Í dag, sunnudag hefur maður getað fylgst með myndun heimskautalægðar af svæsnari gerðinni. en það sem gerir hana líka sérstaka er staðsetning hennar, þ.e. hve sunnarlega hún er.
Á tunglmynd SEVERI frá kl. 21 (20. jan 2012) má sjá skýjakerfi þessarar lægðar djúpt SV af Reykjanesi. Upprunan má rekja til aðstreymi af svellköldu heimskautalofti frá Kanada austur á Atlantshaf og tengsl sem við háloftakjarna eða mikla háloftlægð sunnarlega á Grænlandshafi.
Heimskautalægðir eru af nokkrum gerðum og sú sem nú á í hlut getur oft af sér þær umfangsmestu. Það sem einkennir flestar heimskautalægðir er að myndun þeirra á sér stað þegar mjög kalt loft streymir yfir opið haf og orkugjafinn (eða fallvaldur loftþrýstings við sjávarmál) er að verulegum hluta gufunarvarmi úr sjónum. Að því leytinu til svipar þeim til fellibylja þar sem "bensínið" er sjálfur gufunarvarminn. Heimskautalægðir tapa líka oftast lögun sinni og styrk um leið og þær berast upp að landi.
Þessi sem við sjáum á tunglmyndinni frá í kvöld á sér skamma myndunarsögu frá því í morgun. Samspil háloftalægðarinnar, aðstreymis heimskautalofts úr vestri yfir sjó og iðu, þ.e. hringhreyfingu í um 1.000 til 2.000 metra hæð skapar lægðina. Sunnan við miðju hennar mátti síðdegis áætla veðurhæð í V-átt um 32-35 m/s rétt sunnan við þann stað þar sem stendur 30W. Norðan við sjálfa miðjuna hins vegar A 25-30 m/s á enn afmarkaðra svæði. Kortið hér að neðan úr safni ECMWF sýnir vel hvað um ræðir, nema að þar er tekinn út vindhraði í 100 metra hæð kl. 15. Gulu tölurnar er áætlaður mesti augnabliksvindur.
Við þurfum engar áhyggjur að hafa af því að þetta fyrirkæri komi nærri okkur. Það má segja að meginskilin fyrir suðvestan landið og sjá vel á tunglmyndinni "verji" okkur um sinn fyrir allri framrás kalda loftsins úr vestri. Þar fyrir utan er líftími heimskautalægða stuttur og er þegar búin með sitt mesta velmektarskeið.
17.1.2013
Hávetur á norðurhveli, en varla hér ?
Um þessar mundir kemst vestanvindurinn í háloftunum í sína suðlægustu stöðu og þar með braut lægða austur yfir Atlantshafið. Að jafnaði fljótlega í byrjun febrúar tekur hann að hrökkva til baka til norðurs. Þessi suðlæga staða vestanvindsins kemur m.a. fram í veðurfarinu við Miðjarðarhaf með bleytutíð eða kulda í Flórída o.s.frv.
Spákortið (frá HIRLAM af Brunni VÍ) sem sem hér fylgir sýnir einmitt stöðuna í háloftunum og gildir á morgun (18. jan) kl. 12. Það sýnir 300 hPa jafnþrýstiflötinn í um 8 til 9 km hæð. Vert að að taka eftir nokkrum athyglisverðum þáttum:
1. Mikil háloftalægð er vestur af Grænlandi með miðju yfir N-Labrador. Hún er á þekktum slóðum á miðjum vetri, dýpt hennar og umfang ræður miklu um legu og stefnuna á skotvindinum fyrir sunnan hana. Háloftalægð þessa hefur Trausti Jónsson gefið nefnið Stóri-Boli og hann fjallað talsvert um á sínum Hungurdiskum. Oftast nær háloftalægðin hvað mestu umfangi um nokkurt skeið í janúar áður en hún fer aftur að láta aðeins undan. Á því eru þó mikil áraskipti.
2. Skotvindurinn eða kjarni vindrastarinnar í þessar hæð verður rétt norðan við Nýfundnaland á morgun. Gríðarlega öflugur og styrkurinn ræsta af hitamuninum á milli háloftalægðarinnar og heittempraða loftsins sem heldur sig sunnar. Skotvindurinn er vestanstæður og og hann getur af sér djúpar lægðir þar sem dálítil lægðarsveigja kemur á strauminn. Ein slík verður á ferðinni suður á Atlantshafi á laugardag.
