Hitakort frá MetOffice

Breska Veðurstofan, MetOffice lét BBC neðangreint frávikakort í té.  Það sýnir frávik hita síðustu vikuna í desember frá meðaltali 1971-2000.  Kort eins og þetta er ógerningur að útbúa nema að bera saman tölvugreiningar á veðri á hverjum stað.  Strjálir ferningarnir tákna síðan aðgengilegar mælingar á hita á hverjum stað.

Helstu drættir koma fram. Þannig má sjá að kalt hefur verið á Bretlandseyjum og í Skandinavíu, en ekki í líkingu við það hve kaldara var en í meðalári austur í Síberíu og áfram til suðausturs til Kína og þar um slóðir.   Ívið kaldara var á Íslandi, en sjá má að mun hlýrra var um suðvestanvert Grænland og mjög hlýtt á Labrador og eins austan hafs í N-Afríku og við Svartahaf og þar austurúr. 

Það sem af er nýári hefur svipað munstur haldist a.m.k. hvað varðar norðurhvelið eða vetrarhvel jarðar. 

 

Athugasemdir

[Höskuldur Búi Jónsson, 6.1.2010 kl. 23:18]

Þetta eru nokkuð mikil frávik, í hita og kulda - er vitað um ástæðuna fyrir þeim?

[Einar Sveinbjörnsson, 6.1.2010 kl. 23:44]

Sæll Höskuldur !

Ástæðurnar fyrir þessum frávikum eru ljósar og skrifast á reikning lofthringrásarinnar "á hvolfi" við norðanvert Atlantshaf.  Tengist mjög neikvæðu útslagi NAO og fjallað var m.a. um hér í byrjun ársins.

ESv