Einkar mildur dagur á Vestfjörðum

Hún lætur ekki að sér hæða SA-áttin af þeirri gerðinni sem nú leikur um landið.  Hlý og væn.  Tók eftir því í morgun hvað hitinn var hár vestur á fjörðum.  Þar nær milt loftið í hæð að streyma niður í firðina og við það hlýnar það umtalsvert.  Það er engin væta sem heitið getur þarna á ferðinni og hnúkaþeyr með viðbótar dulvarma ekki til staðar. 

13°C kl. 09 skömmu eftir birtingu 30. október á Hólum í Dýrafirði, verður að teljast  allgott.  12 gráður voru á Flateyri, 11 í Bolungarvík, á Bíldudal og víðar.  

Á  Þverfjalli í 750 metra hæð (við gamla veginn yfir Breiðadalsheiði) voru 13 m/s kl. 9 og þar hiti +3°C líkt og sjá má á Steingrímsfjarðarheiði.

Á Hornbjargsvita gætir þessa áhrifa ekki þar sem loftið kemur beint af hafi, ekkert niðurstreymi vegna fjalla þar og því er umtalsvert lægri hiti á Ströndum.

Ég tala hér um SA-átt, en eins og sjá má er A-átt á flestum athugunarstöðum.  Í raun er SA-vindröst í lofti og uppruni loftsins úr þeirri áttinni. Í jaðarlagi lofthjúpsins, neðstu 1.000 metrunum eða svo sveigist vindáttin lítið eitt til hægri, þannig að vindur blæs örlítið inn í áttina að lægðarmiðjunni.  

Athugasemdir

[Áskell Örn Kárason (IP-tala skráð) 30.10.2009 kl. 20:23]

Hér í Eyjafjarðardölum er dægilegasta veður en ekki jafn hlýtt. Athyglisvert að sjá að hlýja loftið sem leikur um fjallatinda nær ekki alveg niður á láglendi. Eg var aðeins á ferðinni í dag hér austurum og það var segin saga að því hærra sem maður ók í hlíðarnar, þeim mun hærra hitastig birtist á mælaborðinu hjá mér.  5 stig í Fnjóskadal, 8 á Víkurskarði, svo dæmi séu nefnd.