3. Í þessu mynstri háloftastraumanna og bylgnanna sem hreyfast til austurs hefur orðið stífla við Ísland. Lítil grein með SA-vindi blæs yfir landinu og dálítil aflokuð hæð er hér norðausturundan. Þessi staða sem upp er komin hefur einkum tvennt í för með sér. Í fyrsta lagi ná ekki djúpu lægðirnar sem hitamunurinn og skotvindurinn geta af sér hingað til lands. Þær ýmist berast til austurs langt suður í hafi eða það sem er sennilegra að þær dýpka mjög langt suðvestur í hafi og hringsnúast þar um sig sjálfar. Um leið viðhelst hæðarhryggurinn og SA-áttin í öllum loftlögum hér við land. Hin afleiðingin er sú að fyrirstöðuhæðin kemur líka í veg fyrir að poki úr háloftalægðinni berist fyrir Hvarf eða yfir Grænland með SV-vindum með tilheyrandi éljaveðri sem er annars algengt veðurlag um þetta leyti vetrar (saman með fari lægða) yfir eða til austurs með landinu.
Svo er að sjá sem þetta meginmunstur verði ríkjandi hér a.m.k. fram undir miðja næstu viku. SA-átt því lengst af, stundum nokkuð hvöss og milt á landinu, án þess að hægt sé að tala um stórtækan vetrarblota í því sambandi. Talsverð væta verður líka um sunnan og vestanvert landið, en stunum ná kuldaskil inn á landið og birtir upp kólnar vestantil um stund, en sækir síðan aftur í sama farið.
Vísindi og fræði | Breytt s.d. kl. 13:55 | Slóð | Facebook | Athugasemdir (2)
3 eru látnir og yfir 10 alvarlega slasaðir í einu umfangsmesta umferðarslysi síðari ára í Svíþjóð. Þær eru svakalegar myndirnar sem má sjá á fréttamiðlum frá þessum atburði á Tranarps-brúnni á E4 hraðbrautinni við Klippan á Skáni (sem er bær, en ekki IKEA sófi).
Það var um kl. 11 að staðartíma sem óhappið varð og sýna myndir af fremstu bílum að flutningabíll með aftanívagn lagðist þvert á veginn eins og sjá má á meðfylgjandi mynd sem fengin er af vef Sydsvenskan. Næsti bíll keyrði á og koll af kolli enda þung umferð einkum flutningabíla á þessari leið í áttina til Helsingjaborgar. Þeir sem sluppu óskaddaðir segja að hryllingur hefði verið að heyra stöðugt nýjan og nýjan smell eftir því sem fleiri bílar komu æðandi inn í "kássuna".
Engin er áin, en brú þessi er í raun byggð til að lyfta veginum yfir lægð í landinu, eða svæði sem einhverra hluta vegna þykir heppilegra að leggja hraðbrautina yfir. Veðrið í morgun var með þeim hætti að á Skáni gekk á með éljum í hægum vindi en á loftmyndum má sjá að hin akreinin (sú til austurs) hafði greinilega verið hreinsuð. Frost var um 4 til 6 stig og í fréttum er sagt að þoka (s.dimma) hafi verið þegar slysið varð. Myndirnar sýna líka þokuslæðinginn undir brúnni eftir að henni hafði létt mikið á slysstaðnum.
Veðuratburðarrásin var líkast til þessi:
Bakki mé éljum gekk yfir í morgun og snjórinn var hreinsaður og þykir mér líklegt að það hafi verið hálkuvarið um leið, sem þarf þó ekki að vera. Rakastigið var hátt eða 90% í Helsingjaborg. Vindur SV-stæður, hægur eða um 2 m/s. Í úrgeisluninni kólnaði við yfirborð, rakinn þéttist og myndaði hrímþoku. Þokan nær upp fyrir brúargólfið á endanum og héla fellur á gólfið eða veginn og myndar ísingu. Þegar fyrsti bíllinn rennur til og stöðvast þvert á veginum sjá þeir næstu ekki nema takmarkað fram fyrir sig vegna þokunnar og skiptir engum togum þó bremsað sé.
Einn viðmælanda sem slapp óskaddaður frá þessu sagði að þetta hefði líkst því helst að skautar hefðu verið settir undir bílinn. Annar úr lögreglunni/slökkviliðinu sagði að skyggni hefði ekki verið nema um 20 metrar og þá hafi þokan verið víðan en aðeins við sjálf brúnna.
Það er alþekkt að brýr eru sérlega varasamar vegna ísingarmyndunar. Meðal annars kólna þær hraðar en sjálfur vegurinn. Það hefur þó ekki átt við í þessu tilviki. Mér þykir líklegast að lágþokubakkinn með jörðinni hafi einfaldlega vaxið lóðrétt upp fyrir brúargólfið með tilheyrandi áfalli hélu í frostköldum andvaranum sem þarna var.
