Rigningarnar á Bretlandi

Enn er útlit fyrir miklar rigningar á N-Englandi og Skotlandi á svipuðum slóðum og flóðin hafa verið.  Næsta lægð er dæmigerð óveðurslægð, kröpp og fer hratt yfir. Það hefur í för með sér að veðraskilin með mikilli úrkomu fara hratt yfir. Engu að síður spáir breska veðurstofan, Met Office allt að 50 til 75mm nærri landamærum Skotlands og Englands í nótt og fyrramálið.  Aðeins sunnar í Cumbria er gert ráð fyrir allt að 100 mm.

Tölur sem borist hafa um úrkomuna miklu sem varð í síðustu viku eru allt að því ótrúlegar sé miðað við álíka aftaka úrhelli hér á landi.  Votasti staður Bretlandseyja er Seathwaite í Vatnahéruðunum á N-Englandi (Cumbria). Sá staður er Kvísker þeirra Englendinga í úrkomutilliti.  Meðalúrkoman er um 3500 mm sem er sambærilegt við Kvísker.  Mælirinn er í hlíðum Seathwaite Fell, en það er 632 m hátt (sjá mynd, Mick Knapton frá því í mars 2006).  Þarna mældust 314 mm á 24 klst. í þegar mest lét í síðustu viku.  Samkvæmt Met Office er "sólarhringurinn" valinn með tilliti til mestu úrkomu, þ.e. 24 stunda tímabilið er látið enda kl. 00:45 aðfararnótt þ.20.  Venjan er hins vegar að miða við alþjóðlega samræmt mælingatímabil frá kl. 09-09 næsta morgunn.  Ég get ekki séð hve mikil sólarhringsúrkoman var á þennan hefðbundna hátt.  Hér er tengill á tölulegar vangaveltur og sögulegt samhengi frá  Centre for Ecology & Hydrology.

 

Mér og nokkrum öðrum veðuráhugamönnum er þetta þó nokkurt kappsmál, því þeir 293 mm sem féllu á Kvískerjum 9.-10. jan. 2002 er eftir því sem ég best veit mesta sólarhringsúrkoma sem mælst hefur við norðanvert Atlantshaf.  Ógjarnan vil ég sjá Englendinga stela þessu úrkomumeti frá okkur að ósekju, nema að verið sé að bera saman sömu hlutina.  Sjálfum er mér ekki kunnugt um það hvað 24 stunda úrkoma hefur orðið hér mest mælst sé valið heppilegasta 24 stunda tímabilið ! 

Annars er í gögnum Bretanna talað um úrkomumetið frá því 18. júlí 1955 sem sett var í Martinstown í Dorset.  Englendingar þekkja þetta litla þorp fyrir þessa gríðarmiklu skúraúrkomu sem gerði þennan sumardag og reyndar víðar í héraðinu.  Klárlega nær sú mæling yfir réttan sólarhring.  Takið eftir ártalinu.  Hver segir að aðeins hafi rignt á Suðurlandi "rigningarsumarið" fræga sumar 1955 ? 

Athugasemdir

[Höskuldur Búi Jónsson, 24.11.2009 kl. 09:30]

Ég sá flotta mynd af úrkomubeltinu og hreyfingu þess á þessari síðu hér: http://cimss.ssec.wisc.edu/goes/blog/archives/3838

[Þorkell Guðbrandsson (IP-tala skráð) 24.11.2009 kl. 10:07]

Okkur sem munum sumarið 1955 líður það seint úr minni. Ég var í vegavinnu þetta sumar og við lágum við í tjöldum, eins og þá var venjan. Ég svaf í gömlum hermannasvefnpoka, sem var stoppaður með einhverskonar vatttróði og ytra byrðið hrinti ekki frá sér vatni svo hægt væri að tala um. Svefnpokinn var rakur allt sumarið og þótt maður tæki hann með sér heim um helgar til að reyna að þurrka hann, náðist aldrei alveg rakinn úr honum. Það var déskoti hráslagalegt að skríða ofan í hann á kvöldin eftir að hafa staðið í rigninunni allan daginn á "tipp" eins og það var kallað að handmoka úr hlössunum. Svo tók nú steininn úr þegar kom að heyskapnum. Best að vera ekkert að rifja það upp.

[Sigurður Þór Guðjónsson, 24.11.2009 kl. 12:38]

Ég var einmitt að hugsa hvort hér væri ekki um valið úrkomutímabil að ræða en ekki kl. 9-9. En þetta gerðum við varðandi úrkomuna í Vík í Mýrdal í desember 1926 sem mig minnir að hafi verið látið standa sem Íslandsmet fram til þess er Kvísker fór að mæla. En hvað varðar breskan metaþjófnað er einsýnt að við verðum að setja utanríkisráðherra og umhverfisráðherra í málið og grípa til veðurhryðjaverkalaga gegn Bretum.