Hálkan myndast þó það sé hiti á mælum

Glærahálkan sem myndaðist á Höfuðborgarsvæðinu í nótt og reyndar víðar er enn eitt dæmið þetta haustið af ísingu á yfirborði þrátt fyrir það að hiti í lofti sé vel ofan frostmarks.  Í nótt var mældur hiti í Reykjavík þannig +4 til 5°C þegar tók að frysta við yfirborð.

Atburðarrásin var nokkurn veginn þessi:

Á miðnætti er skráð skúr í veðurathugun í Reykjavík.  Strax næstu klukkustund eða svo léttir til.  Þá er sæmilegur blástur eða um 5 m/s á Veðurstofunni og hiti um 5 til 6 stig.  Til kl. 03 lægir heldur og þá mælist vindurinn um 2-3 m/s (í 10 metra hæð vel að merkja). Eftir mínum upplýsingum fór þá strax að bera á hálkumyndun og fljótlega í kjölfarið var komin fljúgandi hálka um allt Höfuðborgarsvæðið.

Þó svo að það hafi virst að blásturinn væri nokkuð viðvarandi, þarf ekki nema augnablik þar sem hann hægir lítið eitt á sér og fer niður fyrir 3-4 m/s.  Þá er ekki lengur til staðar  sú loftblöndum í neðstu sentímetrum við jörð sem er forsenda fyrir því að halda við yfirborðshitanum.  Þegar þetta lítið er um ský og loftið tiltölulega þurrt verður kæling yfirborðsins mjög ör.  

Göturnar voru rennandi blautar, skúr síðast á miðnætti.  Það sem vekur mesta athygli mína er að ísingin virðist myndast þó svo að dálítil gola sé í lofti.  Það þarf með öðrum orðum ekki gera allt að því logn til þess að fá hálkumyndun. Það meira að segja þó svo að hitinn í 2 metra hæð sé langt ofan frostmarks !  Geislunarþátturinn er allsráðandi eða sú staðreynd að ský hverfa fljótt af himni í kjölfar úrkomunnar.   

Meðfylgjandi línurit frá VÍ sýnir samfelldar mælingar á vindi, hita og fleiri þáttum síðasta sólarhringinn á Reykjavíkurflugvelli.  Á Veðurstofunni við Bústaðaveg var ekki að sjá sömu minnkun í mældum vindi á milli kl. 00 og kl. 03.  Svipað var á sjá á Korpu, en í þéttbýlinu eru vindaðstæður vissulega afar breytilegar og ekki að efa að í mörgum húsagötum hefur lognið verið meira, ef taka mætti svo til orða.  

Athugasemdir

[Þorkell Guðbrands (IP-tala skráð) 10.12.2009 kl. 10:08]

Allt kom þetta heim og saman hér um slóðir. Þegar ég labbaði í vinnuna rétt upp úr kl. 06:00 í morgun, var að byrja að létta til og vindur sáralítill. Ég skrapp hér aðeins út um hálf níu leytið og þá var orðið flughált á götum og gangstéttum. Sjálvirka veðurstöðin hér á flugvellinum gefur upp 6 m/s af SV klukkan 09:00 og þá er hitinn í 2ja metra hæð +2,9°C, hefur lækkað úr +5,3°C sem voru á miðnætti s.l. Svoleiðis er það nú.

[Þorkell Guðbrands (IP-tala skráð) 10.12.2009 kl. 10:09]

Tvær leiðréttingar á fyrra innliti. Í fyrsta lagi er stöðin á Alexandersflugvelli sjálfvirk en ekki sjálvirk og hinsvegar kom ekki fram að þarna upp úr kl. 06:00 var engin hálka á götum og gangstígum.