Ég fylgist þó áfram með skýringum þeirra sænsku, en á blaðamannafundi fyrr í dag vildu menn sem minnst segja um orsakir. Hér er tengill á myndbút úr lofti sem sýnir vettvang og aðstæður vel.
Fleiri óhöpp og slys voru á hraðbrautum S-Svíþjóðar í dag sem rekja mátti til veðurs og hálku.
Viðbót 17. janúar. Sænskir vefmiðlar segja að einn hafi látist, en 45 voru fluttir á sjúkrahús til aðhlynningar. Brúin er um 550 m löng og byggð 1996. Hafur hlotið verðlaun fyrir hönnun og umhverfislausnir, en er slysagildra á veturna vegna ísingarhættu vegna tíðrar hrímþoku. Hið 83 km vatnsfall Rönne å á Skáni (22 rúmmetrar á sek) flæðir undir brúnna, en eingöngu í vatnavöxtum og farvegurinn er því oftast þurr.
Vísindi og fræði | Breytt 16.1.2013 kl. 08:23 | Slóð | Facebook | Athugasemdir (0)
13.1.2013
Ársúrkomutölur fyrir austan
Nú um helgina flutti ég tvo fyrirlestra um staðbundið veður austanlands á vegum Austurbrúar á Egilsstöðum og í Neskaupstað og kostuð voru að hluta af Afli starfsgreinafélags og SÚN á Norðfirði. Góð þátttaka var á báðum stöðum og fínar umræður spunnust um sérkenni veðurs á Héraði annars vegar og Austfjörðum hins vegar.
Eitt af því sem ég sýndi voru súlurit yfir ársúrkomu síðustu áratugina og fylgja þau hér með sem myndir. Annars vegar voru það gildi ársúrkomunnar Á Dalatanga frá 1949 til 2012 unnin upp úr gögnum sem sótt voru einfaldlega af heimasíðu VÍ hér. Hin ársgildaröðin var frá Grímsárvirkjun á Völlum, 1960-2011, gögn sótt á sama hátt. Fyrir ókunnuga er virkjun þessi nokkru innan við Egilsstaði.
Ársúrkoman á Dalatanga er um það bil tvöföld sú sem hún er við Grímsárvirkjun og er það nokkuð dæmigert hlutföll úrkomunnar á milli Héraðs og fjarðanna. Sé reiknuð leitni yfir þessu tímabil sem ekki eru alveg þau sömu kemur í ljós að úrkoman síðust ártugi er talsvert vaxandi og er vöxturinn áþekkur á báðum þessum mælistöðum eða um 50 mm á áratug. Í raun er það ótrúlega mikill aukning og fær nær örugglega ekki staðist yfir enn lengra tímabil. Hlutfallslega er aukningin meiri fyrir Grímsárvirkjun eða af stærðargráðunni 35-40% á um 50 árum.
Við mat á leitni skipir miklu val á tímabili og hversu langt það er. Hægt er að hafa áhrif á leitni með "réttu" vali á upphafsárum. Það var þó ekki gert hér, 1949 er einfaldlega fyrsta aðgengilega árið í á Dalatanga í gagnasafni VÍ og mælingar á hinni úrkomustöðinni hófust um mitt ár 1959. Þó er vitað m.a. frá Teigarhorni sunnar á Austfjörðum að þar mældist hlutfallslega nokkuð mikil ársúrkoma flest árin upp úr 1930. Hefðu þau verið aðgengileg má ætla að leitnin hefð reiknast nokkru minni á þessum stöðvum.
Í greinargerð frá árinu 2003 (Trausti Jónsson, Langtímasveiflur II. Úrkoma og úrkomutíðni) reiknast leitni ársúrkomunnar á Teigarhorni hafa verið um 11 mm á áratug miðað við 1873 til 2001 sem er á svipuðu róli og í Stykkishólmi fyrir sama tímabil.
En ef úrkoman er hefur verið þetta vaxandi á Dalatanga frá því um miðja síðustu öld eða síðustu rúmlega 60 ár, hvað segir þá hitinn okkur ? Á Dalatanga nemur hlýnunin ekki nema 0,1°C á áratug sem er heldur minna þar en víðast annars á landinu. Aukningin í úrkomunni fyrir austan verður því ekki að nema óverulegu leyti skýrð af hækkandi hita. Aðrir þættir eru þar valdandi og e.t.v. í ætt við þá sem Trausti nefnir í lokaorðum þessarar 10 ára gömlu greinargerðar sinnar að úrkoma um norðaustanvert landið sé einkum háð loftþrýstingi. Hins vegar þegar litið er á leitni ársþrýstings á sama hátt og úrkomu og hita kemur í ljós að litlar breytingar hafa orðið á þessu tímabil. Meðalloftþrýstingur hefur þó aðeins farið lækkandi, en varla getur það talist marktækt.
