Fyrirtaksveður í dag norðaustan- og austanlands

Í sunnanáttinni sem nú er við lýði er víða bjart og fallegt veður norðanlands og austan.  Og það er ágætlega hlýtt, sérstaklega í Eyjafirði og þar austuraf.  17 stiga hita var á Akureyri í hádeginu og tæp 19 stig á Staðarhóli í Aðaldal.  Svipaða sögu var að segja frá Ásbyrgi og af Héraði, þar sem hitinn var 17-18°C.  Og ekki má gleyma Austfjörðum þar sem sumarblíðan leikur við íbúa og ferðafólk enn einn daginn.  Sunnanlands og vestan er líka heldur bjartara yfir þó víða sé nú sólarlaust eða sólarlítið.  Hitinn er þó enn í lægri kantinum eða rétt um 10°C. 

Veðrið á landinu 17. júní

Kl. 9 í morgun var frekar þungbúið á landinu svona í heildina tekið, rigning í Reykjavík, lítilsháttar súld á Akureyri.  Fyrir vestan í Bolungarvík var aftur á móti léttskýjað.  Sömu sögu er að segja frá Egilsstöðum, en austanlands var hitinn allt að 14 til 15 stig á meðan hitastigið var ekki nema 7 til 9 stig víðast vestanlands.  Á Suðurlandi var skýjað og sums staðar einhver væta.  Þegar líður á daginn er síðan útlit fyrir að heldur rofi til í höfuðborginni og gera má ráð fyrir að jafnvel sjáist til sólar undir kvöldið.  Fyrir norðan er hins vegar gert ráð fyrir skúrum síðar í dag og einnig á Vestfjörðum.  Ekta þjóðhátíðarveður verður hins vegar í allan dag á Austurlandi og jafnvel einnig suðaustanlands með sólskini og sumarhita.

Ekki líklegt að hitinn fari yfir 12°C í Reykjavík næstu 8 til 10 dagana

Þegar ég leit á tölvuspárnar í dag tók ég eftir því að þó svo að ekki sé verið að spá neinum sérstökum kulda á landinu, er langt frá því að hægt verði að tala um sumarhlýindi.  Eftir daginn í dag er útlit fyirr það að viðvarandi verði a.m.k. fram í lok næstu viku tunga af fremur köldu lofti í háloftunum. Hún mun teygja sig hingað frá svæðum vestur af Grænlandi eins og meðfylgjandi spákort sýnir.  Gildistími þess er næsti sunnudagur 18. júni kl. 12. Græni liturinn til marks um fremur kalt loft yfir landinu þó svo að því samfara verði SA eða A-átt skv. spánni  Hlýrra sumarloftið, rauðgult og rautt að lit, umlykur okkur svo að segja úr öllum áttum nema norðvestri og vestri.  Fremur kaldur lofmassi að uppruna yfir landinu snemmsumars fylgja oftast nær ský sem byrgja fyrir sólina og oftar en ekki úrkoma af einhverju tagi ofan í kaupið.

Í Reykjavík er til að mynda fremur ólíklegt að hitastigið í hádeginu nái 12°C og það til ca. 24. júní.  Ástæður þess eru bæði vegna þess að loftmassinn yfir landinu verður í svalara lagi, en ekki síður þar sem útlit er fyrir dumbung og sólarleysi meira og minna þessa daga suðvestanlands. Einna skást er veðurútlitið norðaustan- og austanlands þar sem spáð er ágætum dögum inn á milli með landvindi eða SV-átt og sólfari.

Varla heitasti dagur í heil 80 ár

Þá afar hlýtt sé nú á Bretlandseyjum er langt frá því að hægt sé að halda fram að gærdagurinn hafi verið sá hlýjasti þar í 80 ár þar í landi eins og staðhæft er í þessari frétt mbl.is.  Eins og sjá má af upplýsingum fengnum af síðu bresku Veðurstofunnar hefur hæsti hiti á Bretlandseyjum mælst rúmlega 38°C (ágúst 2003).  Í gær varð heitast 32,1° og það í sjálfri London.  Sjálfur man ég (þó ekki upplifað) eftir hitabylgjum Í Englandi þar sem hámarkshitinn hefur verið á rólinu 35 - 37°C, t.d. sumarið 1976 eða 1987 og síðan aftur 2003.  Vel má þó vera að verið sé að vísa í að á einhverjum tilteknum mælistað haf ekki verið þetta hlýtt svo snemma sumars, þ.e. í júní. 

Fólk varað við því að stunda líkamsrækt utandyra í Bretlandi vegna hita og mengunar

Rakin blíða norðaustan- og austanlands

Nú í morgun kl. 09 hafði hitinn þá þegar náð 19°C á a.m.k. þremur mælistöðum.  19,3°C voru í Ásbyrgi og 19,0° bæði á Egilsstöðum og í Neskaupsstað. Fróðlegt verður að sjá hvort hitinn nái á þessum stöðum nái 25°C markinu´síðar í dag eins og ég ýjaði að í færslu hér í gær.  Athyglisvert er að sjá þetta háan hita í Neskaupsstað, því handan Oddskarðsins nánar tiltekið á Eskfirði er ekki nema 9°C og svipaður hiti á Kollaleiru fyrir botin Reyðarfjarðar.  Ekki er ólkílegt að Austfjarðaþokan komi þar eitthvað við sögu.

Nær hitinn 25°C á Egilsstöðum á morgun ?

