Mikið sandmistur

Mér var bent á það um miðjan dag í gær sunnudag að mikið mistur lægi yfir Bláfjöllum og Reykjanesfjallgarðinum.  Þegar mér var litið þangað um kl. 14 mátti sjá óvenju dimman mökk yfir fjöllunum.   En um það bil sem það tók að rökkva var mér aftur litið til fjallanna og sá þá að  loftið var aftur orðið nokkurn veginn tært.

Meðfylgjandi MODIS mynd er einmitt frá því í gær kl. 13:15 og á henni má sjá ansi merkilega hluti. Sandstormur er greinilegur og leggur strókinn  yfir Reykjanesið undan allhvassri NA-áttinni.  Upptökin má líka greina sunnan undir Langjökli frá þekktum fokstað við Hagavatn. Það er í raun með ólíkindum að mest allur þessi mökkur skuli veri uppruninn frá þessu litla svæði.  Gamli vatnsbotn Hagavatns er svo mikið foksvæði að hugmyndir hafa oft verið upp um það að freista þess að stækka Hagavatn til fyrra horfs eða frá því fyrir um 100 árum til þess eins að heft sandfokið.  Sjá t.d. hér frétt frá Orkuveitu Reykjavíkur (2007) sem bregður ljósi á vandamálið. 

Frá veðurkortum og spám í fínriðnu neti má ætla að veðurhæðin hafi verið 14-17 m/s á svæðinu þarna um morguninn og loftið líka skraufþurrt.  

Og það glittir ekki einu sinni í Þingvallavatn á myndinni í gegn um moldviðrið !  Sú staðreynd segir mikið um það hvers eðlis þetta hefur verið.  Ver einhver staddur á Þingvöllum í gær sem gæti gefið lýsingu ? Tók kannski einhver myndir ?  Allar upplýsingar eru vel þegnar.

Þó svo að mesta mistrið hafi verið austur af Reykjavík, mátti samt sem áður sjá hækkun svifryks í mæli Umhverfissviðs Reykjavíkur við Grensásveg. Um þetta leyti kom fram toppur í PM10 (stærri agnirnar) sem var um 150 míkrógr. á rúmmetra lofts eins og sést á línuritinu.  Orkuveita Reykjavíkur er ný búin að setja upp sambærilega stöð mun austar eða uppi við Norðlingaholt.  Fróðlegt væri að sjá samanburð þar á meðan á þessu stóð.

En MODIS myndin sýnir fleiri sandmekki, austar á landinu.  Þeir eru nokkrir og sá mesti virðist eiga upptök sín framan við vestanverðan Skeiðarárjökul.  Nægt er nú fínefnið þar mundi maður halda, en litaraftið er annað.  Mökkurinn snýst síðan upp í greinilegan sveip undan Mýrdalssandi eins og um ský væri að ræða ! Þessi hvirfill kæmi vitanlega ekki fram í þetta þurru lofti nema vegna efnisagnanna sem það ber með sér.

Þetta er ein síðasta MODIS myndin sem hægt er að hagnýta og skoða á þennan hátt þar til í lok janúar. Sólarljósið er orðið takmarkað, skuggarnir langir og við sjáum að myndin er skorin um mitt landið.     

Athugasemdir

[AA (IP-tala skráð) 26.11.2009 kl. 16:35]

Ég fór í bíltúr þarna norður fyrir Skjaldbreið einmitt þennan sunnudag, og get staðfest þetta, en tók því miður engar myndir. Ég fór reyndar ekki úr bænum fyrr en um hádegi.

Á Mosfellsheiðinni varð ég var við undarlegt mistur sunnan við mig, en alveg bjart á heiðinni hjá mér samt. Þegar ég svo nálgaðist Þingvelli mætti mér einmitt svartur veggur yfir vatninu og norðaustan við vatnið, ég rétt glitti í vestasta hlutann af Skjaldbreið. Ég fór svo inná Kaldadal, þar sem var alveg blár himinn, og svo inná línuveginn og þá sást alveg greinilega hvernig þetta átti upptök sín austan við Hlöðufellið.

Mér fannst vera frekar lítill vindur á Mosfellsheiðinni og alveg inn undir Sandkluftavatn, en þar norðan við var töluverður strekkingur sem bara jókst eftir því sem lengra dró. Ég endaði á að fara framhjá Stóra-Björnsfelli og alveg upp að Slunka og þar var varla stætt, þannig að ég hefði nú haldið að það hefði léttilega verið 20m/s eða meira þar...á köflum alla vega. Vindurinn gekk reyndar soldið yfir í hriðjum.

[Jónas Bjarnason (IP-tala skráð) 29.11.2009 kl. 11:47]

Ég var í bústað mínum í Úthlíð fram eftir degi þennan dag. Mikill mökkur umlukti Högnhöfða og Rauðafell frá mér séð og barst mökkurinn í suðvestur. Ég tók því miður engar myndir af þessu.