53 m/s í hviðu undir Eyjafjöllum í nótt

Á undan skilunum sem fóru yfir snemma í morgun var A og ANA-stormur undir Eyjafjöllum.  Þarna verður vindröstin af hafi fyrir stíflu eða fyrirstöðu  frá fjöllunum og loftið er því  þvingað meðfram Mýrdalsjökli og Eyjafjöllum.  Því á sér stað vindmögnun og fyrir tilstuðlan múlanna sem ganga suður úr megin fjallaklasanum brotnar vindur upp í minni hvirfla og vindhviður verða snarpar.

Á Steinum undir Austur-Eyjafjöllum mældi Vegagerðin þannig augnabliksvind 53 m/s  um og fyrir kl. 03 í nótt. Nokkrir aðrir hnútar, um og yfir 45 m/s mældust þarna eftir það þ.e. snemma í morgun.  Skot af þessum styrk eru hættuleg ökutækjum, en bót er þó  í máli að vindur blæs nokkurn veginn samsíða akstursstefnunni.  Þó háttar þannig til að sveipirnir geta hæglega komið úr öllum áttum og tekið í bílinn þegar á þann hátt sem mann síst grunar.

Á kortinu sem er frá Samsýn og fengið á já.is er sýnt umrætt svæði undir A-Eyjafjöllum (ágætt að stækka kortið !).  Kaflinn við Steinabæina, þ.e. undir Steinafjalli austur á flatlendið undan Þorvaldseyri er skeinuhættur. Á flatanum sérstaklega eins og háttaði nú til þegar vindur í lofti er þveraustan (ANA).    Einnig er hviðustaður þar sem vegurinn liggur fast með Drangshlíðarfjalli austur fyrir hornið að brúnni yfir Skógá hjá Skógarfossi. Alls eru þeir fimm kaflarnir á þjóðveginum undir Eyjafjöllum þar sem bílum er hætt við foki í A-hvassviðri og stormi.

 

Athugasemdir

[Jóhann Grétar Kroyer Gizurarson (IP-tala skráð) 21.11.2009 kl. 00:45]

Eitt mega þeir eiga Eyfellingar að það er mjög milt hjá þeim svona miðað við hnattstöðu þrátt fyrir að það geri rok endrum og eins.