Þá stendur eftir sú ósvaraða spurning. Hvað er það sem orsakað hefur greinilegri aukningu ársúrkomunnar á Austurlandi (a.m.k. á Dalatanga og við Grímsárvirkjun) síðustu 50 til 60 árin ?
Vísindi og fræði | Breytt 14.1.2013 kl. 08:02 | Slóð | Facebook | Athugasemdir (0)
Leysingarkaflinn sem enn varir og hófst 2. janúar hefur verið vel hlýr. Fyrsti dagur ársins var kaldur en þrátt fyrir það er meðalhiti þessa fyrsta þriðjung (tæplega þó) mánaðarins um 4 stigum yfir janúarmeðaltalinu 1961-1990 í Reykjavík og á Akureyri. Hámarki náði þessi kafli í hita 4. til 5. janúar. M.a. mældust þá rúmar 11 gráður á Akureyri.
En nú lítur út fyrir að milda loftið fjari smámsaman út næstu dagana um leið og styrkur S-áttar í háloftunum dvínar. Á sunnudag eru síðan horfur á köldu háloftadragi vestrænnar ættar og með því verður éljagangur og jafnvel snjókoma á landinu, einkum vestantil. Á meðfylgjandi spákorti (ECMWF af Brunni VÍ) má sjá þennan kalda "vasa" í rúmlega 5 km hæð við landið á sunnudag. Hann stoppar heldur stutt við. Heildregnu línurnar eru síðan þrýstingur við yfirborð.
Framhaldið er síðan mikið til óráðið og óvissa kannski meiri en oft áður. Langtímareikningar hafa sumir gert ráð fyrir að í nágrenni Íslands byggist upp talsverð fyrirstöðuhæð og þá með veðurlagi sem einkennist af kulda til landsins, hreinviðri og lítilli úrkomu. Aðrir reikningar gera hins vegar ekki ráð fyrir að slík fyrirstöðuhæð nái að rísa og lægðagangur verði fyrir sunnan og austan landið með NA-átt og hríðarveðri norðan- og austanlands. Nánast eins og svart og hvítt, en þó má segja að áframhaldandi leysing með suðlægu lofti sé heldur ólíkleg eftir helgina. Það verður bara eitthvað annað eins og sagt er á boðstólnum í veðri landans.
Það er hásumar á suðurhveli jarðar, samsvarandi 8. júlí norðurslóðum. Hitabylgjan sem nú skekur Ástralíu hófst fyrir alvöru 4. janúar þegar háþrýstisvæði beindi mjög heitu lofti úr norðri yfir alla suðuaustur Ástralíu þar sem stóru borgirnar Sydney og Melbourne eru. Frá því um jólaleytið hafði verið mjög heitt í suðvesturhluta landsins í Viktoríu og þar um slóðir.
Það tekur nokkra stund að átta sig á spákortinu sem hér fylgir og fengið er af síðu weterzentrale.de. Um er að ræða GFS spána, en hún er reiknuð hnattrænt. Rýna þarf í kortið til að greina Ástralíu. Neðarlega fyrir miðju er Tasmanía og niðri í hægra horninu Nýja Sjáland. Litirnir túlka hita í 850 hPa fletinum í um 1.400 til 1.500 metra hæð. Innan bleika svæðisins er meira en 25 stiga hiti upp í þessari hæð. Hugsið þig ykkur bara ! Þá þarf ekki að koma á óvart að hiti við yfirborð þar sem sólin sendir brennandi geisla sína sé um og yfir 40°C. Hæsta talan sem ég hef fundið enn á skrám Áströlsku Veðurstofunnar er 48,2°C í Eucla (3. janúar). Sá staður er ekki inn í miðju landi, heldur strandbær fyrir miðri suðurströndinni.
Takið líka eftir því að norðar og nær miðbaug er ekki þetta heitt loft yfir, heldur ekki yfir Kyrrahafssvæðunum austar. Ástæða þessa er að sólin bakar skraufþurrt landið og eyðimerkurnar í Ástralíu. Varminn stígur upp og þess vegna sjáum við þennan mikla lofthita í þessari hæð. Yfir hafinu hins vegar eða frumskógareyjunum við miðbaug fara geislar sólar að miklu leyti í uppgufun eða þá hægfara upphitun sjávar.
