Ísinn færist nær

Á meðfylgjandi tunglmynd frá því í hádeginu í dag (4. jan kl. 12:04, fengin af vef VÍ) má greina með sæmilegu móti ísjaðar úti af Vestfjörðum. Undanfarna daga hef ég verið að gjóa eftir jaðrinum á þessum myndum og hann hefur verið að þokast nær enda óheppilegar vindáttir fyrir hafísinn á Grænlandssundi.  Verðum að hafa hugfast að þetta er ekki ljósmynd, heldur hitamynd og svæði þakin ís greina sig frá opnu hafinu þar sem þau eru kaldari.  Því er þetta ekki endilega hinn eiginlegi jaðar heldur frekar hitaskil, ísdreifar geta verið nær.  Oftast gefa þessar hitamyndir allgóða sýn á stóru myndina, þ.e. þegar ekki eru ský að þvælast fyrir, en þau eru ekki til trafala í dag.

Á Grænlandssundi er ríkjandi vindátt af NA.  Vindur af þeirri áttinni tryggir það að för íssins suður Grænlandssund með A-Grænlandssraumnum verður greið og NA-áttinn heldur jafnframt ísbreiðunni saman þétt upp að Grænlandi.  Þegar NA-áttin dettur niður í nokkra daga fer að fljótlega að bera á stíflu í streyminu, svo ekki sé talað um þegar vindur er stöðugur af SV.

12. des sl. hófst það ástand sem einkennt hefur veðurlagið síðan.  Háþrýstingur og hægviðrasamt á slóðum íssins.  Reyndar jafnaði NA-áttin sig að nokkru dagana 22. - 29. desember.  Síðan þá hefur heldur verið SV-átt á Grænlandssundi ef hægt er að tala um tiltekna vindátt þar.  Ískort Norsku Veðurstofunnar sem gefið var út var 30. des. sýnir einnig glöggt umtalaða stíflu sem kemur fram sem "þykkildi" hér norðvesturundan.

Ekki er að sjá að ástandið sé að jafna sig, þ.e. að NA-áttin nái yfirhöndinni að nýju og rekur þannig ísinn fjær landi.  Spáð er SV-vindi a.m.k. til 12. og 13. janúar.  Það er því óhætt að spá því að hafísinn komi enn nær landinu og aðeins tímaspursmál hvenær hans verður vart á siglingaleið á meðan ekki bregður til hægstæðra vinda á Grænlandssundi. 

Athugasemdir

[Árni Gunnarsson, 4.1.2010 kl. 16:55]

Gleðilegt ár Einar og þakka þér fyrir allan fróðleik á liðnu ári!

Gaman væri að vita hvernig landsins forni fjandi hegðar sér á grásleppuvertíðinni sem byrjar um miðjan mars eftir venju. Oft hefur hann valdi slæmum búsifjum hjá mörgum þeim sem þann veiðiskap stunda. Þarna eru gífurleg verðmæti í húfi. 

[inga (IP-tala skráð) 4.1.2010 kl. 20:14]

Sæll Einar, isinn er þegar kominn talsvert nær en norska kortið sýnir: http://notendur.hi.is/ij/hafis/

En það er rétt, hann getur orðið til vandræða á næstu dögum isinn.

Kær kveðja

inga

[Þorkell Guðbrands (IP-tala skráð) 4.1.2010 kl. 20:46]

http://www.vedur.is/media/hafis/iskort_dmi/dmi_weekly_icechart_colour.pdf

Þá sýnir danska kortið útbreiðslu íssins nokkuð vel. Tek undir með mínum gamla kunningja, Árna Gunnarssyni, að það skiptir miklu máli hvað varðar afkomu þeirrar greinar sjósóknar, sem kennd er við grásleppuna, hvort hafísinn verður nærgöngull og með hvaða hætti. Grásleppuveiðimenn fengu að byrja 20.3. á síðasta ári og næstliðnu og vera við veiðarnar í 50 daga hver einstakur leyfishafi. Þetta eru harðsóttar veiðar og á erfiðum tíma árs frá veðurfarslegu sjónarhorni, einkum framan af vertíðinni. Netin eru orðin geysidýr, mikil vinna að koma þeim upp og svo getur einn slæmur norðangarður eyðilagt allt úthaldið hjá sjómönnum. Að maður tali nú ekki um ef ísinn verður á ferðinni, þá verður ekki margt til varna ef menn geta ekki forðað netunum í tæka tíð. Veiðarnar eru þess utan mikið strit, þótt þær geti sum árin gefið ágætlega í aðra hönd, þá þarf að hafa mikið fyrir því að sækja þessi verðmæti og sjómennirnir sannarlega vel að því komnir sem þeir bera úr býtum. Markaðir eru hinsvegar sveiflukenndir og þegar saman fer lélegt verð og erfið tíð er arðurinn oft lítill og stundum minni en enginn.