyrst muggaði og síðan ágerðist ofankoman í hægri SA-áttinni.  Tæki voru fljótlega komin út til gatnahreinsunar, enda full þörf á. Áfram verður einhver úrkoma í kvöld og nótt, en það er bót í máli að heldur er hlýnandi og því verður þetta að karapgraut á götunum.   Verra hefði verið ef létt hefði til í kjölfarið og þessi blauti snjór frosið í samfellda hellu. Og allir vitanlega á sumarhjólbörðum ! Maður hefði ekki boðið í slíkt ástand í fyrramálið.

Á göngu náði ég mynd af kátum systkinum sem komin voru út í ævintýraheiminn í Garðabænum snemma kvölds.  Ratsjármyndin er frá því kl. 19:45 og fengin af vef VÍ. Hún sýnir vel snjókomubakkann, sem alls ekki er mikill um sig, en hægfara er hann.   

Athugasemdir

[Sigurður Þór Guðjónsson, 5.10.2009 kl. 23:21]

Þetta er hreinlega algjör viðbjóður.

[Haraldur Þ. Magnússon (IP-tala skráð) 6.10.2009 kl. 09:08]

Þetta er óvenjulega snemma á ferðinni, þó vissulega sé hægt að benda á að þetta hafi gerst áður. 

En bendir þetta bara ekki til þess að "trúarbrögðin" um alheimshlýindi séu hreinlega blekking?

[Einar Sveinbjörnsson, 6.10.2009 kl. 09:32]

Haraldur !

Einn lítil atburður í veðri á Íslandi getur seint afhjúpað það sem þú kýst að kalla "trúarbrögð" og blekking.  Til þess þyrft margt og mun stærra í sniðum og mun á lengri tíma !

Snjórinn er óvenju snemma á ferðinni nú.  Vel er hægt að hugsa sér venjuleg skilyrði í veðri og sem rúmast innan breytileikans sem gæfi af sér snjó á þessum árstíma og reyndar nokkru fyrr.  Ég gæti líka hugsað upp skilyrði í loftstraumunum sem leiddu til þess að hitinn gæti farið í 18 til 20 stig 6. október.  Hins vegar gerist slíkt afar sjaldan og þegar þannig slær til  þarf það ekki að þýða nokkurn skapaðan hlut annað en að hrein tilviljun hafi ráðið för. 

Menn eiga að varast að draga of stórar ályktanir af einstökum veðurviðburðum sem koma og fara eins og gengur.

ESv 

[Þorkell Guðbrands (IP-tala skráð) 6.10.2009 kl. 18:33]

Ég sé í veðurbókinni minni að það hefur byrjað að snjóa hér í fyrra að kvöldi þess 30. sept. og alhvítt á jörð að kveldi þess 1.10. Svo er kalt næstu dagana og snjókoma annað veifið, en fór að hlýna þ. 5.10. Næst snjóaði þ. 18.10. og síðan þ. 20.10. er éljagangur um morguninn en snjókoma um kvöldið. Talsverð snjókoma morguninn eftir og ég hef séð ástæðu til að bóka um ófærð hér innan bæjar. Stytti upp og létti til um kvöldið.  Vestlægar árri þ. 23.10. og slydda, en fór að snjóa að morgni þ. 24.10. og snjóaði þann dag allan og næsta dag einnig, sem var fyrsti vetrardagur. Gekk svo niður á sunnudeginum. Éljagangur á mánudeginum 27.10. og svo snjóaði með sunnan átt á þriðjudagskvöldið. Eitthvað smávegis hefur svo slitið úr lofti þessa daga sem eftir lifðu októbermánaðar. Ræðum um nóvember síðar.

[Haraldur Þ. Magnússon (IP-tala skráð) 7.10.2009 kl. 08:57]

Já, en Einar, ég tel samt sem áður að kenningin um alheimshlýnunina sá hrein blekking byggða á hreinni tilviljunum.  Þar að auki er hægt að benda á að mælitæki og tækni til mælingar á hitafari, hafa verið þróast mjög hratt á undanförnum áratugum.  Ekki má heldur gleyma því, að loftlagsrannsóknir hafa verið mun ítarlegri á ofanverðri 20 öld heldur en tímunum þar á undan, m.ö.o. loftlagsmálum hefur verið gefinn meiri gaumur á undanförnum árum og þess vegna verða niðurstöðurnar svona íktar.