En það sem ég vil benda sérstaklega á í þessu sambandi er sú staðreynd að samkvæmt almanakinu er sól næst jörðu dagana um 4. janúar ár hvert. (2. jan í ár.) Braut jarðar er sporöskjulaga um sólu og fjærst er hún þegar er hásumar á norðurhveli (5. júlí 2013). Fjarlægðarmunurinn er talsverður, sem nemur um 5 millj. km. til samanburðar við þvermál jarðar sem er um 12,5 þús km. Stærðarhlutföll á meðfylgjandi skýringarmynd eru því verulega ýkt. Orkuflæði sólar til jarðar er um 6,8% meira um þetta leyti árs, en er í byrjun júlí þegar jörð er fjærst sólu. Norðurhjarinn finnur nánast ekki neitt fyrir jarðnándinni, enda sólin lágt á lofti og geislarnir dreifast mjög á langri vegferð um lofthjúpinn til yfirborðs.
Ástralir fá hins vegar að kenna á þessu. Þessi árstíðabundni breytileiki í orkuflæði sólar til jarðar er ansi stór þó svo að hann jafnist vissulega út í hita jarðar á lengri tíma. 11 ára sólblettasveiflan veldur þannig ekki nema um 0,1% aukningu í orkuflæðinu.
Þessi mikla hitabylgja er fyrst og fremst í Ástralíu. Annars staðar í Eyjaálfu virðist ekki vera sérlega hlýtt. Ég ber þó ekki skynbragð á hitafarið um þessar mundir nyrst á Nýja Sjálandi, hvort þar sé hlýrra en vænta má um hásumar.
En ég veit hins vegar að hjá Vilborgu Suðurpólsfara er alls ekkert sumarveður þrátt fyrir nálæga sólina sem aldrei sest um þessar mundir syðst á jarðarkringlunni.
Í norðanáhlaupinu sem stóð linnulítið frá 29. til 31. desember áttu sér stað gríðarmikil varmaskipti frá hafi til lofthjúps. Ískalt heimskautaloftið drakk í sig varma frá mun hlýrra hafinu.
Orkuskiptin verða með tvennu móti annars vegar vegna beinnar snertingar og hins vegar vegna uppgufunar vatns sem á sér stað í verulegum mæli þar sem heimskautaloftið innihélt eins og oftast ávið svipaðar aðstæður mjög lítinn raka. Var með öðrum orðum þurrt. Trausti Jónsson gerði að umtalsefni þessar stærðir sem um var að ræða og vísast frekar til þeirrar umfjöllunar. Þegar varmaflæðið var í hámarki nam það um og yfir 1.000 wöttum á fermetra á stórum hafsvæðum fyrir norðan og vestan landið. Það jafngildir því að við tækjum 1.000 W hellu á eldri gerðum eldavéla og teigðum hana og toguðum þar til flötur hennar næði einum fermetra .
Það segir sig sjálft að þetta er mjög mikið varmaflæði. Áhugavert væri að reyna að komast að því hvort yfirborð sjávar hefði ekki kólnað í kuldakastinu.
Skoðum tvær "myndir" frá My Ocean haf- og hafísstrauma líkani því sem aðgengilegt er á Brunni Veðurstofunnar. Þarna eru dregnar inn jafnhitalínur og hafís þekur hafsvæðin í norðvestri. Fyrra kortið sýnir ástand mála eins og það var áður en hann brast á eða 26. desember. Rétt er að geta þess að yfirborðshiti sjávar er ekki mældur beinlýnis, heldur mynda linsur veðurtunglanna yfirborðshita jarðar. Sú aðferð þykir góð, en vitanlega fæst ekki með henni upplýsingar um ástand mála undir yfirborðinu. Þannig er allt eins líklegt að kaldi sjórinn á Grænlandssundi suður af ísjaðrinum sé aðeins þunnt lag ofan á hlýrri sjó á meira dýpi.
Neðri myndin er frá 1. janúar eða eftir að vindur var að mestu gengin niður. Með samanburði á þessum tveimur stöðumyndum með 6 daga millibili sést að kortin eru keimlík. Reyndar má sjá að ísinn hefur heldur rekið til suðurs og yfir það svæði þar sem árur var kaldur yfirborðssjór. Hins vegar er kæling sjávar norðan við landið vart merkjanleg. Með góðum vilja má sjá að belti úti fyrir öllu Norðurlandi þar sem hitinn er +4°hefur mjókkað og er við það að slitna í sundur vestur af Grímsey.
Auðvitað kemur það okkur spánskt fyrir sjónir að breytingarnar séu ekki meiri eftir allan atganginn og gríðarlegu varmaflæði frá hafi til lofts. Vissulega kólna yfirborðslögin og þar sem hitinn er litlu hærri en frostmark sekkur yfirborssjórinn(svo fremi að hann sé fullsaltur). Aukin þyngd við kælingu veldur djúpsjávarmyndunninni eins og þessi blöndun er oftast kölluð.
