Óvenju skýrar línur í útlitinu til jóla

Það háttar þannig til nú í veðrinu að þróun næstu daga og fram yfir helgina er betur fyrirséð en oft áður um þetta leyti árs.

Nú er mikil fyrirstöðuhæð yfir landinu og hlýtt loft fylgir henni í hæð, þó svo að niðri við jörð sé tekið að kólna í dauðhægum vindinum og heiðríkjunni.  Eins og svo oft áður þegar þessi staða kemur upp, berst hæðin til vesturs um leið og hún koðnar smámsaman niður, enda engar forsendur fyrir viðhaldi slíkra háþrýstisvæða langt norðan sinna kjörsvæða ef svo má taka til orða.

Spákortið til vinstri er úr Bandarísku GFS spánni og gildir kl. 06, í fyrramálið (16. des).

Hitt spákortið (til hægri) gildir kl. 18 á laugardag, 19. des. 

Á fimmtudag og föstudag opnast fyrir streymi af köldu og fremur þurru lofti úr norðri og hér herðir frostið.  Éljagangur norðan- og norðaustanlands, en áfram úrkomulaust og bjartviðri sunnan- og suðvestantil. Líklegt er að þetta ástand með kaldri N- og NA-átt  haldi a.m.k. vel fram í næstu viku eða langleiðina til jóla. Því er spáð að lægð sem til verður upp úr heimskautaloftinu hér norðurfrá berist ti suðurs fyrir austan Ísland og viðhaldi þannig aðstreymi af köldum lofti.  Ekki er ólíklegt að snjói nokkuð austan- og norðaustanlands á meðan lægðin fer hjá til suðurs, líklega á sunnudag. Á meðan á þessu varir er hlýtt og rakt loft langt í suðri á austurleið inn yfir Spán, Portúgal og Miðjarðarhafið.  Grænlandshæðin verður þegar þarna er komið við sögu orðin ansi öflug og beinir áfram heimskautalofti til okkar fram í næstu viku.

Annað hvort verður það ástand viðvarandi inn í jólahátíðina og þá helst alveg úrkomulaust um sunnanvert landið frá því í dag og næstu 10 dagana eða svo.  Vaxandi éljagangurinn næstu dag tryggir hins vegar snjór fyrir norðan og austan.  Einnig norðantil á Vestfjörðum.

Hitt sem getur allt eins gerst og oft sést þegar NA-átt gengur niður að vetri til, en það er að smálægðir eða drög myndast fyrir sunnan og suðvestan land yfir tiltölulega hlýjum sjónum. Berist þau upp að landi snjóar (eða gerir slyddu á láglendi) á Suðurlandi og/eða við Faxaflóa.  Þessi gæti orðið raunin frá og með 22. eða 23. des.

Samantekið:  Yfirgnæfandi líkur eru á því að það snjói nokkuð norðan- og austanlands til jóla og einnig að sá snjór haldi, því alvöru bloti eða þíða er næsta óhugsandi eins og staðan er nú.  Þó svo að flest bendi til þess að veðráttan haldist alveg þurr sunnan- og suðvestanlands fram til 21.-22.des, er meira vafamál hvað gerist síðustu dagana fyrir jól hæglega gæti sett niður einhvern snjó, en hvar og hvenær er ómögulegt að geta sér til um fyrr en nær dregur. 

 

 

Athugasemdir

[Sigurður Þór Guðjónsson, 15.12.2009 kl. 12:39]

Það verður líka skítakuldi með þessu. Í Reylkjavík verður komið um 5 stiga frost á sunnugag og það hlánar ekki allan sólarhringinn í marga daga um allt land. Snjór fyrir norðan og austan og kannski snjóar líka fyrir sunnan. Það er mikil breyting frá því sem verið hefur. Samt mun fjöldi fólks fagna þessu veðri, kulda og vetrartríð, sem standa mun í a.mk. allmarga daga. Og taka það langt fram yfir það milda veðurlag sem verið hefur undanfarið. Hvað er eiginlega að fólki að fagna slíku þó einhver jól séu framundan.  

[Þorbjörn (IP-tala skráð) 15.12.2009 kl. 13:34]

Bravó!

[Þráinn Maríus (IP-tala skráð) 15.12.2009 kl. 17:56]

Sæll Einar.

Ég hef verið að vinna úti á Grænlandi og varð vitni af al sérstökum skýjum sem komu með miklu roki og hita!! Getur þú sagt mér hvernig stendur á svona skýjum?

Hér ér linkur á mynd af þeim,,, Hér!

Takk fyrir!