Kolin taka fram úr olíunni

Flest bendir til þess að kolin séu nú aftur eftir áratuga forystu olíunnar tekið við sem stærsti valdur losunar koltvísýrings.  Þessu halda fram vísindamenn frá Noregi og Nýja Sjálandi ( þau Gunnar Myhre, Kari Alterskjær og David Lowe) sem sameiginlega hafa legið yfir tölfræði útblástursins. Brennsla kola hefur aukist hraðar frá því um árið 2000, en bruni á olíu og gasi.  Þar á SA-Asía mikinn hlut að máli, en jafnframt á það bent að vinnsla kola er enni í dag afar mikilvægur orkugjafi í mörgum ríkjum heims ekki síst í Bandaríkjunum. 

Þær eru vissulega sláandi þessar tölur um aukningu  losunar koltvísýrings.  Frá 1990, sem er fyrsta viðmiðunarár Kyoto-bókunarinnar til ársins 2008, hefur árlegur útblástur á CO2 aukist um 40% eða að jafnaði um 2,2% á ári.  Frá 2003-2007 jókst hraði aukningar enn meir eða um 3,7% árlega. Síðasta ár, sem sumir kenna við alþjóðlega fjármálakreppu segja greinendurnir að hægt hafi aftur á aukningunni.

Línuritið sýnir árlega losun í mælieiningunni GtC (gígatonn kolefnis).  Ferlarnir eru tveir, aðeins ólíkir eftir gagnasöfnum losunar. Athugið að það er aðeins blekkjandi fyrir augað að skera y-ásinn við 6 GtC í stað 0. Til  samanburðar eru síðan spár um losun í ólíkum sviðsmyndum þeim sem IPCC styðst við.  Sjá má að raunlosun fer næst sviðsmyndinni A1B.  

Fyrir þá sem vilja vita meira um sviðsmyndir losunar (á ensku)  er tengill hér.

Hlutur CO2 í lofthjúpi hefur farið úr 280 ppm frá um 1750 í 383 ppm árið 2007.  75% þessarar aukningar er tilkomin vegna bruna jarðefnaeldsneytis en 25% vegna vegna breytinga á landi sem til er komin að stórum hluta vegna skóga- og jarðvegseyðingar. 

Áhugasamir um losunarbókhald og aðferðir við að uppfæra tölur fljótt og vel er bent á aðgengilega grein Gunnars Myre og félaga úr Environmental Recearch Letters hér en línuritið er einmitt fengið úr henni. 

Athugasemdir

[Anton Þór Harðarson, 5.11.2009 kl. 15:13]

þetta er einmitt afleiðing stefnu, náttúruverndarsinna. Þar sem ekki má virkja vatnsföll og jarðhita til framleiðslu raforku til stóriðju, færist bygging þessarar atvinnustarfsemi til landa þar sem kol eru aðal eldsneyti raforkuvera.

Því má segja að hnattrænt, þá stuðli barátta gegn álverum og annari stóriðju hér á landi, að aukinni notkun á kolum til raforkuframleiðslu

[Sveinn Atli Gunnarsson, 5.11.2009 kl. 18:58]

Það er umhugsunarvert að losun koldíoxíðs hafi aukist þetta mikið síðan 1990. Vonandi gengur okkur betur að draga úr losun á næstu árum og áratugum, en það mun væntanlega fara að einhverju leiti hvaða niðurstaða næst í Kaupmannahöfn nú í desember. Eftirfarandi niðurstöður hafa m.a. verið nefndar í sambandi við loftslagsráðstefnuna í Kaupmannahöfn:

1. “Raunverulegur samningur”: Bandaríkjamenn og Kínverjar munu veita drifkraftinn fyrir nýtt, metnaðargjarnt og alhliða samkomulag.
2. Viðskipti eins og venjulega: Allmörg lönd munu vilja fylgja núverandi stefnu sinni.
3. Takmarkaður samningur: Þar sem t.d. G8 löndin taka eigin stefnu fyrir utan ramma UNFCCC.
4. Framlenging af núverandi samning, þ.e. Kyoto samkomulaginu.
5. Ráðstefnan í Kaupmannahöfn “framlengist” fram á árið 2010.
6. “Sýndarmennska”: Miklar yfirlýsingar um vilja, en engin raunverulegur samningur.

Sjá nánar um loftslagsráðstefnuna á Loftslag.is.

[Kristinn Pétursson, 5.11.2009 kl. 20:44]

En hvað var CO2 í lofthjúpi t.d 5000 árum f.Kr. - eru til gögn úr setlögum eða ísborkjörnum sem svara því - eða einhver  önnur slíkt tímabil??

Var þetta ekki enn verra á tímum mikilla eldgosa í sögunni??

[Sveinn Atli Gunnarsson, 5.11.2009 kl. 21:23]

Sæll Kristinn, já það eru til gögn um magn CO2 í lofthjúpnum fyrir 5 þúsund árum og jafnvel enn lengra aftur í tímann. Magn CO2 í andrúmsloftinu hefur ekki verið hærra í þúsundir ára. Hérundir er t.d. línurit yfir magn CO2 í andrúmsloftinu 650 þúsund ár aftur í tímann, sjá nánar á Loftslag.is, um orsakir fyrri loftslagsbreytinga. Eins og sjá má, hefur magn CO2 varla farið upp yfir 300 ppm á öllu tímabilinu, en það er nú komið yfir 380 ppm.

[Gunnar Th. Gunnarsson, 6.11.2009 kl. 16:45]

Tek undir það sem Anton segir