Ég hef teiknað inn örvar sem eiga að sýna innflæði af söltum hlýsjó með Irmingerstraumnum fyrir vestan land. Þessi kvísl Norðuratlantshafsstraumsins (stundum rangnefndur sem Golfstraumur) er öflug og flytur geysilegt magn af varma inn á norðurmið. Í kjarna hans er hiti 5-6°C og streymið í þessu mikla sjávarfljóti ef svo mætti kalla það er að jafnaði um 1 milljón rúmmetra á sekúndu. Til samanburðar er allt afrennsli af Íslandi, allar ár og fljót til sjávar auk grunnvatns um 4.800 rúmmetrar á sekúndu að jafnaði yfir árið. (WaSim vatnalíkan 1961-1990) Það gerir ekki nema um 1/2 prósent af Irmingerstraumnum.
Það má því halda fram með réttu að mikið varmaflæðið sem varir í nokkra daga breytir litlu, því af nægu sé að taka á meðan "heiti kraninn" helst opinn. Hluti rennslisins er sjálfvirkur ef svo má segja, eða færiband sem fæðir norðurhöf í stað þess salta sjávar sem sekkur undan eigin þunga við kælingu frá umhverfinu.
En ef sjávarhiti fellur ekki við endurtekna slíka atburði eins og við horfðum á hér undir lok ársins, með hvaða hætti nær sjávarkuldi þá til landsins ? Svarið við þeirri spurningu er kannski ekki einhlýtt, en nái hafísinn verulegri útbreiðslu nær landinu skilur hann eftir við bráðnun kaldari (og minna saltan) yfirborðssjó. En Irmingerstraumurinn sjálfur hverfur þó ekki. Innstreymið er enn til staðar en nær bara ekki til yfirborðsins eða þess hluta sjávarins sem mótar einmitt veðráttuna. Vissulega eru líka sveiflur í hafstraumunum, en mælingar hafa þó sýnt fram á það að yfir lengra tímabil eru þeir eins og Irmingerstraumurinn nokkuð stöðugur hvað heildarflæði áhrærir.
2.1.2013
Helstu veðurminni ársins 2012
Hvað var markverðast í veðrinu og tíðarfari ársins 2012 ?
Hér fara á eftir helstu veðurminni ársins 2012 að mínu mati. Ítarefni um tíðarfarið (bráðabirgðayfirlit) má lesa í pistli hjá Veðurstofunni hér.
Í þættinum; Samfélagið í nærmynd, á dagskrá rásar 1 í dag er viðtal við mig um sama efni. Það er upptekið frá því fyrir jól af því að ég sjálfur er ekki á landinu. Þar vantar því vitanlega að geta um síðustu og afar viðburðaríka daga ársins.
Mikil snjóþyngsli sunnan og vestanlands í janúar
Í Reykjavík var mesti snjór í janúar sem komið hefur í einstökum vetrarmánuði frá því í febrúar 2000. Snjóþungt og erfiðar samgöngur voru einkum sunnan- og vestanlands. Aðalleiðir lokiðust ítrekað vegna snjóþyngsla og slíkt hefur ekki gerst t.d. á Hellisheiði frá því 1989.
Úrkomusamur vetur og met
Mánaðarúrkoma í Vestmannaeyjum mældist mjög mikil í janúar eða 314 mm (Stórhöfði). Er það mánaðarmet frá upphafi mælinga 1921. Mjög úrkomusamt var fyrstu þrjá mánuði ársins, sérstaklega sunnan- og vestanlands. Í Reykjavík komu aðeins 4 þurrir dagar í febrúar og mars.
20,5°C þann 29. mars
Í miklum hlýindum samfara V-átt var sett hitamet marsmánaðar á veðurstöð. 20,5°C á Kvískerjum 29. mars er langhæsti hiti sem mæst hefur í mars. Fyrra metið var 18,8°C.
Skörp straumhvörf með apríl
Það skipti alveg um tíðarfar í byrjun apríl á landinu og í stað stormasamrar veðráttu með S- og V-áttum tók við hæglætistíð og með þurru veðri. Ekki var einn einasti alvítur dagur á Akureyri og þá heldur ekki í Reykjavík. Víða á landinu var meðalhiti lægri í apríl en í mars og er slíkt fremur óvenjulegt.
Krossmessuhretið í maí
Um miðjan maí gerði vont N- og NV-hret með mikilli ofankomu austanlands. Þannig mældist 30 sm snjódýpt í Neskaupstað að morgni 15. maí. Næturfrost þetta vorið voru þrálát, norðanlands langt fram í júní og háði gróðurframvindu.
