Og göturnar glitra...

Það er lítið jólalegt við það þegar blautar göturnar taka að glitra eins og oft hefur borið á síðustu dagana, a.m.k. hér suðvestan lands.  Mikil hálka hefur myndast á götunum, jafnvel þó svo að hiti í lofti sé 3 til 5°C. Sem sagt ekki frost. 

Þegar léttir til og vind lægir kólnar yfirborðið snögglega, jafnvel þó enn sé bjart af degi, en sólin gefur heldur lítinn varma á þessum árstíma. Hálka af þessari tegund, þ.e. þegar blautur vegurinn frýs er sérlega varasöm, ekki síst fyrir þær sagir að hún myndast oft á blettum eða stöðum sem kólna hraðar og fyrr en annars er. Ég hef kallað hana glerhálku eða glærahálku, en á ensku nefnist hún black ice.

Á laugardag var hitinn kl. 15 í Reykjavík +5°C.  Engu að síður tóku göturnar að glitra þegar létti til.  Vindur er oftast mældur í 10 metra hæð.  Þegar hann er orðinn minni en 3-4 m/s í þeirri hæð má fara að gera ráð fyrir lítilli loftblöndun niðri við jörð. Staðalhæð hitamælinga er í 2m hæð, en miklu getur munað á hitastigi niðri við jörð eins þegar skilyrði er hagstæð fyrir myndun hitahvarfa samfara örri kælingu yfirborðsins. 

Í morgun voru göturnar enn og aftur blautar eftir smá rigningu í nótt, síðan létti til og lægði.  Þá var ekki að sökum að spyrja og betra að fara varlega.  Hálkuvarnir m.a. af hálfu Vegagerðarinnar og líka sveitarfélaganna miðast mikið að því að eyða hálku sem myndast á þennan hátt og jafnvel að grípa til fyrirbyggjandi aðgerða, þ.e. að salta í þann mund sem nær að frysta.

 

Athugasemdir

[Ari (IP-tala skráð) 8.12.2009 kl. 03:01]

Veðurstofan hefur undanfarið spáð 10 m/s meira en það verður, þannig að það er lítið um hálkuspár frá veðurstofunni eða hvað? (reyndar spáir veðurstofan oftast hvassara en það er ef út í það er farið)

[Þorkell Guðbrands (IP-tala skráð) 8.12.2009 kl. 10:47]

Þetta er eiginlega alveg hárnákvæm lýsing á því hvernig ísingin myndaðist hér á götunum á þessu þorpi hér norður við Íshaf þar sem undirritaður býr. En hér eru götur hinsvegar aldrei saltaðar, en mestu umferðargatnamót eru hinsvegar hituð.

[Haukur Baukur, 8.12.2009 kl. 15:39]

Varð vitni að slysi í Skagafirði í gær vegna glærahálku.  Raki frá vötnunum leggist svona yfir vegina.  Höfðum lengi ekið á blautum vegi, og í ca 10° krappri beygju fór bíllinn á undan okkur útaf og valt.  Erfitt var að stoppa okkar bíl, og þegar við ætluðum að hlaupa og aðstoða var ekki stætt á malbikinu.  Vegurinn leit út eins og blautt malbik en það var nokkurra millimetra þykkur, alveg glær ( loftlaus ) ís á öllu.  Veit ekki hver loftþrýstingurinn var, hitinn samkvæmt mæli í bílnum var um 2,5°C, og stafalogn.

 Má geta þess að upplýsingasími Vegagerðarinnar kallaði færðina í gær  "Leiðinda ísingu". 

Sem bifhjólamaður þá snerti ég ekki hjólið ef lofthiti er á bilinu 0-4°C, því raki og vatn við þessar aðstæður eru nánast óútreiknanleg.