Ég tel að við séum að fara inn í kuldatímabil a.la. það sem varð hér á árunum upp úr 1960-1990 og að þetta kuldatímabil sé hluti af sveiflum í veðarfari sem verði reglulega á ca. 30-40 ára fresti.  Það hefur til að mynda farið kólnandi síðan 2003 og þessi kuldaköst svona snemma í október styðja þessa tilgátu mína.

Ég man eftir þremur verulega köldum árum á síðasta kuldaskeiði, 1965, 1967/1968 (reyndar var seinni partur 1968 frekar hlýr), og svo árið 1979, sem var kaldasta árið á 20. öldinni.  Norð-austanlands kom varla sumar það ár.  (Einar, er einhver skýring á þessari köldu tíð árið 1979?).  Reyndar kom inn í þetta eitt hlýskeið, sem varaði frá vori 1971 til febrúarbyrjunar 1973.  Veturinn 1971-1972 var til að mynda ákaflega mildur á þeirra tíma mælikvarða.  Í byrjun febrúar 1973 kólnaði eftir þetta hlý-tímabil með snarpri norðanátt.  Til að mynda er talið að þessi veðrabrigði hafi orðið til þess að vélbáturinn Sjöstjarnan KE hafi farist með 10 manns suð-austur af landinu þann 11. feb. 1973, en báturinn var á leið frá Færeyjum.  Telja kunnugir að mikil ísing hafi orðið til þess að bátnum hvolfdi

En ég veit, Einar, að svona skoðanir eins og ég er með, eru hreinustu helgispjöll og jafnvel guðlast í eyrum alheimshlýnunaráhangenda.  Ekki taka þetta til þín.  En við skulum sjá til hver hefur rétt fyrir sér, ég eða alheimshlýnunaráhangendur.  Ég spái kuldaskeiði upp úr 2010 og fram til 2040, svona svipuðu og við höfðum á árunum upp úr 1960.

[Þorkell Guðbrands (IP-tala skráð) 7.10.2009 kl. 10:47]

Ég ætla ekki að blanda mér í umræðuna um "Global Warming" heldur hnykkja aðeins á spurningum Haraldar Þ. M. um stök köld ár eins og 1979 og reyndar líka 1981. Einhversstaðar heyrði ég þessi köldu ár tengd við áhrif af tveimur eldgosum, annars vegar í í Mexico árið 1978 og St. Helens 1980 um haustið. Ekki veit ég um hvort eitthvað sé til í þessu, en fróðlegt væri að fá eitthvað um þessi tilteknu hitafrávik.

[Haraldur Þ. Magnússon (IP-tala skráð) 8.10.2009 kl. 10:05]

Þorkell, þetta er rétt hjá þér svo langt sem það nær.  Það var stórt gos í St. Helens árið 1980 svo árið 1981 var kalt, og síðan var þetta Mexicó-gos árið 1982 en ekki 1978, svo árið 1983 var kalt.  Man fólk ekki þegar ekkert sumar var hér á landi árið 1983 og fólk mótmæltu fyrir framan Veðurstofuna og krafist betra veðurs?

[Þorkell Guðbrands (IP-tala skráð) 10.10.2009 kl. 14:04]

Haraldur, ástæða þess að ég spurði fremur um árið 1979 var sú, að ég bý hér á norðvestanverðu landinu, í Skagafirði nánar tiltekið, og hér um slóðir var sumarið 1979 miklum mun kaldara en fyrirfarandi ár. Sumarið 1983 mun hinsvegar hafa verið talsvert lakara á sunnanverðu landinu en hér, þannig að áhrif veðráttunnar á okkur urðu skárri en hjá ykkur syðra. Semsagt, maður er bara svona egocentrískur!