Óvenjuþurrt framan af sumrinu – met í Stykkishólmi
Þurrkarnir frá því síðustu vikuna í maí og fram undir lok júlí þóttu sæta talsverðum tíðindum. Úrkomuleysið háði grassprettu verulega og þó sennilega hvergi eins og á Norðurlandi eystra. Í júní mældist úrkoma aðeins 0,6 mm í Stykkishólmi og aldri mælst svo lítil í þeim mánuði frá upphafi mælinga 1857.
Hitabylgjan austanlands í ágúst
Norðaustan- og austanlands gerði sjaldséða hitabylgju, a.m.k. í seinni tíð, dagana 7. til 11. ágúst. Hæstur varð hitinn í 28.0°C á Eskifirði þann 9. og var það jafnframt hæsti hiti ársins.
Afar sólríkt sumar
Mjög sólríkt var meira og minna frá því í maí og fram í september. Samanlagðar sólskinsstundir hafa á þessum tímabili aldrei talist fleiri í 90 ára sögu sólskinsstundamælinga. Það á bæði við um Akureyri og Reykjavík. Fyrir mánuðina maí til ágúst samsvara mælingar því að til jafnaðar hafi sólin náð að skína yfir 8 klst. dag hvern í Reykjavík.
Fjárfellisáhlaupið 9. til 11. september
Óvenjulega snjóa í norðankasti varð norðanlands þetta snemma haustsins dagana 9. til 11. september og fé grófst í fönn í stórum stíl. Raflínur sliguðust undan ísingu og ollu víðtæku rafmagnsleysi og skemmdum. September þótti fádæma úrkomusamur í Skagafirði og í Eyjafirði.
Stillt í október
Eftir skakviðrasaman september tók við sérlega hægviðrasamur október, sá stilltasti í áratugi. Ríkjandi voru N-áttir og hár loftþrýstingur meira og minna allan mánuðinn. Hiti var víða undir meðaltalinu 1961-1990, rétt eins og september.
Höfðatorgsbylurinn
Einkar slæmt og langvinnt norðanhret sem náði hámarki 2. nóvember með foktjóni. Veðrið má kenna við nýlegt háhýsi við Höfðatorg í Reykjavík þar sem vindar feyktu fólki á ferli.
Ekki sést annar eins snjór norðanlands í nóvember
Óvenju snjóþungt var norðanlands í nóvember og muna menn ekki annað eins svo snemma vetrar. Alhvítt var á Akureyri alla daga mánaðarins og er það nánast einsdæmi (líka 1969). Eftir því var tekið að þrjár helgar í röð var illviðri og með ófærð og samgöngutruflunum norðanlands.
Sólarhringsúrkomumet í Reykjavík
Að morgni 29 desember kom í ljós að uppsöfnuð sólarhringsúrkoma í Reykjavík var 70,1 mm. Hún féll til að byrja með sem snjór, síðan slydda og að endingu rigning að mestu í nánast logni. Þessi mikla úrkoma í Höfuðborginni kom nokkuð flatt upp á menn í aðdraganda NA-áhlaups um landið norðvestanvert. Fyrra met var komið til ára sinna eða 56,7 mm frá 5. mars 1931.
NA-áhlaupið 29. til 30. des.
Mjög slæmt NA-áhlaup gerði um landið norðvestanvert og norðanlands, það versta í mörg ár. Mjög mikil veðurhæð um og yfir 40 m/s á nokkrum stöðum s.s. á Blönduósi. Mikið snjóaði, snjóflóð féllu, langvinnar ragmangstruflanir og talsverðar skemmdir urðu á raforkudreifikerfinu á Snæfellsnesi, í Dölum og á Vestfjörðum. Miklar samgöngutruflanir þar sem vegir lokuðust fram á nýárið. Þá urðu skemmdir á íbúðahúsum og útihúsum einna mestar í Reykhólasveit. Sem ber fór urðu ekki slys á fólki í illviðrinu.
29.12.2012
Óvenjumikil og víðtæk væðurhæð norðvestantil
Þegar þessi orð eru skrifuð að kvöldi 29. desember er illviðrið engan veginn gengið niður. Ljóst er þó þegar að bálkurinn flokkast með alverstu NA-illviðrum síðari áratuga þegar horft er til veðurhæðarinnar.
Lítum á nokkrar tölur. Á Klettshálsi í Múlasveit var vindur um tíma um 42 m/s í dag. Sú veðurhæð var í ágætu samræmi við spágildi sem ég gerði að umtalsefni í gær á svipuðum slóðum. Rétt norðan við Blönduós á stöð Vegagerðarinnar náði veðurhæðin 40 m/s eða rétt tæplega það í skamma stund. Hér er eingöngu verið að tala um jafnan 10 mínútna vind en ekki vindhviður magnaðar upp af fjöllum og ég læt liggja á milli hluta í bili.
