Hafísinn í utanverðum Húnaflóa á radarmynd

Á meðfylgjandi mynd sem tekin var í gærkvöldi (16. jan)  kl. 22:59 sést hafísinn afar vel inni á Húnaflóa.  Öllu heldur jaðar hans, sem kemur vel fram á þessum tegundum mynda, ratsjármynda.

Ratsjármyndir eru á örbylgjusviðinu og í eru í mikilli upplausn eða um 25m.  Þær eru  óháðar birtu og skýjahulu og það sem kemur fram er í raun hversu slétt eða úfið yfirborðið er. Nokkuð þéttar hafísspangir eru því vel greinilegar frá opnum og gát´öttum eða úfnum sjónum.

Ísinn hefur síðustu daga verið að færa sig upp á skaftið og virðist hann nú berast ákveðið inn Húnaflóa. Enn er ísátt, þ.e. vindurinn er vestlægur.  Á þriðjudag er hins vegar spáð ákveðinni SA-átt, sem ætti að halda ísnum í skefjum.  Heppilegt að ekki sé N-átt í kortunum um þessar mundir og þegar svona er ástatt. 

Eins og oft áður sendi Ingibjörg Jónsdóttir mér þessa mynd.

Athugasemdir

[Ragnar Eiríksson, 17.1.2010 kl. 15:18]

Þú nefndir í síðustu hafísfærslu að ef hafísinn færi ákveðið innarlega þá gripu straumar hann og flyttu inn allan flóann.      Mér sýnist á myndinni að hann sé kominn inn í Reykjafjarðarál - sem var viðmiðið - Er þetta rangt?   Ráða vindar við straumana þarna?

 Ragnar

[Jón Frímann (IP-tala skráð) 17.1.2010 kl. 16:47]

Hérna á Hvammstanga er ekki kominn neinn hafís ennþá. Sjáum samt til hvað gerist.