Það lítur út fyrir afbragðs helgi í veðurlegu tilliti á landinu.  Angi af hlýjum loftmassa úr suðaustri mun ná hingað í kvöld.  Þó ekki verði hægt að reikna með alveg þurru veðri vestan- og suðvestanlands, sérstaklega á sunnudag, að þá verður blítt veður á landinu.  Sérstaklega held ég að íbúar Norður- og Austurlands gætu átt eftir að kætast.  Hversu hlýtt það verður ræðst nokkuð af skýjafarinu.  Á morgun er hvað líklegast að sólríkt verði Norðaustan- og Austanlands.  Og þá verður hvað hlýjast í SV-átt á Héraði.  Mögulega komast hitatölur í 25°C þar ef sólin nær að skína glatt.  Ég ætla að leyfa mér að spá því að Hallormsstaður verði með hæsta gildið á morgun. Egilsstaðir, Kollaleira, Skjaldþingsstaðir, Grímsstaðir og Ásbyrgi verði síðan skammt undan. Fari svo að sólríkara verði fyrir norðan en nú er útlit fyrir mun hitinn einnig komast nokkuð yfir 20°C um miðbik Norðurlands.   

Á skýjamyndinni má sjá hitaskilin koma úr suðaustri og höfðu þau kl. 09 náð "landi" fyrir austan.  Þau mun síðan hreyfast rólega til norðvesturs og vesturs í dag og fylgir ferð þeirra sums staðar lítilsháttar væta.

 

 

Veðrið á opnunarleik HM

Opnunarleikur Þýskalands og Costa Rica mun fara fram í Munchen við kjöraðstæður.  Gera má ráð fyrir að hitastigið verði 20-21°C þegar leikurinn hefst og reiknað er með heiðum himni eða þunnri háskýjabreiðu sem dregur þá jafnframt úr sterkasta sólskininu.  

Fyrstu vikuna munu líkast til allir leikirnir í HM í Þýskalandi fara fram í brakandi blíðu og án þess að rigning fari að hrella sparkara og áhorfendur. Hitinn fer hækkandi um helgina og  ekki er ólíklegt að hitastigið verði orðið nálægt 30°C á þriðjudag eða miðvikudag.  Slíkur hitapottur mun áreiðanlega reynast Englendingum, Svíum og öðrum "köldum" þjóðum þungbærari, en t.d. Suður-Ameríku þjóðunum.   Eða hvað ??

Sjá má sjá t.d.  spá fyrir Frankfurt sem fengin er frá dönsku veðurstofunni. 

Hitar á Bretlandseyjum og S-Skandinavíu um helgina ?

Spár benda eindregið til þess að í löndunum við Norðursjóinn verði rakin sumarblíða um helgina.  Þannig er því spáð að hitinn í Osló verði 27°C á sunnudag og 24°C í Kaupmannahöfn.  Sumahitunum fylgir síðan nær heiður himinn.  Ástæða þessa er voldugt háþrýstisvæði af þeirri tegundinni sem við köllum stundum fyrirstöðuhæð, en hún mun byggjast upp á þessum slóðum þegar líður að helgi.  Meðfylgjandi spákort af veðurvef mbl.is sýnir þetta glöggt.  Það gildir kl. 18 á sunnudag og vel sést hvernig hlýr loftmassinn teygir sig frá Spáni norður eftir til Skandinavíu.

Vissulega fáum við líka að finna smjörþef þessa lofts enda nær rauða tungan  Norðausturland.  Enda spáir Veðurstofann allt að 20 stiga hita norðanlands um helgina. 

Neskaupsstaður með 20°C í dag

Hlýir suðvestanvindar leika þessa stundina um Austurland.  Þannig var hitinn 17,6°C á Egilsstöðum nú kl. 16 og á þriðja tímanum í dag komst hitinn í 20°C í Neskaupsstað.  Ekki bagalegt það.  Spákortið sem fengið er af veðurvef mbl.is og á rætur sínar að rekja til Veðurstofunnar sýnir rauðan hlýjan loftmassa, en hann er nú á austurleið.  Þeir Austfirðingar geta átt von á fleiri viðlíka dögum á næstunni, þó þeir geti alls ekki reiknað með að blíðan verði samfelld. 

Ágæt veðurútlit á kjördag

Sannast sagna lítur út fyrir ágætis veður á morgun.  Í það minnsta ætti að verða fært að öllum kjörstöðum landsins:)  

Kortið sýnir spá um hita og vind á fjölmörgum stöðum vítt og breytt um landið (smellið á það og stækkið). Það er tekið af kortabrunni Veðurstofunnar.  Samkvæmt því ætti hitinn á láglendi að verða víða þetta 6 til 9 °C nærri hádegi, en athugið að allar lágu hitatölurnar fyrir norðan og vestan eru fyrir stöðvar á fjallvegum.  Mjög víða verða skúrir sérstaklega sunnan- og suðvestanlands og gætu þær sums staðar runnið saman yfirí samfellda rigningu.  Hitt kortið hér að neðan er spá um skýjahulu og þar með hvar einna helst gæti sést til sólar við kjörstaði landins.  Samkvæmt henni er sólskin líklegast hjá Húnvetningum, Dalamönnum og Vestfirðingum.  Síður annars staðar, en ég veit að miðað við vindátt og önnur veðurskilyrði eru allar líkur á því að sólin gægist einnig á milli skýja austantil á Norðurlandi í það minnsta framan af deginum.