Í Æðey í Ísafjarðardjúpi er athyglisvert að sjá að styrkur vindsins hefur verið meira og minna í allan dag verið af fárviðrisstyrk (32,7 m/s) eins og hann er skilgreindur í vindstigakvarðanum. Línuritið sem hér fylgir með af vef VÍ sýnir einmitt með svörtu striki hvar þessi mörk liggja. Lengst af var veðurhæðin (rauða línan) að dansa við 40 m/s. Hviðurnar mældust vitanlega meiri.
Ég er ekki viss um að fólk geri sér almennt grein fyrir því hversu ofboðslega hvass vindur er sem er af þessum styrk og í raun með ólíkindum að ekki hafi meira látið undan en raun ber vitni þar sem verst hefur verið um landið norðvestanvert.
Manni kemur í hug tvö illviðri sem helst gætu verið til samanburðar. Fyrst skal telja mannskaðaveðrið eða "Heiðrúnarveðrið" 4. febrúar 1968. Aðdragandi þess var nokkur annar, en vissulega NA-illviðri líkt og nú. Hitt er 18. janúar 1995, tveimur dögum eftir snjóflóðið skelfilega í Súðavík. Með einföldum samanburði á veðurkortum má sjá að þónokkur líkindi eru með þessum tveimur atburðum, þá og nú. Hægt er að bera saman vinmælingar upp að vissu marki s.s. í Æðey þar sem vindmælingar hafa verið gerðar í nokkra áratugi. Stöðin á Klettshálsi kom ekki fyrr en 1999, en norðar á Þverfjalli ofan Botnsheiðar ætti að vera hægur vandi að vera saman veðurhæð 1995 og 2012.
28.12.2012
Ein spáglefsa morgundagsins
Margt má segja um spár um komandi óveður, en ég ætla að láta duga að sýna meðfylgjandi spákort úr HIRLAM klasanum af Brunni Veðurstofunnar.
Það sýnir vind og hita kl. 9 í fyrramálið í 850 hPa þrýstifletinum sem á morgun verður í tæplega 1.000 metra hæð. Vel má sjá hvað skilin verða skörp, nokkurn veginn vestan bláu línunnar sem teiknuð hefur verið inn á kortið. Vestan þeirra verður foráttuhvasst af NNA og NA. Hvert strik í vindörvunum er 5 m/s og hálft því 2,5 m/s. Flagg er að sama skapi 25 m/s. Ég tek eftir því að á einum staða er tvöfalt flagg eða 50 m/s. Mig rekur ekki minni til þess að hafa séð tvöfalda flöggun í þessari hæð áður. Minni mitt er þó alls ekki óbrigðult. En þessi styrkur er til marks um þá krafta sem leysast úr læðingi.
Djúp lægð við Austurland (á þessu korti er miðjan norðaustanverðan Vatnajökul) og aðstreymi af hlýju lofti fyrir austan land gerir það að verkum að hitastigull frá vestri til austurs verður gríðarmikill. Einna mestur í um 1.000 til 1.500 metra hæð og í þeirri hæð er kjarni mesta vindsins. Það er hitamunurinn sem í raun knýr áfram vindinn og óveður af þessari gerð eru flokkuð til lágrastaveðra til aðgreiningar frá meginrastarveðrum þar sem kjarni mesta vindsins er talsvert ofar í lofthjúpnum s.s. í flestum S- og SV-óveðrum.
Þetta kröftugur vindur í fjalla hæð gerir það að verkum að hann slær sér auðveldlega niður til sjávarmáls þar sem fjöll trufla streymið. Þannig má ætla að ef þetta spákort nær eftir fari hnútarnir, þ.e. hviðurnar í allt að 60 m/s á sunnanverðu Snæfellsnesi. Þá verður að hafa í huga að veðurhæðin á kortinu er 10 mínútna vindur á meðan hviðurnar eru augnabliksvindur.
Hér hefur ekkert verið minnst á úrkomu sem þessu mun fylgja, en hún er alveg sérkapítuli út af fyrir sig.
Heimsóknir
Flettingar
- Í dag (17.6.): 5
- Sl. sólarhring: 8
- Sl. viku: 55
- Frá upphafi: 1790730
Annað
- Innlit í dag: 5
- Innlit sl. viku: 44
- Gestir í dag: 5
- IP-tölur í dag: 5
Uppfært á 3 mín. fresti.
Skýringar
