Skarpur jaðar kuldaskila

Yfir landinu sunnanverðu er nú grunn lægð sem er enn á mótunarstigi ef svo má segja.  Hún á eftir að dýpka, en einkum fyrir norðaustan landið á morgun.

Það sem vekur hins vegar mesta athygli mína nú á þessum drungalega rigningardegi er skarpur jaðar kuldaskilanna í vestri.  Þar sem skýjabakkinn er hvað þykkastur, þ.e. yfir landinu er sterk sunnan háloftavindröst.  Vestan hennar þrengir kalt loft úr vestri sér undir jaðarinn og á þátt í því að lægðin vex og dýpkar.  Myndin er NOAA-hitamynd frá því um kl. 15:30.

Allt er kerfið á norðausturleið og þegar skarpur jaðarinn fer yfir kólnar.  Það styttir ekki aðeins upp heldur léttir til strax í kjölfarið.  Þá er mjög hætt við því að blautar göturnar frjósi og fljúgandi hált verði.  Vestast á landinu gerist þetta í kvöld svona u.þ.þ. eftir kl. 20.  Þegar eitthvað þessu líkt gerist sér maður oft að skömmu áður en skilin fara hjá kólnar heldur og síðustu hreyturnar er blaut snjókoma ofan í bleytuna.  Þegar þetta er skrifað laust fyrir kl. 18 er nú þegar farið að snjóa á fjallvegum víða vestantil, m.a. á Hellisheiði og sums staðar reyndar snjóað meira og minna í dag !

Fyrir þá sem hafa gaman af snöggum veðrabrigðum verður áhugavert að gægjast út og fylgjast með seinna í kvöld.   Veðurkortið er skýjaspá af Brunni Veðurstofunnar og gildir kl. 21 í kvöld. 

Athugasemdir

[Gunnar Th. Gunnarsson, 17.10.2009 kl. 18:26]

Rétt fyrir kl. 16 í dag var SV-strekkingur á Reyðarfirði og 15 stiga hiti á mælinum í bílnum hjá mér. Ég vona að hitinn haldist til morgunns svo ég þurfi ekki nagladekkin í nótt

[Hörður Þórðarson, 18.10.2009 kl. 06:08]

Eins of þú segir fylgir þessum skilum snögg veðurbreyting. Það vekur upp með mér þá spurningu hvar almenningi gefist kostur á því að sjá veðurkort með skilum á? Ekki get ég séð nein skil á sjónvarpskortum, og ekki heldur á þeim kortum sem í boði eru á vef veðurstofunnar. Kannski hugsa þeir með sér að til sé tvenns konar fólk, annars vegar þeir sem vita mikið um veðurfræði og geta þess vegna sjálfir séð hvar skilin eiga að vera, og hinir sem vita lítið og hafa þar af leiðandi ekkert gagn af því að sjá skilin af því að þeir vita ekkert hvað þau þýða?

Sjálfum fyndist mér rétt að VÍ gerði kort með skilum aðgengileg til að auka skilning fólks á veðurfæði og til að hjálpa fólki að átti sig á því hvað er að gerast í veðrinu hverju sinni... VÍ hlýtur, eins og aðrar veðurstöfur að greina veðurkort. Væri ekki hægt að skanna kortin á 6 tíma resti og setja þau inn á vefinn. Það ætti ekki að vera meira en 5 mínútna vinna í allra mesta lagi að gera það...

[Einar Sveinbjörnsson, 18.10.2009 kl. 11:08]

Hörður !

Get ekki verið meira sammála.  Veðraskil eru alveg að hverfa úr allri umfjöllun um veður.  Þegar fólk er fyrst búið að læra vel á þá einföldu hugmynd sem að baki þeim býr eru þau öndvegis greiningartæki.  Í raun er ákaflega erfitt að fjalla að viti um breytilega vetrarveðráttuna hér á landi þar sem sífelldar loftmassaskiptingar eiga sér stað án þess að draga hita- og kuldaskilin inn í þá umræðu.

ESv 

[Sigurður Þór Guðjónsson, 18.10.2009 kl. 14:28]

Ég er ekki frá því að skilningur fólks, sem ekki hefur sérstakan áhuga fyrir veðri, á veðurkortum og kannski á veðri yfirleitt sé að fara aftur. Fyrir svona tuttugu árum og lengra aftur voru ekki bara gömlu veðurkortin með skilum í sjónvarpinu heldur komu út nokkrar bækur um íslenskt veður. Einhver slík bók var yfirleitt í umferð með kortum og myndum. Nú er ekkert og hefur þó mikið bæst við veðurflóruna síðustu árin. Það sárvantar bók um íslenskt veður og bara veður almennt og hún mætti alveg vera ýtarleg.

[Gunnar Th. Gunnarsson, 18.10.2009 kl. 16:47]

Ert þú ekki sjálfskipaður höfundur slíkrar bókar, Sigurður.

[Sigurður Þór Guðjónsson, 18.10.2009 kl. 17:04]

Svona bók á að vera skrifuð af veðurfræðingi. 

[Gunnar Th. Gunnarsson, 18.10.2009 kl. 19:29]

Nei, einmitt ekki. Hún á að vera skrifuð af alþýðumanni sem talar mál sem fólkið skilur og með pælingar sem samsamar almenningi. Veðurfræðingar geta verið fræðilegir ráðgjafar.

[Þorkell Guðbrands (IP-tala skráð) 19.10.2009 kl. 07:51]

Hvernig væri að þeir Sigurður Þór og Einar Sveinbjörns legðu saman í Veðurbók alþýðunnar? Einar legði til sérfræðiþekkinguna, Sigurður hefur safnað meiru af upplýsingar um veðurfar og veðursögu en nokkur annar núlifandi íslendingur og báðir segja skemmtilega frá! Er þetta ekki bara jólabókin árið 2010?

[Sigurður Þór Guðjónsson, 19.10.2009 kl. 14:17]

Nú finnst mér umræðan vera óvænt farinn að snúast um mig! Ekki svo að skilja að ég sé uppnæmur fyrir því.  Hins vegar veit ég ekki hve mikill alþýðumaður ég er. Alla vega er ég mjög forn í lund og eigi við alþýðuskap! Bendi svo á að veðurfræðingar hafa aðgang að gífurlegu gagnamagni á Veðurstofu Íslands.